|
Chin Rock Siangpahrang
Solomon Menrihai interview nak
Chin mipa hlasakthiam lakah thenkhat in Chin Rock Siangpahrang rori a si an timi Solomon Menrihai cu Europe ram, Norway ih concert an tuah lai 25.07.2009 ah chinworld.info in hmaiton thusuhnak a rak tuah ih, a tanglam ah rak siar aw...
 CW:Na hmin ngai, na suahnak khua, na nu le pa hmin pawl in sim thei pei maw..?
MTS : Ka hmin ngai cu Solomon Mang Tin Sawn a si. Ka suahnak khua cu Chin ram, Falam a si. Ka pa Van Lal Sak a siih, ka nu cu Cal Lian Zingi a si. A tu ah Falam ah kan um. Unau 7 kan siih, nunau 2 le mipa 5 kan si.
CW: Fimthiam zirnak lam hi ziang tiang na rak thleng?
MTS: Ka nauhak lai ihsin awnmawi lamih ka pumpek awk tuk ruangah fimthiamnak lam hi ka rak zir rei tuk lo.
CW: Menrihai timi hi nan Band hmin maw nangmah ten hmin na pek awk mi sawn ha?
MTS: Menrihai band hminin ka rak feh dah ih, kan kim theilo ruangah, keimah bulpak in Solomon Menrihai tiah ka pek awk.
CW: Na hmin ngai Solomon Mang Tin Sawn timi hi zo ih lo sak mi ha?
MTS: Ka pu Ral Sai Lo(Fam) ih in sak mi a si.
CW: Ziangtik ihsin awnmawi lam na rak duh thok.?
MTS: Ka nauhak lai ka nui` hmakphek phom awn ka theih ihsin ka rak lam thok zo. Ka tah hmanah cassette awn ka theih cun ka bang cih theu.
CW: Ziangtik in hla na rak sak thok.
MTS: Kum 14 – 15 ka si hrawng ihsin kan mai inn ah hla ka rak sak thok. Keimah bulpak in music ka duh tuk ruangah rualpi pawl thawn kan rak sak thok.
CW: Na hlaphuah hmaisabik le tu tiangih na phuah zo mi pawl teh..?
MTS: I Love Rock and Roll timi mirang hla kha “Mino rock and roll” tiah copy in ka rak phuah sal hmaisabik. Cumi hnu in own tune hlir keimah ten ka phuah. A zaten 50 hrawng cu ka phuah zo. Cumi lakah Pathian hla 20 hrawng, ram hla 15 hrawng le a dang cu Love song tla an si.
CW: Kawl hla lam the phuah/sak mi na nei zo maw..?
Kawl hla ka phuah hnuaihni ko. Kawl Pathian hla group album ah 1 ka sak zo ih, “Ni Ni lay hma” (Nai te ah) timi album a si. Culo cu group thotho in midang phuah mi pawl ka sak mi an um hnuaihni ko.
CW: Na CD album tuah hmaisabik ziang mi a si, ziangtik kumah?
MTS: “Duhdawt mi na hrang” timi ka suah hmaisabik ih 2000 kumah khan a si.
CW: Hi na hla suah hmaisabik nak tumah harsatnak na rak tawng maw?
MTS: Tha petu zohman an umlo tikah a har zet ko. Midang in stedio ah duty tampi an lak thei zet lai ah kei cu duty 2 lawng in a tum le a sak kha kan theh suak ih, a ol tuk lemlo. Tingtang in tumsak tu ka rualpi pawl tla duty daih aw lo zetin in tum sak ih, hngilh theilo nak thawn lungawithu ka sim duh. Cui ka rualpi pawl cu Johan, Pa Naing, Rajiv, Van Biak Lal, Biak Uk Mang, U-te pawl tla an si.
CW: CD album paziat na suah zo, group in teh?
MTS: Single album 3, “Duhdawtmi Na Hrang”, “ Menrihai ih Menrihai” le “Hla 13” timi pawl le group album pakhat “Nitlak” tla an si.
CW: VCD zuknung album ih na tel zo nak pawl teh?
MTS: 2004 YZTP, 2005 YZTP, 2006 Capcarkut(Tahan), 2006 ah Laihla Live Show, FBC mino pawlih “Dai Hnem”, 2007 FBCY Tin Jubilee, 2008 ah HBH(Hakka peng Haikawm), 2009 ah “Sakhan Nam” timi pawl ah an si.
CW: “Hla 13” album ih lead guitarist kha Chin mino pawlin theih an duh i, zo ha a si?
MTS: Tahan ih um, a hmin cu Than Thawng (Tthawnga) a si. Awnmawi lamih ka rualpi a si.
CW: Na album “Hla 13” kha nangmahte suah mi maw, asilole sponsor tu na nei maw..?
MTS: USA ih Zamtim Awnmawi group pawlih in rak suahsak mi a si. Kha mi laiah ting 12 hrawng an cem in ka thei. Guitarist Thawnga thawn arrangement tuah dingah vei 4 – 5 lai tawngaw in kan rak timlam nasa.
CW: CD/VCD thawn Chin hla suah tum mi, tuah rero lai mi na nei maw..?
MTS:Tu fang tuah rero lai mi ka nei ko. Tuah bet thei vivo hi ka saduhthah a si.
CW: Kawl hla lam teh hi CD/VCD thawn suah tumtahnak na nei maw..?
MTS: Tuah rero lai ka nei ko. Ka theh thei deuh hrih lo. Music lam cu 99%, “Hla 13” in tum sak tu pawl an si ko.
CW: Kan Chin hla pawl thangso sinsin ih suah thei dingah ziang kan tuah a tul tin na hmu?
MTS: Tanpitu(Sponsor) neih hi kan tul zetih, kan hla suah mi pawl theithiam zetih in leisak in tha in pe tu kan tul nasa in ka hmu.
CW: Kan Chin hlasak thiam lakah zo ih hla na ngai tambik, mirang hla ah teh?
MTS: Salai Tuan Ling Thang ih hla hi ka ngai tam zet. Mirang hla ahcun Gun & Roses band ih Exel Rose ih hla, Cinderella band pawlih hla ka uar bik.
CW: Lai rawl ah ziangmi na duh bik?
MTS: Sihmui!!
CW: Na tikcucan awl ah ziangmi na tuah tambik?
MTS: Hla ngai ringring tu hrangah cun tikcu awl ka thei aw lo.
CW: Thaisun ah na thi rori ding lo ti bang ta sehla vanram kai ding na zum aw maw..?
MTS: Zum aw tuk e.
CW: Na ngainat lo bik mi 2 le, na ngainat bik mi 2 ziang ha?
MTS: A tul lo tukih porh awk tuk le, a tullo tukih mi zuamtaih hi ka ngaina lo bik. Asinan, khat le khat theithiam awk le khat le khat tanrualnak hi ka ngaina bik.
CW: Poi na ti bik mi pakhat in sim thei pei maw..?
MTS: Sir aw dingih thil ka rak tuah sual pang mi hi poi ka ti bik.
CW: Na thinhar bik can?
MTS: Mi thinhar ka hmuh canah ka thin a har ve theu.
CW: Midang thawn hlasak tlang maw mahte ih hlasak hi nuam na ti sawn?
MTS: Mahte ih sak hi a phur a rit lo bik in ka ruat.
CW: Europe ramih Chin mi pawl hi ziangtin na hmu?
MTS: Chin mi pawl kan duhdaw aw zetin ka hmu.
CW: Leitlun Chin unau pawl hnenah ziangmi na cah duh?
MTS: Kan hla kan duhdawt ngaingai a si ahcun a thanso sinsin dan ding kan ngaihtuah sak awk a tul rori.
CW: Aih ka hngilh zik ee... Thir innpi thuahsarih ih khum ding Menrihai nu na sar ngah zo maw?
MTS: Tawh thawn ka hren khum zo. A hmin cu Sui Hlawn Sung Menrihai a si. Fanu te Ester Khrih Mi Za Lan timi kum 1 le hrek hman kan nei zo.
CW: A lo contact duhtu pawl hrangah ?
MTS: Ka email solomonmrh@gmail.com ah in contact thei ko.
CW: www.chinworld.info hi na rak zoh dah maw..?
MTS: Zoh tuk e. A tha zet ko. Chin mi in neih kan tul zet mi a si. In thathnem ter zetin ka hmu.
CW: Man lo zet cing ten hi zat tikcucan in pek ruangah kan lungawi.
MTS: Chin mi unau pawl thawn pehtlaihnak in pek ruangah kei khal ka lungawi nasa.
Sen Hngilh Piang | 