|
Lairam Zin hrangih -
Salai Tluang Thang interview
Published on 1.6.2011 at 13:00pm (CET)
Kan lairam lamzin thansonak dingah tiin bulpak hlawknak le hminthan duhnak tel riai lo ih mai thazaang hlawhsuahmi sum le pai rori thawn, Falam peng Zultu le Lunghawh khua karlak mawtaw cycle lamzin cek ter tu Zohthim tlak Salai Tluang Thang(DK) cu Chin World (www.chinworld.info) in thusuhnak kan rak nei.
Chin World: :Na hmin ngai, na suahnak khua, na nu le pa, u le nau pawl in sim thei pei maw..?
Salai TT : :Ka hmin ngai cu Salai Tluang Thang a si ko. Chin ram, Falam peng Zultu Khua ah ka suak. Ka Pa Khua Thang (Khawlei khua), Ka Nu Sui Len (Zultu khua) tla an si. Unau pali kan si ih, kei hi nautabik ka si. Kan upabik cu Nu Saw Hnia (Pyinmana) um a si ih, a sangtu Nu Thian Iang(Chawng Khuah) um le Pa Thian Tung (Phakanh) um pawl tla an si.
Chin World: : Ziangtik kumah Denmark ram na thleng?
Salai TT : : Kum 2005, December ni 8 ah ka thleng.
Chin World: :Kan Lairam lamzin thansonak dingah lamzin na lai ter rero tiah kan rak thei ih, himi hi ziangtik ihsi na rak thok mi a si?
Salai TT : :Denmark ram ka thlen hlan, Malaysia ka um lai ihsin kan khua (Zultu) le Lunghawh karlak mawtaw lamzin laih ter ding tumtahnak ka rak nei. Ramleng ka thlen veten hi ka lungsungih ka tumtahmi ka tuan thok thei. Asinan keimah te lawng ka si tikah mawtaw lamzin cu tum thei hrih loin kum 2008 October thla ni 16 ihsin Lunghawh le Zultu karlak mawtaw cycle lamzin sawn ka cek thok ter.
Chin World: :Zultu le Lunghawh karlak cu peng ziangzat tluk hla mi a si.
Salai TT : :Himi lamzin hi peng 12 hrawng hlat aw mi a si ih, ke thawn lawng feh thei nak hmun a si.
Chin World: :Nan khua hi inn ziangzat an si, hi lamzin hi zo pawl nih an hmang ding?
Salai TT : :Zultu hi inn 32 an si ih, mawtaw cycle nei 1 an um. Thang Hluang inn 33, Khumzing inn 30 - 40 umnak khal ah mawtaw cycle nei 4 an um zo ih, Zultu, Lunghawh, Thanghluang, Khumzing khua pawlin olsam ten an hmang thei ding.
 Chin World: :Nangmah le Denmark ah na um fawn, zo nih lamzin laih tuanvo a lo lak sak, nihlawh teh ziangzat tluk nan cem?
Salai TT : :Si ko, keimah ramleng ka um ko nan, khua ih umtu Saya Sawn Thang, U Khup Hlai, U Lian Khua Pum, U Nai Kap le kan nau Thian Nei Thang te pawlin an man lo zet cing ten, ṭangkhawm le lungrualnak thawn tuanvo lak ih in rak ṭanpinak ruangah tu vekin kan ṭuan thei nak a si. Hi lamzin laihnak ah ni 350 ni hlawh kan cem.
Chin World: :Ziangtik ni ah hi lamzin laih nan theh suak?
Salai TT : :Kum 2008 October 16 ihsi himi Motor Cycle lamzin laih kan thok mi hi kum 2009 sungah ṭhehsuak dingin kan ruat nan, kan ruahnak vekin sumpai lam tlamtlin lo nak le khua lam ih um tu pawl remcan lo nak ruangah kan ṭhehsuak thei lo. Asinan, Pathian lamhruai nak in May 25.2011 ah tluangte'n kan ṭhehsuak thei.
Chin World: :Lamzin onnak puai teh nan tuah ko maw, ziangti vekin nan tuah thei?
Salai TT : :May 25, 2011 ah a laih cu kan theh suak nan, a onnak puai hi 27 May ah khan Falam ihsi Mah-Ya-Kah Secretary pa in onnak in tuah sak ih, Himi lamzin phuanpuai (Onpuai) tuahnak dingah tiin khuanu khuapa pawlin Vok Lukhat le, kan innsang in Sia Lukhat kan thah, Cun, khua venghnen um mi nulepa le unau pawl sawm in lungawi zet le nuamzet in Pathian hla le Ram hla mawi zetzet tawn tluang te'n kan tuah. Cuhlei ah hi lamzin thar onnak puai ah, a hmaisabik mawtaw cycle 32 pawlin hi lamzin zawh thok nak an nei.
Chin World: : Zultu - Lunghawh lamzin laih nakah sumpai ziangzat tluk na cem, bawmtu dang teh na nei maw..?
Salai TT : :A thok pek ahcun lamzin kan laih mi hi ting 70 hrawng cem dingin ka ruat nan, Pathian lamhruainak le Khuanu khuapa le khua kiangkap um mi pawlin lungrual tei in tanpinak zarah ting 50 hrawng cem in kan ṭhehsuak thei a si.
 Sumpai lam ih in tanpi tu le a hlu tu pawl cu a tanglam vek in a si.
(a) Tluang Thang te Family in,............ks, 3000000/
(b) Lian Thuan U.S.A............... ..........ks, 400000/
(c) Denmark um Falam Pawlkom in,....ks, 300000/
(d) Malaysia um Zultu te in,......... .......ks, 280900/
(e) U Nam Lian in.......... ......... ..........ks, 100000/
(f) Father Hlawn Khawn in,......... ........ks, 100000/
(g) Chawng khuah khua in,......... ........ks, 28200/le Fang taang (3)
(h) Citaa khua in.......... ......... .......... ks 20000/ le Fang taang(3) Pili
(i) Pamunchawng khua in.......... ......... Fang tangkhat (1)
(j) U Hlawn Duh U.S.A..........................ks, 95000/
(k) U Lum Tho U.S.A............................ks, 95000/
(l) U Van Bawi San U.S.A......................ks, 95000/
(m) U Hlai Za Thang U.S.A....................ks, 95000/
A zate kom in.......................................ks, 4608200/
Chin World: :Hi mawtaw cycle lamzin na laih ter nakah acozah lamin siseh, a hmun ih um khuanu khuapa pawl hnenin siseh harsatnak pekmi/ton mi na nei maw..?
Salai TT : :Hi lamzin laih kan thehsuak tiangah acozah lam in cu harsatnak kan tong lo. Amahlawngte kan laih thok pek deuh lai hrawngah kha cun, lunghawh lam khuanu khuapa hnen ihsin kan thingkhon retnak kan thawn theilo, kan ek-inn kan thawn thei lo, kan hmuan thingkung kan hau thei lo ti vekih donkhamnak cu kan tong ko. Kan rawl hawl nak a harsat phah ding tiah tla in an ruat lawk nan, anmah hrang thiltha ka vun tuahsak mi a si ti an theifiang ih, an hrangih a that zia an hmuh tikah nasa ten in tanpi sal ih cutin tluang ten kan theh suak thei vivo mi a si. Lunghawh pawl, Khumzing khua pawl tla an lungawi zet. Tu ah cu Pastor pawl khal tu le tu an hung so thei zo.
Chin World: :Ramsung Khuanu khuapa pawlin na sumpai kuat mi hmangin ziangti vekin hna an rak tuan, nihlawh phal in maw asilole contact in maw an rak tuan..?
Salai TT : :Sum le Pai ka vun kuat mi hi rinsan mi upa pakhat in tuanvo rak lak in khua lamih hnatuan duh tu an rak hawl. Cutin nikhat ah Ks.1500 (rawl cawm) hlawh phal in an rak tuan ter hai.
 Chin World: :Ziangruang bik ah himi Zultu le Lunghawh mawtaw cycle lamzin na laih ter timi, a san bik in sim thei pei maw?
Salai TT : :Kan lairam hi thih le hloh, damlo can ah simum tete leinak dingah mawtaw cycle thawn olsam tei kan lei thei/feh sukso thei nak dingah siseh, nauhak pawl hrang tlawng feh olsam nak ah siseh, sizung thawn kan hlat awk tikah pehtlaih nak tha kan nei lo ih, thih cu lo tampi in kan thih phah ruangah mawtaw cycle lamzin tal kan nei asile cu pawl cu a zia um deuh ding timi ruahsannak ruangah a si. Cun, neta ah himi lamzin hmangin mawtaw lamzin olsam ten a laih theih ding.
Chin World: :Hi lamzin nan thehsuak ih, a onnak puai nan vun tuah tikah na lungsung ah ziangtin a um, na feeling dan?
Salai TT : :Ka lungawi zet nakah lungawithu a sim dan tla ka thiam lo. 2008 kum ihsin kan tuan thok mi, ziangtik ah kan theh suak thei ding, Cun, kan khua hi thirleng hman thleng thei mi asilo, atu ahcun mawtaw cycle zin tiang kan theh suak thei. Kan fanau le pawl fimthiamnak lam hrangah, sumdawn veivah nak hrangah, damlo mi pawl phurh sukso nakah le Pathian ram kauh ter nak ding hrangah siseh, olsam tei kan feh thei thlang mi hi ka lungawi nak bik a si.
Chin World: :Himi mawtaw cycle lamzin na theh suak zo ih, hmailam ah teh ziangti vekin tumtahnak na nei?
Salai TT : :Aw, Pathian in can tha in pek hrih a si ahcun Zultu tiang mawtaw lamzin thleng ko laih ding tumtahnak ka nei ko. Himi thu thawn pehpar in NGO thawn tla tonawknak kan nei zo. Thuhla fiang cu a um hrih lo.
Chin World: :Ka lo sut man lo zikte ih, Innsang teh na nei zo maw.?
Salai TT : :He he, nei ko e. Ka darling hmin cu Thian Nun Par a si ih, Marmar tiah an ko theu. Fanau malsawm fapa te kan nei. Atu Denmark ramah kan umkhawm ko.
Chin World: :Chin World rak siartu chin mipi pawl hnenah cah duh mi na nei asile...?
Salai TT : :Ramleng um kan chin mi zo khal lungrual ten mah le khua le ram ciar hrang thil tha pakhat tal kan vun tuah sak ding hi ka duh zet. Cutin kan tuah asile kan lairam khal a thangso thei ding.
Chin World: :A lo pehtlaih duhtu pawl hrangah ...?
Salai TT : :Denmark ram Ølgod timi khua ah kan sungten kan um.
Telephone: 0045 75243484
email: salaitluangthangzn@yaho.com ah pehtaih ka theih ko.
Chin World: :Tikcucan hizat in pek ruangah kan lungawi zet.
Salai TT : :Kei khal ka lungawi.
Zultu - Lunghawh Mawtaw Cycle lamzin On puai zuk pawl (27.5.2011)
| 