|
C = Chinworld K = Kimte
C: Na thuhla a tawi zawngin in sim thei pei maw?
K: Ka hmin cu Thawng Nei Kim ( Naw Phaw) a si ih Kimte tin in ko tam bik. KaPa hmin cu Sa Tin Ral, Khiangrawn khua suak a si. Ka nu hmin cu Naw Ye Ye, Karen miphun a si. U Nau suahpi 7 lakah a panganak ka si. Tu hi Indianapolis, Indiana State ah ka inn sungsang thawn kan um.
C: Tlawng na kai nak pawl teh?
K: Kan nauhak lai ihsin Karen ramah kan um tambik ih Phunhra cu Mawlamyiang in ka ong. Kum 1999 ah Far Eastern Fundamental School of Theology, Yangon in M.A (Ministry) ka theh. Kum 2004 ah International Theological Seminary, Los Angels, California, USA ah M.A in Theology ka theh sal.
C: USA na ra thlen dan teh?
K:Student visa in May 22, 2002 ah ka ra thleng.
C: A hlan le tu laifang ih USA danglam na ti mi a um maw?
K: Hlan deuh ahcun Chin mi kan rak mal ngaingai ih tu ahcun kan tam vivo thlang ruangah kan mai khua le ram (Laitlang thleng) vek a bang thlang.
C: Na hnatuannak lam teh in sim thei pei maw?
K: Exodus Refugee/Immigration.Inc timi leitlun ramtin ihsi ra thleng mi refugee pawl bawmnak zung ah Resettlement Coordinator ka tuan.
C: Ziang ti vekin Refugee pawl nan bawm theu?
K: Refugee Agency pakhat le khat a bangaw lo. A tlangpithu ih a bang aw mi cu refugee pakhat (nauhak, upa) in $425 voikhat an ngah. Bawmnak dang pawl hi cu a Agency ih zir in an dang aw. Kan nih Exodus cun cumi $425 kan pek theh hnu ah Match Grant timi paisa fai bawmnak kha a tling mi pawl kan pe. Cumi Match Grant ngah ding a tling lo pawl cu acozah hnen ihsin paisa fai bawmnak dang kan dil sak.
Refugee pakhat in a malbik thla 8 sung Medicaid timi sibawi hmuh theinak bawmnak an ngah ih Food Stamps timi rawl lei thei nak bawmnak kha hna an tuan hlan sung an ngah. Himi acozah bawmnak pawl hi thla 8 a kim hnu khalah an hlawh ngah mi zir in bawmnak an ngah vivo. Cun, Exodus cun refugee pakhat a ra thleng tikah a tul daan ih zir in inn kan san sak, hnatuan kan hawl sak, mirang ca zirnak kan neih sak, acozah bawmnak a phunphun kan hawl sak, hardamnak lam khal check-up kan tuah sak, a tul daan ih zir in sibawi hnenah kan hruai, USA ih umtudaan pawl zirnak(cultural orientation) kan neih sak, tlawngkai duh pawl kai thei nak dingah kan bawm.
C: Thlaziat sung nan bawm?
K: A tlangpithu in thla 6 sung a si.Thla 6 hnu khalah an tul dan ih zirin kan bawm vivo ko.
C: Nan umnak khuaah Refugee paziat an thleng zo.
K: Kum 2007 tiang tui ka tuannak ah mipum 400 hrawng an thleng zo ih 90% cu kawlram mi an si. Cumi lakah Chin mi an tambik ih 150 lenglo cu Thailand ihsi a ra mi Karen pawl an si.
C: Refugee pawl na hmuh hai tikah na thinlung sungih um mi teh?
K: Ka miphun pawl ih an harsat tuar mi ka theih tikah ka riah a sia ngaingai. Karen pawl tla cu in sim laiah an riah a sia tukih an mitthli a tla theu. Khatlam ahcun an harsatnak le hmailam ih an thanso thei nak hrang bawmtu ka si hi ka lungawi zet.
C: Refuegee pawl na bawm tikah tonglam harsatnak a um maw?
K: Ka Nu Karen a siih Karen pawl khal an mah vekin ka tong thei ko. Cun kan Chinmi pawl cun kan Chin tong (Falam) hi an thei theh ko. Pahnih khat a theilo tu le miphun dang pawl cu Kawltong in ka biak hai. Africa lam pawl cu mirang tong an thiam zet ih tong lam ahcun harsatnak ka nei lo.
C: Na hnatuan vek hi ngah a harzet an tiih laimi dang hnatuan pi teh na nei maw?
K: A hlan ahcun keimah lawng ka rak siih tu ahcun Falam 3 le Halkha pakhat thawn Laimi 4 in Pathian lamhruainak thawn hnatuan kan ngah thei. Midang pawl cu mi rang lawnglawng an si.
C: Refugee lam bawmnak hnatuan thei tu Chinmi dang teh an um maw?
K: Um tuk e. Pathian lamhruainak in kanmah Falam mi lawng hivek hnatuan thei tu ka thei. Health Department le welfare department ah an tuan.
C: Malaysia UNHCR zung vekin nan zung ah tonglettu nan nei ve maw?
K: Fulltime ih tonglettu cu kan nei lo nan, Parttime cun tampi an um ko.Duh can canah 24 hours sung kan ko thei.
C: Malaysia ih ra thleng zo pawl na hmuh dan?
K: Kan Falam mi ra thelng sun pawl cu an fel zet hai. Pathian an tihzah dan le miphun an duhdawt dan pawl ka hmuh tikah ka lungawi zet.Hnatuan tla an zuam zet ih a lungawi um ngaingai.
C: Indianpolis hi Refugee pawl umnak ah tha na ti maw??
K: Tha tuk e. Kan khua hi fate tuk lo tumtuk lo a siih a nuam tawk ciah.
Innsan man a awl ih hnatuan ngah le a awl fawn. Hlawhman le hmundang thawn a bang aw. kan umnak ih ra thawn tampi an um zo.
C: USA ih Fox 59 Tv, Indianapolis star, Nuvo news pawl ih kawlram le Refugee thu pawl na sim mi kan rak hmu ih a dang teh a um lai maw?
K: Aw, um ee...kwekalu.net timi Karen website ah kartin deuhthaw an suah theu. Adang Kawlram le Refugee thusim can ka nei ringring ko. USA cozah zung phunphun, Phunsang tlawng pawl, Middle/ high school pawl le sizung pawl ah tla in kawh can ah ka nei ringring ko. Tuikum April thla sung ah tla Indiana State Govenor, Mitch Daniels hmai ah thurelnak ka nei ding ih kan Kawlram thu le refugee pawl thu ka rel tum nasa.
C: Refugee ngah cia zo pawl nan hnen USA ra thleng thei dingin bawm thei dan a um maw?
K: Tampi a um ko. A hnuai ih ka Email le Adress ah thuhla in rak sut thei ringring.
C: USA ra thleng ding pawl hrangah thucah duh mi na nei maw?
K: Mirang tong kha a cang thei tawkin rak zir cia ding.USA thlen tikah hnatuan lawng ruat lo in fimthiamnak lam hawl tum seh la. USA cu hnatuan phah in tlawngkai a theih. Sum le pai nei lo khalin tlawngkai dan lamzin tampi a um.
C: Kan Chin mi nan hnen ra duh pawl hrang na Adress pek a ngah maw?
K: Ngah tuk e. Lo bawm thei mi a um ahcun ka man ringring timi ka rel duh bet.
C: Kan Chin mi pawl hnenah thucah duh mi na nei maw?
K: Aw...Exodus, kan zung thu nan thei duh bet mi a um le exoudsrefugee.org timi website ah tla nan rak siar thei. Kan ram le kan miphun pawl hrangah tla ka ti thei tawk in ka tuan ve ding timi ka lo thei ter duh.
C: Na Adress in sim thei pei maw?
K:Thei tuk e.
Naw Phaw (Kimte)
504 Buffalo Ridge Circle,
Indianapolis, IN46227
nawphaw@exodusrefugee.org
C: Thinsau ten thu kan lo sut mi pawl in sim ih kan lungawi.
K: Kei khal ka lungawi. | 
