Ps 106:6- Khristian Nun
V6. Hi mi Bible cang Kan zoh tik ah, Pathian hril mi Israel fate pawl hi tui ni Kristian pawl hrang ah zoh thim ding ih thlalang an si ka ti le kan sual lo ding ti ah ka ruat. Pathian ih thilmak tuah mi cu Mosia hmang in a cangvaih tik ah,siang Pahrang Pharaoh khal in a thu khauh tak in a keng kawh thei ta lo ih a net nak ah sal ih sin luat nak a pek hai, Israel fa te pawl suah an si hnu ah Pathian ramtiam thlen nak ding ah harsa zet ih pah tlang ding mi an neih mi cu, Nelrawn ram ro pahtlang ding lawng si lo in tipi tan kai ding mi in an hmai in a rak hngak, an dung in Pharoah ral kap in an dawi, an kiang kap ah tlang ih kulhpit an si fawn, awlawk sawng van sang in, kan lai Nu Pa ih an sim theu mi "van ka zoh ah a sang, lei ka zoh ah a pit" si ti mi din hmun ah an thleng la la ta riai.
A si nan, rundam nak cu Pathian hnen in a ra suak ta riai, Pharoah ih tiduh dah nak sung ih run dam tu cu, ral kut sung ih run ding in a tik cu te ah a cang vai la la ta riai, tipi cu then hnih ah then ter a si ih tlun ah lei pho le lei car ah kilometer 2 lai kau in tipi cu then a si ih a dawi tu ral pawl cu ti pi sung ah an pil that theh sawn a si. Run dam nak cu Pathian hnen in a ra.! Vv11-22..siar " Tidai in an mah ral tu a khuh pil theh, pakhat hman a tang an um lo, cu lawng ah a thu an zum; a sinan a tuah sak mi an hngilh cing cing ih, a rem ruat mi an hngak paih lo, ram car ah cun Pathian an turhhnawh ih an dil mi a pe hai, Igyipt ram ih Pathian thilmak tuah mi le, Tipi sen ah awlawksong za thil mak a tuah mi pawl an hngilh theh." Cun, v7 siar " Kan pu pa in Egypt an um lai ah na thil mak an thei thiam lo, na that nak zo zai an cing lo."
U nau tui ni ah Pathian hnen ih na hmuh mi thlawsuah hi pakhat te ten na siar dah maw? Christian tam pi in kan nun nak ih Pathian malsawm an hmuh mi pawl par ah lung awi thu an sim lo, lung awi hna an thiam lo a si ah cun, ziang thawn a bang aw ti le, hi mi malsawm hi kei mah te ka hmuh suah mi a si, kan ti thawn a bang aw ko ding ti ah ka ruat. U le Nau pawl, lung awi thiam le mi lung awi mi hi Pathian ih malsawm a pek bet duh mi an si ding hi cu el rual um lo in a dik ding ka ti.
Himi Bible bungcang ih in zirh mi cu, rang tak ih Pathian tuah sak mi hngilh, Pathian thangthat lam si sawn lo ih, vui hram, phun nawi lam sawn nun a si ruang ah, duhdawt mi u nau bulpak cio nun ah check aw cio uh si. Cun, hi mi bungcang hmang in thu pa hnih ka run tarlang duh:
I. Pathian cu kan thalcam in sang tu a si
Kan thalcam mi Pathian in in sang maw sang lo ti cu kan mah bul pak nun cio ah kan thei bik ding. Zum tu tam tak in kan thlacam dan cu ziang thawn a bang aw ti le.. nau hak te te pawl in Pu tar pa an leh hawh ih a iin sang ka an va king vek fang khi a si ti ah Pathian mi pakhat in a sim dah ih, a hman zet ka ti, kan man can ah kan cam, cun cam lo thul in kan um theu a si lo maw? Ziang tin saw kan mah la la in ngah ding ah kan zum thei ding? Cu tin, ne ta bik ah doubt, rinhlerh nak a ra suak phah a si lo maw. Zi su ih thinlung cungduk di ko( thawng duk di) tu thil pahnih Bible sung ah kan hmuh thei a si. Cu mi pawl cu:
Zum nak nei mi pa pakhat( Rome ral bawi pa) le
Zum lo tu pawl (ringhler pawl) an si.
-Zum nak nei mi pa khat( Luke 7:9) Ralkap za ho tu pa ih zum nak a si. Ral bawi pa ih siah hlawh dam lo thi zik a si lai ah, zisi ih thu hla le dam ter thei tu a si thu an sim theih tik ah, Judah upa dang in Zisu hnen ah, Cui ral bawi pai inn ah feh ding in an sim sak tik ah, Hi tin ral bawi pa in a sim " Ka luang pi hnuai ah, ka iin cu, Bawipa ngang ih rat nak tlak a si lo, kei khla na hnen ah ra tlak ah ka ruat aw lo, kam khat te tong aw la ka siah hlawh cu a dam ding. Cui thu Zisu ih a theih tik ah, mak a ti tuk ih, hi tluk zum nak mak sak cu Israel lak hman ah ka hmu lo asi a ti." U nau ngang khal in tui ni ah Zisu thinlung hi na zum ngam nak in na thawng duk di thei a si.
A dang leh la la cu Mark 6:6. Zi su cu um nak khua ih thu a zirh nak ah, mang bang za a tuah mal na sa, ziang ah? A thu zirh lai ro ri ah, hi pa cu inn sak thiam Mery ih fa pa a si lo maw, Jeims, Jose, Judas le Simon pawl ih U a si lo maw? A far nu pawl khal kan hnen ih um theu kha an si ko lo maw, ti in an ti. V6. An zum lo zia a mang a bang." A thin lung a thawng duk di ro ri a si.
II. Zum nak in Pathian lung awi ter ( Heb.11 )
Q. Ziang tin Pathian lung na awi ter thei?
Amah zumnak in! hi hi a sannakbik cu a si. Kan zum le kan pawm dingah Zisu leitlunah a rak thlahnak a si ih, a zumtu pawl in nun tam(Abundant life) an neih thei nak ding ah a si. Lei tlun ih mi pa khat si ve ding ih Pathian ih in tuah mi hi thil mak ( Miracle) a tling zo a si, cu lawng hman si lo thiam nak, cah nak, in pek mi hi kan siar a tul a si. Cu ruang ah si Nehemiah in ( Neh.8 : 10) " Bawi pai hnen ih lung awi nak cu nan tha zang cah nak a si." Zum nak ah kan hram bun uh si.
U nau kan nih mi lai cun thaisun kan thei lo, a si nan, a thei tu le a kai tu Pathian rin nak in kan thin hna a ngam thei nak a si.
Cu ruang ah ne ta bik ah Bawi pa cu kan thlacam in ngai sak tu a si vek in, a mah kut cak hi thin sau tei zoh kan zir pei uh. Cun, zum nak thawi kan ni tin nun kan hman thiam ih, ziang vek har sat nak lak khal ah, kan zum nak sawn in kan nun kil khawi ter ih, a malsawm siar tu fa pa le fa nu kan si thei nak ding ah si seh, kan par ih a that nak liang luang hi hngilh mai tu si lo in a siarthiam tu kan si sawn ding duh sak nak tam pi thawn ka rak ngan mi a si. Tu cu kan Paper a tam tuk lai ih. Leh hnu le ka rak thlah tum leh a si kei cu. Lung awi.
Rev. Hrang Hlei Khuai
Philippine
