|
Mai Far Men Par Hmaiton thusuhnak
 Kan Chin mi lakih Pathian hlamawi CD a phunphun sak tu le India ram ah a aw zaihla hmangih Pathian hnatuannak a nei rero tu Mai Far Men Par cu Chinworld in a thlennak inn ah va lengin hmaiton thusuahnak kan nei i.....
01. Na hmin ngai, na suahnak khua, na nu le pa u le nau pawl in sim thei pei maw..?
Ans: Ka hmin cu Mai Far Men Par. Ka pa hmin Upa Run Hlei Khar, ka nu hmin cu Bil Nei Thluai. Ka suahnak khua cu Sim Dihai. Fapa 1 Samuel Sui Za Lan Bia (Zaza) le fanu Lydia Van Lian Par (Boihboih) ka nei . Kan unau lak ih nung dam 7 kan si.
02. Ziangtik ah na rak Piangthar thok? Na pianthar kum le pianthar dan thuhla tawi in sim thei pei maw..?
Ans: March 4, 1988 ah ka piangthar.
03. Ziangtik kumin Pathian hla na rak sak thok ih, ziangmi Pathian hla CD/Tape na rak suah thok.? Zo nih an lo suahsak hmaisak bik, a CD/tape hmin in sim thei pei maw..?
Ans: Tape ka thun hmaisa bik cu 'Lungte cu au hlah seh' timi a si ih, 1992 ah ka thun. I suah saktu cu Pa No Kap (L) le Nu Man Nei Awi an si.
04. Khui tawk ah zo thawn, Crusade nan rak tuah hmaisabik/na tel hmaisa bik? Na hlasak nak ruangah piangthar phah an um maw..?
Ans: Kum 1992 ah Saya Mang Sum thawn Zonuam khua ah Crusade kan rak nei. Ka hla sak ruangah thatte khan/thangzang ka ngah titu an um ko. Ziang hla bik ti cu a um cuang lo.
05. Na hla hrekkhat ah "Pathian ih in pek mi ka aw hi amah thangthat nak lawngah ka hmang ding" tiah na sak ih, ziangtik tiang Pathian hlasak/CD thun na tum?
Ans: I rundamtu Jesuh kutnem ka kaih tiang amah thangthatnak hla ka sak ding.
06. A tu tiang Pathian hla CD/Tape paziat na suah zo? An hmin pawl le na suah kum pawl in sim thei pei maw..?
Ans: Album 16 ka thun zo. An hmin le in suahsaktu pawl tla cu.
01. 'Lungte cu Au hlah seh' - 92 Suahtu: No Kap (L) le Nu. Man Nei Awi
02. 'Amen Rawng tum Aw'(Silas Ren thawn)-93 Biak Hlei Thang & Nu ~uan Nei Thluai
03. ' Bawipa cu keimah kiltu asi'-94 Dr. Sui Lian Mang & Aizawl (LCF zumtu)
04. ' Bethlehem Arsi' – 97 Pastor Sui Nei Piang
05. ' Ka Aw Zaihla Hmang In'-97 Dr. Sui Lian Mang
06. ' Van Cung Member' – 2001 Pu. Khen Hai Family
07. ' Bawipa Luang awi zawng raithawinak'-2001 Rev. Lal Nei Thang
08. ' Cung Sang Run Nuam'(naule 2 thawn)- 2004 Biak Lawm Zual & Lal Rem Lian tei sung
09. ' Then Lonak Khawpi'- 2005 Pa. Run Hlei Sum (Zazapa)
10. 'Khawhar hla'- 2002 Sayakyi Cong Luai
11. ' Van Thlarau Thianghlim'-2006 C2M2
12. ' Bawipa Loram' – 2006 Falam Baptist Church (Maryland-USA)
13. ' Van Cung Member – II – 2007 Pa. Khen Hai Family
14. ' A thiang Thlarau In – 2004 Evan. Kham Bawi
15. 'Thlarau Dei Ar - 2004 Nu. Leng Vang
16. Kross Pu in – 2008 Rev. Silas Hrang Lung tei sung
Himi lo midang thawn sakmi khal 3 lai a um.
07. Pathian hna na tuannak ah ziangmi hi harsa na ti bik? A lo dawnkham tu bik in sim thei pei maw..? cumi cu ziangtin na neh suak thei theu.?
Ans: Hnatuanpi thawn lungrual lo ih hnatuan hi har ka ti bik. (dawn khamtu hram an um lo)
08. Na lungawibik can teh?
Ans: Leitlun `ah le buainak lak ihsin tui ni tiang PT thangthat thei ih ka um hi ka lung awi bik.
09. Pathianthu lamah na thlarau nun lo cawmtu le na nun lo kaihruaitu bikih na ruah mi Pastor lole hruaitu an um maw..?
Ans: Ka nu in ka naute lai ihsin hla in inrak awi ih, kum 8 ka ti in Biak inn ah hla sak ka rak thok. Ka nu vek ih hla sak thei si hi ka rak duh zet. PT lam hruainak le ka nu le pa thlacamnak ruang ah nauhak Sunday School ka kai lai khal ah hla sak ka rak paih zet ih.......... a mah thangthatnak hla ka sak hi thlarau nun ih i cawmtu bik pakhat a si ve. Tha pe tu an tampi ih, a hleice in ka nauhak lai ihsin Pathian hla sak ding ih tha i petu bik cu Pastor Kham Lian Kap le a nupi, Silas Ren pawl an si.
10. Ramdang ah Pathian rawngbawl in vei ziat na feh dah zo? Na hmuhton mi pawl in sim thei pei maw..?
Ans: Ramdang hranpa um lo. Asinan Mizoram khawpi pawl ahcun kum ti'n hla ih rawngbawlnak ka nei. Atu hi Delhi ah rawngbawl in ka um. Ka thlennak hmun kip ah Laimi in khawmnak kan neih thei hi ka hmuh tik ah thazang ka ngah zet. Ahleice in Delhi vek ah khawm awknak kan neih thei cu ropi ka ti zet.
11. Pathian zaihla hi fing ziangzat na phuah zo?
Ans: Phuahmi ka nei lo nan, a phuahtu pawl hnen ah ka lungthin suak thu ih ka sim mi a um. Ahleice in ka pa le ka nau le in mual in liam san tum ah hla phuahtu hnen ah simmi ka nei.
12. "Pathian hnatuan hi ka bansan ding" ti tiangih beidon can teh na nei dah maw..?
Ans: Beidon can cu a tam tuk ko nan PT ke hram ah ka kun tam deuh deuh. Ka beidon can ah PT thawn kan naih aw sinsin. A hnatuan ban san ding cu ka ruat dah lo.
13. Album thar, hla thar suah ding tawlrel mi teh na nei maw..?
Ans: Aw,nei ee. Atu hi kan timlam rero lai a si. Thlacamnak thawn in bawm cio ding ah zangfah ka lo dil duh.
14. Laica siar teh hi na paih zawng a si ve maw?
Ans: Paih tuk ee, Mah Lai ca tete.
15. Na aw khum hmaisa bik in neta bik tiang ih na tawn mi harsatnak le lungawinak in sim thei pei maw?
Ans: Music ka thei lo mi har ka ti. Ka nu le pa in album hmaisabik aw thun ding ih ka feh zawng ah ka lu parah an kut suang in thla in cam sak ih kan inn in ka pok suak. Sim Dihai ih busul le kohhol ei in ka pok suak. Kan khua ahcun mino khawm zan (nilai zan) lawng ah electric guitar tum a si.Cumi dinhmun ihsin Rangoon khawpi Lynn Studio ih ka lut hi cu a ol lo nasa. A/C room sung ih um khal ka taksa in a tuar lo. Cu pawl cu ka harsatnak an si.
Ka lungawinak cu, cu mi dinhmun karlak ah nu le pa, u le nau, sung le khat, zumtu pawl ih thlacamnak ruang ah tluang te'n kan thun suak thei. Album hmaisa bik kha nazi 7 – 11 lak ah ka thun `heh thei. Cu tluk ih music thei lo va si hman ningna Album 16 tiang thun thei ding ih lam i hruaitu PT par ah lungawinak sim cawk lo ka nei.
16.Chin mi pawl hrangah Pathian thu lamin siseh, miphun lamin siseh thutawi cah duh mi na nei asile...?
Ans: 1) Kan fehnak kip ah PT thu ih um.
2) Lungrual tak ih hna tuan tlang ding
3) Tlin lonak relse aw lo in hup sak awk thiam ding
17. Chinworld thawn ton awknak can tha in pek ruangah lungawinak tampi kan nei.
Ans: Kei khal ka lungawi.
|
