|
1971 February 23 ah Falam Peng Van Niam khua ih suak ka si. Ka nu le pa tla cu Pu Thang Hlei le Pi Saw Cuai an siih, 1974 in Kalaymyo bial, Chawng Khuah ah vai in tui ni tiang kan um.
Kum note lai na bang ih, innsungsang na nei zo maw?
Nupi ka nei ko. Ka nupi hmin cu Kyu Kyu Win@ Za Dim Tian a si. Tahan- Sanmyo Phungki tlawng kawtka Omega Beaty Parlour ah a um. Pathian laksawng fanu pahnih Hanah Cer Dim Par,8 le Abishag Saw Dim Tial,5 mi tla kan nei zo.
Tlawng na rak kai dah nak pawl le a tu na zir rero mi pawl in sim thei pei maw..?
1988 ah Natchaung, Kalaymyo in phun 10 ka ong. 1989 ihsin 1993 tiang ZTC, Falam ah B.th ka kai. 1994 ihsin 1997 tiang MIT, Insein-Yangon ah M.div ka kai. Kum 2000 ah Yangon ihsin distance learning in B.A ka theh. 1995 – 97 tiang S.Korea ram Torch Trinity, Seoul ihsin Th.m ( O.T ) ka zirsuak ih, 2007 October ni 1 ihsin University of Gloucestershire, Cheltenham, England ramah Ph.D ( O.T ) ka zir thok. Kum 3 sungih theh suak thei ka beisei.
Sayapa, na kum a no zet lai fawn ih a tu vek
Ph.D zir thei dingah ziagtivekin ca na rak zuam..? Mino pawl ih zohthim dingah in sim thei pei maw..?
Si, hmuitin sang zet ka neih ruangah ca ka rak zuam ih Pathian khalin cinken theinak in pek ruangah B.th, M.div ka zir lai ah kan tlawngah a pakhatnak ka rak ngah. S.Korea ih Th.m ka zirnak khalah International Studens Academic Award ka rak ngah dah. Zan nazi 7:30 in zianglam 1:00 am tiang ca ka zoh theu. Tlawngkai bet vio duh hrangah cazoh can Time table tuah a tha zet. Korea ih tlawngta laksawng ka ngah ruangah England ramih Ph.D ka peh theinak ding hrang in bawmtu thazet pakhat a si.
Pathian hna na rak tuan dah nak pawl teh?
1993 ihsin Chaung Khuah ah Pastor hna ka rak tuan thok. 1997 ihsi ZTC,Falam ah Bible tlawngsaya ka tuan ih tu ni tiang a si ko.
Chin mi pum huap Bible tlawng kan neih mi ZTC hrangah ziangvek sunmang na nei?
ZTC ah M.th tiang zirhnak nei thei sehla ka duh zet. Cun, tlawngta pawlin computer hi pakhat ciar a si lo hmanah mi pathum in computer pakhat tal hmang tlang thei sehla, Library hrang khalah electronic system tiang hmang thei sehla tihi ka duhthusam le sunmang a si.
7. Tui dinhmun ah ZTC Bible tlawng in ziang mi nan tulsam bik tiah na hmu?
Tui kan tulbik mi cu Computer a tam thei tawk, cun Printer 2-3 tal nei thei sehla, hi hlei ah Photo copy machine tam sin neih thei ding kan tul zet. Curuangah ramleng ih um u le nau pawl khalin himi hrangah thei tawk suah ih tan in lak pi cio ding ka lo sawm duh hai fawn.
ZTC Bible tlawngah tui ni tiang degree ngah zo paziat an um ?
A hnuai lam ih ta vek hin a si ko.
Diploma - 242 graduate since 1953
B.th - 369 since 1983
B.R.E - 95 since 1991
B.min - 23 since 1997
M.div - 19 since 2002
Tu na kai mi Ph.D na theh tikah ziang tuan tumtah mi na nei?
England ihsi tlawng ka theh tikah ZTC ih kirsal ka tum. Bible tlawng thuhla ah kawlram/lairam sung Bible tlawng pawlah visiting feh thei sehla, Seminary le professor base in graduate research degree tuah thei sehla, Bible tlawng saya pawl O.T ( Biblical line ) lam thaa pek sehla ka duh. Ziangah tile himi lam a zir kan mal tuk lai.
Ramleng thleng Chin miphun pawl ziangtin na hmu? Ziangtin thapek na duh?
Ziangkim ah nan advance cia nasa in ka hmu. Asinan, Laitlang khawte ihsi direct ih ramleng ra thleng le khawpi sungih umcia pawl ramleng ih ra thleng hi nan thlau aw zet ruangah kaihhruai awk nak lamah nan harsa zet ding tiah ka hmu. Cun, ziangkim anhai loih nan ngah thei ruangah mah sinak, inn lamih harsat dan theihhngilh tiang nan suak ding ka phang zet. Ram tha ah nan thleng ih kan lairam hrangah le kan miphun hrangah hna nasazet nan tuan ding khal ka lo forh duh.
Chinworld.info hi ziangtin na hmu?
Kan miphun in kan tul zet mi Chin media pitling pakhat nan tuah suak thei cu ka lo fak zet hai. Kan miphun in kan tangkai pi zet lai ding tiah ka zum. Zuam sinsin uh.
Hi zat ticucan in pek thei ruangah kan lungawi zet a si.
Kei khal ka lungawi. | 
