PATHIAN LEH HNATTUAN
( Peter P.Hlaimang )
Hnattuan thawn pehpar aw in Pathan ih hmuhdan mallai takte ka tarlang ve duh. Hnattuan ttul rero khal hi hnaihnawkin na tih can a um theu ko ding. Hnattuan hi paihloding a rak si lo, Pathian in hnaa ttuan dingah in duh sawn mi a rak si. Pathian thlasuah kan dawnnak ding khal a si. Rak sair tengteng aw!.
Lottery USD ting thawngkhat ngah bang ta awla ziang na tuah ding tin vun sut sehla mi tamsawn cun Leibak pawl ka sam thluh ding, Inn le Mawtaw (Car) thar ka lei ding, Hnattuan ka bang pei nuannuam takin caan ka hmangding... tvk pawl hi a si ding a zumum. Hibang pawl hrangah cun hnattuan hi paihlo cingin ttul ruangih ttuan men an si.
Mi tamsawn cun no laiah hnattuan cawl (Retired) ih nuamzet ih nun khawsak hi an/kan duh cio. Mi thenkhat tla cu ( Ram tthangso hmunah) Hnattuan hi an hreh hluahhlo, hnattuan ka paih nawn lo tin tla an ti. Colo. 3: 22-23 sungah kan zoh a si le, " Ziang hmuahhnuah na tuah tinkim ah milai hrangah silo in Bawipa hrangah kan ttuan tih thinlung nei in nan thinlung takten tuahuh… nan rian mi Bawi ngaingai cu Khrih lawng a si".
Pathian cun a dikmi hnattuan hmuahhmuah a mah thawn pawlkom awmi si in milai pawl ih ttulsam mi a pe theu tin a hmu. Pathian cu ummen lo ih hnattuan rero tu a si. Lei le Van leh a sungih um mi pawl cu ni 6 sungah a serhsiam ih a ni 7 nakah a cawl. Cun a hnatuan cu cawllanta loin a pehzom vivo. Zisuh in an hnen ah "ka pa cu hna a ttuan ringring ih keikhal hna ka ttuan ve ttul asi" tiah a ti. ( Jn 5:17)
Pathian hrangah na hnattuan a thupi timi cabu ngantu in "Hnattuan hi milai le Pathian karlakah thuktak ih an pehtlaihawknak a si. Zumtu hrekkhat cun hnattuan hi Pathian thawn a pehtlaih awlo tin zumsualnak an nei. A si nan, Pathian lam in hmuh ve danah cun Hnattuan ti mi hi milai an nun khawsaknak ah a thupizet ah a ret. Hna kan ttuannak ihsin pakhat le pakhat pawlkom awknak kan nei , mai ttul le hai mi kan ngah , Inn sungsang tulmi kan bawm thei, kan hmuhsuak mi sumpai thawn midang harsa pawl kan va bawm, cun hnattuan nak ihsin Pathian kan rian kan sunlawih theu hi a rak si". Hi mi hi theih fiang ding a ttulzet mi si in ka thei.
Gen. 2:15 sungta vekin taksa lam ih kanpa Adam kha sualtuah ruangih tluksiat a si hlanpi ihsin hnattuan ding ttuanvo pekzo a si kha. Hnattuan hi sual a si lo, sual ih tluksiatnak ruangih hna kan ttuan a ttulnak san khal a si cuan lo. Pathian in a thawk ih sin milai hrang ih a serhsiam mi hhmuan le a sungih um pawl kilkhawi tu dingah, a mah rian tu ding le a hnattuan pi dingah milai in serhsiam a si sawn hi a fiang nasa. Teimak suah in hnattuan tunto hi a lungthlitum zawng a rak si sawn cu...cu kel the!
Cuih ruangah Pathian ih hnattuanpi( Partner) pakhat siin tihtheitawp suah ih hnattuan ding cu a si. Ziangkim kan ttuan ah Pathain hna kan ttuan tih lungput nei she la, ti cun, kan hnattuannak ah Pathian hrangah hna ziangtin kan ttuan tih cu copcilh in a theihtheih lohli lo hmanah cipcer tak in kan zohfel a si ah cun Pathian hnattuan kan rak si thluh. Ziangah tile, a dik mi hnattuan hmuahhmuanh mi hrang tthathnemnak a thlenpi theu. Timen sehla, nunman cu hnattuan hi a si tuan tento cun Pathian thlasuah dawn hi a si ko. A si ko lo sawm?
Mi pakhat hrang te lawng thathnemnak ding thilttha tuahmi kan neih hmanah kan hnattuan hin hmual a nei tuk zosi…tiaw!. Pathian khal a lungawi ih Zisuh Khrih thawng in thlasuah sinsin in duh. Pathian a duhdawtnak, a zangfahnak, a tthatnak, a thlasuah malsawmnak tvp hin cem tih ni a nei dah lo, a danglam dahkel lo Kumkhuan a hmun ringring. Hnattuan teimak hi uar sinsin uhsi, kan khua, kan ram kan miphun tthangso dingah kan tihthei tawk in ttanlain lungrual ten kutkai aw in Pathian kan rian tlang hai peiuh .
>>Kan Pa Pathian cu Zisuh Khrih thawng in nan thangtthat bang in, tawngkam ah siseh, hnattuan ah siseh ziangkim nan tuahah Zisuh ih, sunlawi nak cu zohtthim in, a hmin in tuah uh. (Colo. 3:17)
>>"Whenever you say and you do should be done in the name of the Lord Jesus, as you give thanks to God the Father because of Him. (Contemporary Version).
May the Chin People be blessed to all Nations!
Cabu rawn: What Makes a Winner by Whit Criswelt
In Christ
PETER P. HLAIMANG
Yangon
