|
Henry VL Hmangaih
"Hngaktah cawisangtu" timi Pathian hla VCD a suah ruangah Chin mipi pawlin a thuhla an theih cak zet mi Henry VL Hmangaih cu Chinworld in hmaiton thusuhnak kan nei ih a tanglam ah rak siar aw...
CW: : Na hmin ngai, na suahnak khua, na nu le pai hmin pawl in sim thei pei maw..?
Henry: :Ka hmin pum hi Henry Van Lal Hmangaih a si ih Henry VL Hmangaih ti’n ka ngan t’heu. Ka suahnak khua cu Phunte, Falam district, Chin State a si. Ka pai hmin No Thang a si ih ka nui hmin cu T’ha Cuai a si.
CW: :Fimthiam zirnak lamah ziang tiang na thleng?
Henry: :Kum 2000 ah khan Govt Champhai High School, Champhai, Mizoram State, India ah phun 10 ka t’heh. Cun, 2004 ah Biblical School of Theology (BST), Rangon in B.Th ka t’heh sal. A tu hi Asian Theological Seminary (ATS), Philippine ah M.Div ka kai rero laifang a si.
CW: :Ziangtik ihsin Pathian lamah nun thar nak na nei thok? Ziangruang bikah timi na thuanthu tawi in sim thei pei maw..?
Henry: :Nauhakte ka si lai ihsin Pathianthu hi cu ka rak duh cia. Asinan, ka thih tikah Vanram ka thleng ding tiih za ah za ka fengnak cu ka kum 17 ah a si. Vawn rel ding ciam co tla ka thei lo, Pathianthu ih ka ti a hal tuk ruangah Pathian thuzirnak le Crusade nak ka kai bannak kipah ka kai t’heu. Cutin, a zangfahnak thunung cu ka nunnakin a theifiang ih inrundamtu Zesu cu zumnakin ka co hlang. Cutin a dungthluntu dingah in ser cih.
CW: :Music (awnmawi) lamih na tui thok dan, cun.. ziangtikin hla na rak sak thawk?
Henry: :Awnmawi lamah hin ka nauhak laiin ka rak tuituk zo nan ka pitlinnak hmun le ram a rak tet tuk ruangah tu tiang music ah ka hnufual deuh lai. Ka theihsual lo len hla hi kum 6 ka si hrawngin ka rak sak thawk.
CW: :Hlasak/zai zuamawknak vekah teh na tel in laksawng lakmi na nei dah maw?
Henry: :Aw. Pathian duhsaknak in 2000 kum thok pek ah khan Champhai Vengthlang Presbyterian Kohhran pastor bial senior department zai zuamawknak ah Champhai Electric Presterian Kohhran hminin Champhai Venglai Kohhranah kan zuamaw aw ih cunah, Laksawng Pahnihnak (2) ka rak ngah ve.
CW: :Hla hi fing ziat hrawng na phuah zo?
Henry: :Chin hla le mizo hla thawi kawm cun fing sawmthum kiangkap hrawng a si ding.
CW: :Na khui suah hmaisabik mi, ziangtik kumah ziangti vekin na rak tawlrel timi le a tui na VCD album thuhla in sim thei pei maw..?
Henry: :Kum 2004, April ni 12 ah kan Album hmaisabik “No Lai Can” timi kha ka rualpipawl “Amazing Ligh” thawn Pu Van Lal Sum (Tahan B) le Rev. Hlawn Kip Thuan (Taungphila) tei sponsornak in kan rak suah thei.
Tui a neta ‘Hngaktah Cawisangtu’ timi hi cu keimah lawng in khuiah cun ka sak. Pastor tuan phah cingih tuah ka si ruangah can le tikcu bicilh zet lakah, ka memberpawl le kohhran ih thlacamsaknak thawn cutin ka Pa “No Thang” hngihlonak ah kan sungkua ih kan suah mi a si. Ka VCD ah cun keimah lawng si lovin, “Amazing Light” ka rualpipawl thawn Kan rawngbawl pehzawm nakah ti’n kan zaihkhawm.
CW: :Pathian hnatuannak dang...eg. crusade ..etc., asilole Pathian hnatuan in na vak dah maw..?
Henry: :Si e, Pathian in a hnatuannak hruangsungah kum 2004 ih si khan in telter ve ih kumhnih missionary in Paletwa district-Rakanah Pathian hna ka tuan, Cumi thehah Champhai, Mizoram State, India ah pastor in kumhnih le hrek ka um. Pathian thlarau lamhruainak zarah Crusade le camping khal ka nei theu.
CW: :Pathian rawngbawlnak ih har na ti bik mi..?
Henry: :Ka innsang nu, ka nupi Lydia Ram Lawng Thluai (Ramte) in kan mission field ih in thihsan kha ka rawngbawlnak le hmuhton mi ahcun a har ka ti bik mi a si. Culo cu har ti bik rel ding ka thei lo. Ziangvek can khalah Bawipa thaw cun a hnatuan hi a nuambik ko ti ah tui ni tiang ahcun ka sir aw lo zet.
CW: :CD/VCD dang tawlrel rero mi, suah bet tum mi na nei maw..?
Henry: :Tawlrel hran cu ka nei thei hrih lo. Amahlawngte ka theitawkin hla le zai lam cu hinah khalah ka peh vivo ko. Suahsaktu vektla hi cu um seh la sak ding in ka tiar aw ringring ko. Pathian in can tha in pek a si ahcun Kan Falam le Tahan lawng siloin kan chinland le mizoram lam tiang khal hla ih hrut thei ding hi ka vision pakhat lakih tel mi a si.
CW: :Tui na VCD "Hngaktah cawisangtu" timi hi leitlun ram dangdangih Chin mipi pawlin an ngai khawp theilo cu a si ih, himi hi nangmai phuah mi hla pawl maw an si, asilole midang phuah mi na sak? Cun, lemcangtu pawl hi zozo nan si..? Khui tawk hmunah?
Henry: :Aw si ngai ka lungawi tuk. Tui ka VCD sungah hin cun ka phuah mi cu “ Ka Nu ka Pa” ti mi lawng hi a si. Cun, ‘Hngaktah cawisangtu’ hi salai Hrin Dai Lo ih phuahmi a si. A hla thu hi a t’ha ka ti men lawng siloin kei mai nun zalamtluan thawi kaih aw tuk mi a si ruangah a hnenah ka dilih cutin ka Album cover ih ka hmannak san a si. Cun, Hla tambik in phuahsaktu hi Sayamah Dorcas Lal Biak Eng, kan nunau singer ka uarzetmi pakhat ih in phuahsak mipawl an si. Cun ka rawngbawlpi Evan Lal Tan Pui ih in phuahsakmi tla ka sak tel. Culo cu, Amazing Light ka rualpipawl thawi kan phuahmi an si. Lem a cangtu pawl hi Amazing Light, Vapual Luaithli khui sungta, ka unau le ka tu le pawl an si. Cun zuk kan zuknak pawl hi Mizoram Champhai, Aizawl, Rangon, Tahan le a kiangkap khua pawl ah an si.
CW: :Lai rawl ah ziangmi na duh bik?
Henry: :Laitisawp le bete suanpawlh rori kha si. Ka vun ruah men hmanah ka cil ka volh khulhkho a si si maw a… ka ngai ruangro ko kan Laitisawp!!
CW: :Ee, ka lo sut hngilh zik te, a hna na tuanpi tu ding Pathian in a lo pe zo maw..?
Henry: :Aw si ngai ti aw. kum 2004, feb ni 23 ah khan Sayamah Lydia Ram Lawng Thluai (Ramte), kan theih ol nak dingin sim sehla, Sayamah Far Men par ih nau thawn Letpanchaung Revival Baptist Church ah kan nei aw. Cutin, Kum 2005, Thlanglam laitlang- paletwa district ih Pathian hna kan t’uanlaiah, Typhoid malaria, le Kailengna in kan tum Van nuamah in tlunsan a si. A tu cu Hnakruh ka nei nawn hrih lo.
Cutin, kum le can a her liam vivo vekin Pathian in bawmtu dingah in peksalmi a si ko ding tiih lungsung te’i pai hlenhli mi cu ka nei ko nan, a can a kim hlan cu ka lo ruah/hlawm hrih lo mei ke…. Hehehe…fiang pam ko lo som.
CW: :Kan laimi Pathian hlasak tu pawl lakah zo ih hla na ngai tam bik?
Henry: :Oh a…Vawn rel hleice ding khal ka thei mai lo a. An thiam ka ti in kan laihla khui pawl hi ka ngai khawp thei lo.
CW: :Chin Hla, VCD le Awnmawi pawl a thansoh theinak dingah ziang tuah kan tul tin na ruat?
Henry: :(1) Awnmawi (misics) –Guitar, Piano, Violin, Keyboard, notes tvk pawl - tum thei ding le siar thei dingah nasa ngaingai in mino tampi in kan zir tengteng a tul. Hinah Philippine ka ra thlen ih ka hmuh mi pakhat cu an nih cu nauhak kum 6-7 ihsin hlasak le music nasa tukin an rak zirh aw zo. Curuangah zai le hlasak an thiam in an lakih hlasak cun thiamlo khalen ka zaithiam pam ti awk a awl te. Cuvekin, hlasak dan –Vocal lam khal hi nasa takin a zir rori ih kan zir a tul.
(2). Nu le pa in kan fanu kan fapa music le zaihla lam an ngaina a si phawt ahcun an nauhak lai ihsin nasa takin duhsak hna thiam seh la, kan chin mi hi kan aw a mawiin a tha tuk. Kan zir lo le kan pekawk lo hi kan niamnak san a si.
(3). Cangthei sela cu kan Chin phunpi huap zai zuawmawknak gospel le love song, chin idol tivek hawlnak tla hi a nei deuh ramleng le ramsung um pawlin sumpai lam thawn t’ang khawm in tuah thei sehla, cutin kan music le kan zaihla cu ni bang lairamah tlang in a parsuak sinsin ding.
(4). U le deuh, khaw awng tawng hmaisa deuh pawl hin nau le sawmsuah dan thiam tum vivo seh la, cun, mipi lam khalin kan laihla ngainatnak le upatnak, midang bawmduhnak thinlung hi nei peh vivo seh la cutin kan lairam kan hla thawn kan thuam mawisal thei ding.
CW: :Leitlun Chin mipi pawl hnenih na thu cah duh mi?
Henry: :(1) Khawihmun le ram kan thlen khal len Pathian( in tungdingtu) hi thei in tihzah ringring ding ka fawrh aw duh.
(2). Taimaknak le fimthiamnak uarin, kan ram le miphun hrangah rolung phum tum, zahpilo le hngilh lo ding.
(3) Mi bawm theitu kan si ceng lolen mirelsetu le mizuartu si cio lo dingah
(4) Amawimi ziaza le nungcang kha khawikip khalah uar tlang seh la.
CW: : A lo contact duhtu hrangah na address...
Henry: :Henry Vl Hmangaih,
99A Dangay Street
Project 7, veterance village
Quezon city, Philippines
Ph-00639297848814
CW: :Hizat tikcu can in pek ruangah kan lungawi zet.
Henry: :Kei tla ka lungawi.
| 