Pathian Lungawitertu
-cikuairem
Leitlun kan nunnak caan tawite sungah thupibik cu Sersiamtu Pathian nung theih le a lungawiter ding hi a si. Cumi cu Pathian ih in sersiam duhsanbik le a tumtahnakbik a si. Pathian theitu, a zum ih a rinsantu le a lungawitertu cu nunman nei le mi thluasuak an si. Duhdawt mi nu le pa, u le nau pawl, nan nunnak cio vun zohfel saal hnik uh! Tuni ahhin ziang dinhmun ah na ding? Pathian lungawtertu maw na si? asilole Pathian riahsiatertu so na si? Pathian lungawitertu mi lungawi le mi thluasuak kan si cio theinak dingah Bible sungih Pathian Tongkam zoh in thlarau thazaang kan la tlang pei.
1. Pathian Theih ( Knowing God)
Jeremiah 9:23-24 ah Bawipa ih simmi cu, "Mifim in a fimnak uar hlahseh, micak in a cahnak hngalpi hlah seh, milian in a lennak ah tluangkhawng hlah seh. Zokhal in uar awk a duh asile Keimah i theihnak le i theihthiamnak ah uar aw sawn seh. Ziangahtile ka duhdawtnak cu cem ti a nei lo ih, a dikmi le a hmanmi ka tuah ringring a si. Himi pawl hi ka lungawitertu an si," ti'n kan hmu. Curuangah a fiangzetmi cu Pathian lungawiter theinak umsun cu
Amahtheih hi a si. Pathian cu i Sersiamtu, i Rundamtu le i Thluasuahtu ti ih theih hi a sim duhmi a si. Cangan thiam hminthang J.I Packer cun "Pathian Theih (Knowing God)" le "Pathian Thu Theih ( Knowing About God)" cu a dangpi a si ti'n a sim. Pathian thu tampi thei ko nain Pathian zum lo (unbeliever) an um ih Pathian thuthuk tampi a thei lemlo nain Pathian a thei taktaktu, thlarau nun taktak ih Pathian kaihngettu an um a ti. Mihrek cun, Pathian neitu ( Possessor of God) le Pathian a um ti simtu fangmen (Professor of God) ti'n tla an ti. Nangteh khuimi ah na um ti nagmah le nagmah hliakhlai aw hnik aw!
Thuthang`ha Johan 17:3 ah, "Cuih kumkhua nunnak timi cu Pathian taktak a simi Nangmah theih le na thlah mi Jesuh Khrih theih hi a si," ti'n kan hmu. Curuangah zumtu kumkhua nunnak kan nei kan timi cu Sersiamtu Pa Pathian theih le Rundamtu Fapa Pathian Jesuh Khrih kha "i Runtu le ka Bawipa" ti ih zumfek le rinsan khi a si. Khristian maksak Paul in, "Mi hmuahhmuah rundam an si ih thutak an theih ding cu Pathian duhmi a si, ti'n a sim (1 Tim. 2:4). Jesuh in, "Keimah cu thutak, lamzin le nunnak ka si," a ti (Johan 14:6). Curuangah kan thlarau nun in Pathian a theih tikah Pathian fahniang kan si. Cumi cu Pathian ih duhmi le Pathian lungawitertu a si.
2. Pathian hnen Lungawi thusim (
Thanksgiving)
Pathian theitu, zumtu ih kan neih dingmi thinlungput cu Pathian ih duhdawt zaangfahnak theithiam in Amah thangtthat le lungawi thusim hi a si. Saam 50:23 ah, "Kan hnenih lungawinak nan langtermi hi ka thang in tthattertu thawinak a si," ti'n kan hmu. Paul in, "Cat loin nan lungawi uh. Thlacam ringring uh. Nan parih ziangvek a thlen khal le nan lungawi uh. Khrih Jesuh thawn a pehzom awmi nan nunnak cubangtuk ih nung dingah Pathian in a duh a si," ti'n thazaang a peeknak kan hmu (1Thess 5:16-18). Pathian thangtthat le lungawi thusim hi a Pathian lungawitertu a si.
Leitlun retheinak ram ih nung kan si bangin kan ruah lo pipi le kan duh lo cing khal in kan nunnak ah thinphaannak, buainak, natfahnak le ninghan riahsiatnak a phunphun kan tong ttheu. Cuvek caan khal ah Amah thangtthat le A hnenih lungawi thusimnak nei ringring ding in duhsak. Commentary ngantu mi hminthang Matthew Henry ih nun ihsin thazaang kan laak ding ka duhmi a um: Veikhat cu rinlopi in damiahttaih a tong. A thilri an lonsak thluh. Duhdawtu pawl in an leengih tha an peek tikah amah riangri in, 'Pathian hnenah lungawithu sim ding pathum ka nei: 1) Ka thilri cu in long na'n ka nunnak a him; 2) veitampi hivek thuhla ka thei dah na'n atu veikhatte lawng ka tong; 3) Midang thilri longtu si loin mi ih dawttlak ka sisawn ruangah,' a ti. A mak taktak si. Uar a um ngaingai. Cawntlak nun neitu a si. Duhdawt mi nang le kei tla Pathian hnenah a phunzaitu si loin lungawithu simtu sinak in
tettittha si zuam uhsi!
3. Midang Hlawmtu sinak ( Sharing)
Zumtu pitling nun tahnak tahfung (measurement) pakhat cu peeknak nun, asilole midang thawn thluasuah hlawm awk nun hi a si. Pathian thuthangttha siseh, kan hmuhtonmi thlarau nun thuthup siseh, fimthiamnak le thiltitheinak kan neihmi siseh, sumsaw le thilri kan neihmi siseh zumnaklam in kan innsang a simi kawhhran sungah le kan innhnen pawl le a ttulsammi pawl hnenah siangzet in pe ding le hlawm (share) ding kan si. Bible in, "ngahlam hnakin peeklam ah lungawinak a tamsawn," (Tirh 20:35) timi hi hna ih theitu men lawng si loin a nuncihtu kan si ding a thupi.
Veikhat cu kawhhran home cell Bible zirnak ka fehlai ah Taxi mawngtu thawn biaknak thu pawl kan reel. A timi pakhat cu: "Khrihfa pawl hi mi ttha le mitirhsiang nan si. Mother Teresa, le Bill Gate tla cu midang hrangah nasatak in an peek siang, ka uarzet" a ti. Ka lungawi nasa. Ziangahtile zumlotu pakhat in cuvek ih Khristian pawl in hmuh cu amak ka ti. Kawlram le hmuntin ih um Laimi zumtu pawl hi mibum le mi hrokhrawl, mi duhham emem si loin, Kawhhran hnattuannak le khua le ram, miphun `hansonak hrangah siangzet ih a thawhtu kan si ding thla ka cam. Kan kiangkap ih mi tlasam mangbang vansaang pawl hnenah vanlam duhdawtnak langter theitu, ngahmi thluasuah mai' zawn lawng ruat ih ham tteitteitu si loin, pitling nun nei in midang a
hlawm siangtu kan si le Pathian lungawitertu kan si ding.
Duhdawt mi zumtu, na khristian nun tthate'n zohfel saal hnik! Na lungkim tawk maw? Zumtu na si pekte le atu na nunnak ah Pathian theihnak ah na tthanglian maw? Bible in, "Kan Bawipa le in Runtu Jesuh Khrih zaangah lainatnak le Amah theihnak sungah tthang vingvo uh" ti'n in sawm (2Peter 3:18). Cule lungawi nun neitu si ding tla in forh; "Bawipa thawn nan pehzom awknak ahhin nan lungawi ringring hram uh. Ka nolh saal hrih ding; nan lungawi hram uh," (Filipi 4:4) ti'n. Hebru cangantu in, "Tthatnak tuah kha hngilh hlah uhla, nan neihmi midang thawn hlawm awk dingtla hngilh hlahuh; ziangahtile cumi cu Pathian lungawitertu raithawinak an si," a ti (Heb.13 :16). Curuangah kan neihmi midang hnenah siangzet in a hlawmtu si zuam cio uhsi!
Theitu, Lungawitu le Hlawmtu cu mi lungawi le mi thluasuak an si .
