|
T : Bulpak thuhla tawi in thawk mai sehla.
S : Laitlang ih ka suahkehnak cu Selawn khua a si. 1964 Jan. ni 4 niah ka suak. Asinan ka nauhak laite ihsin Lairawn ih kan vaih ruangah ka pitlinnak cu Minhla a si. Tu cu Taungphila ah kan um. Ka nu le pa cu Pu Khaw Tin Thang le Pi Lian Nei Par an si. Unau 8 kan si ih 7 nungdamin kan um. Kan unau lakah upa bik ka si.
T : Na innsang thuhla teh?
S : Ka innsangnui' hmin cu Pi Ngam Nei Tial a si. 1988 Jun. 18 ah kan neiaw. Pathian rawngbawlnak lamah kan lung a rual zetih ka tlawnnak kip khalah a cang thei tawkin i thlun theu. Ka duhdawt zetih anih khalin i duhdawt zet.
Pathian hnenah fanau neih hi vawi tampi kan nupa in kan rak dil theu nan Pathian remruat a si lo a si ding, tu tiang Pathian in fate in pe lo. 1997 ihsin Pathian in fate dil nawn hlah hai seh tiin fate nei thei nawn lo dingin in tuah. Fanau neih hi kan duh lo cu a si lo nan Pathian ih in pek lo tikah himi ruangah kan nupa karlakah buainak zianghman a um lo. Kan duhdawtawknak khal a mal phah cuang lo. Pathian in kan hrangih tha bikin rem in ruatsak tiin thlacamnak thawn kan pawm thei.
T : Innsangnu thawi nan tawnawk dan thu tawi teh in sim thei kem?
S : Pathian hnenah, "Nupi tha le fel, rawngbawlnak ih in bawm theitu in pe aw," tiin kum 2 sung rori ka rak dil ve. Kum 2 a rei hnuah Pathian in in pe.
Kawhhran khat (Revival Baptist Church of Myanmar) kan si ih thinlung taktei' kan tawnawknak cu FalamTown Hall ih crusade kan tuah tumah a si. Kei a parah hla ka sakih anih tlar hmaisa bikah a to. Ka vun zoh cu kan mit le mit a tawngaw dukdi ih ka zam thluh zik, ka hlasak hmuah ka hngilh thluh zik leuleu. Cuti'n kan nelaw vivo ih nupi dingih ka dil tikah anih khalin rem a ti ve.
Duhawk ciamco le lenawk ciamco a um lo nan Pathian in ka thlacamnak in hlawhtlingter rori ti hi ka zum hnget a si. Curuangah Pathian thu ka simnakah, "Nupi/pasal neih hi hmanhmawh ciamco a tul lem lo, hmanhmawh tuk le a sual thei. A thupi bik cu Pathian hnenah thinlung takte'n thlacamin dil sehla a tikcute ah Pathian in in pe ma," tiin ka sim theu. (Capoh in a tikcu ah anmahte an rung ril kiarko mai, ka ti theu).
T : Na pianthar kum?
S : Rev. Biak Lian ih thusimnak thawn 1983 kumah piantharnak ka co ngah ve.
T : Pathian rawng na bawl dan thu tlangpi tla theih kan duh hrih?
S : Ka pianthar vete'n 1983 ihsin mahte ka ti thei tawkin Pathian rawng cu ka bawl thawk rero zo. Asinan sumpai hawl phah, rawngbawl phah tivekin a si. Full-time ih Pathian rawng ka bawl thawknak cu 1987 kum ihsin a si. Revival Baptist Church ah kum 12 sung Tahan, Aung Thitsar (Kalay) le LCF Aizawl pawlah pastor ka rak tuan. Kum 2000 ihsin pastor tuan nawn loin Evangelist dinhmunin rawng ka bawl.
T : Khuitawkah crusade na tuah hmaisa bik?
S : Crusade ka tuah hmaisat biknak cu Falam Khawpi ah a si.
T : Na thusimnakih piangthar hmaisa bik teh zo a si?
S : Mai Siang Tial (Pu Thang Ling ih fa) a si. A pianthar hnu-ah Yangon FEFST (Pu Thawm Luai tlawng) ah Bible tlawng tla a kai, a theh hnu-ah zirhtu tla a tuan rero. Asinan, tu cu New Delhi lamah a um zo hmang.
T : Crusade na tuah tamnak bik hmun le ram?
S : Crusade hi hmun tin ram tinah, in sawmtu le kawhnak pohah fehin ka tuah vivo. Asinan, ka tuah tamnak bik cu a tlangpi thuin, Lairawn (Tahan kiangkap), Laitlang ah Falam peng, Hakha peng le Mizoram pawl an si deuh bik.
T : Rev. (Pastor) tiih kawh maw Evan. tiih kawh na duh deuh?
S : RBCM in pastor ka tuan hnu kum 6 ah Rev. in pe. Ziangti' in kawh khalle a pawi cuang lo nan keimai' bulpak cun, ka rawngbawlnak ngaingai le ka pumpekawknak ngaingai khal Evan. a si tikah "Evan." tiih kawh hi ka duh deuh.
T : Pastor kum 12 tha lai na tuan hnu ah ziangruang bikah Evan. dinhmun na hril sal?
S : Pastor tuan hi ka thiam zawng, ka hna le ka tuan ding a si ngaingai lo deuh hmang ti'n ka ruat. Pathian ih in pek mi thlarau thilpek (talent) ka co mi diktak cu Pastor hnakin Evangelist a si tiih ka theih feng ruangah Kawhhran hnenah ka dil. Kawhhran in in sian ruangah tuisun ni tiang Evan. dinhmun ih rawng ka bawlnak a si.
T : Rawngbawlnakah ziangha har na ti zet theu mi?
S : Harsatnak cu tampi ka tawng theu ko nan minung kan si vekin hnipuan le sumpai neih lo can hi har ka ti zet theu.
T : Na lungawi bik can teh?
S : Pathian Thuthang Tha ka simnak ihsin Bawi Jesuh hi Bawi le Rundamtu ih pawmtu, piantharnak cotu ka hmuh tlukih lungawinak hi a um ka zum lo. A hleicein Dr. Za Hlei Thang, tvk le ka seherh zet mi ka rualpi tha, tvk an pianthar tikah ka lungawinak a hleice cuang a bang.
T : Pathian thu lamah na thlarau nun lo cawmtu le na nun lo kaihruaitu bikih na ruah mi Pastor lole hruaitu teh an um maw?
S : Midang tampi hnenin thazang ka ngah cio ko nan Dr. Timothy Sui Lian Mang hi in kaihruaitu bik le thlarau nun lamih in cawmtu a si deuh bik ding.
T : Midang thawi kawmawih rawngbawl tlangnak nan neih mi teh a um pang maw?
S : Jan 2, 2007 ah ka rawngbawlpi 4: Evan. Lal Tai Lo, Evan. Thawng Dam, Evan. Ngun Nei Mang le Evan. Lal Hram Piang pawl thawn "Revival Evangelistic Team (RET)" ti'n kan din. Kawhhran dangdang Baptist, IPCM le RBCM tla kan si. Kan tumtah mi bik cu, "Miin in sawmlonak hmun khalih Pathian Thuthang Tha sim vivo," hi a si.
T : Ramdang ih crusade na tuah dahnak pawl teh?
S : India hi ramdang cu a si ko nan kan Chinmi dinhmun ah ramdang lo vek a si tikah ramdang ngaingai ih crusade ka tuahnak cu tui' tum Malaysia le Singapore (Jan & Feb, 2008) hi a hmaisa bik a si. Hi vekih tuah theinak in petu Pathian le hruaitu, bawmtu pawl par khalah lungawi thu ka sim a si.
T : Ramdang (Malaysia le Singapore) crusade na tuahnakih na hmuhtawn mi?
S : Rel ding tampi a um ding nan, pakhatte rel ka duh mi cu: Malaysia ih um pawl cu a tlangpi thuin tihphang nain an khawsa ih zang an fak tuk lawmam. "Hi vek hnak cun ra tlung sal thluh uh," ti tiangin ka cah rero hai. Cu vek dinhmun an si tikah Pathian Thu halnak khal an nei tiatia. An zate a si lo hmanah Pathian Thu an halin an cak zet hai ti'n ka hmu. Malaysia Laimi pawlih dinhmun khi cu riahsiatza ngaingai a si. Mi tampi cu hnatuan nei loih vakvai an si fawn.
Singapore cu a ram a nuam, a thiangfai zet. Singapore ih Laimi pawl khal mah le hnatuan ih buai cio an si. Nunau hnatuan zate deuhthawin hnenum an si deuh hmang. Curuangah duh tiktikah an suak thei lo. Asinan, a tlangpi thuin ka zoh tikah Malaysia hnak cun Pathian Thu halnak an nei mal deuh hmang ka ti. Anmahte'n an hna a ngam tawk deuh hmang.
T : Awnmawi lamah lut sehla, zaihla hi fing ziat hrawng na phuah zo?
S : Zaihla hi fing 205 Pathian zarah ka phuah ve zo. Cumi lakah ramhla 2 le mithi ngainak hla 5 tha hrawng an tel ih a dang hmuah cu Pathian thangthatnak hla an si.
T : Hla na phuah tikah a thluk maw a hlathu na tuah hmaisa deuh?
S : A tlangpi thu cun a thluk ka tuah hmaisa deuh theu. A hlathu tuah hmaisa ih a thluk ka bun mi khal cu pahnihkhat um ve hman sehla, a tlangpi cun a thluk ka tuah hnuah a hlathu ka tuah theu.
T : "Bungbel Thianghlim," "Zion Thlennak Lawngpi," "Bawipai' hnen ahcun…," "Bawipai' tuu rual tla thinphang hlah uh, tvk.," thangphawknak le thlarau thazang laknakih kan hman rero mi hla tampi na phuah sikhawh, (kei tla cun "Bungbel Thianghlim" hi ka duh zet). Na hlaphuah mi lakih na duh bik mi lole na nun lo ciahnehtu bik hi ziang hla ha a si ding?
S: Pathian ih in pek mi hla pawl hi ka duh theh hai. Asinan, Pathian rawngbawlnak ihsin dungsip ka tum zuakzo tumih tuaitharawknak ih ka phuah mi "Bawipai' hnen ahcun Thukam mi ka nei zo si" ti mi hi a si bik ding a bang.
T : "Pathian rawngbawl hi ka bansan ding" ti tiangih beidawng le dungsip na tum can teh a um ve maw?
S : Vawi 4 rori dungsip ka rak tum dah. Asinan, dungsip ka tum ka ti tikah Evan. le Pastor ihsi bansan ka tum mi a si ih Amah zumnak ihsin dungsip cu ka tum dah lo. Dungsip ka tum vawi 1nk ah "Bawipai' hnen ahcun thukam mi" ti mi thawn thathar ka la ih a vawi 2nk ah, "Bawipai' tuu rual tla thinphang hlah uh," ti mi Pathian in in pe.
T : Mitthli tla rori lole danglam zetih na phuah mi hla teh a um pang maw?
S : "Zion Thlennak Lawngpi" ti mi hi mitthli tla phah roriih ka phuah mi a si. Ka rualpi tha zetin Pathian thu a zum duh lo, a pianthar duh lo ruangah amai' hrangah riahse zetih ka phuah mi a si.
T : Hla Elbam (khui) paziat lai na suah zo? Ziang pawl an si?
S : Midang thawi kawpaw ih suah mi 5 le keimahtei' suah mi 2 a um.
Midang thawi' kawpaw ih kan suah mi pawl cu:-
(1) "Khraws lawng ka tluangkhawnnak" Van Lal Sak thawn
(2) "Kan Ram Damnak Dil Uh" Dorcas Lal Biak Eng (Nu Eng) thawn
(3) "Na Hna Tharthawh Sal Aw" Dorcas Lal Biak Eng thawn
(4) "Zion Thlennak Lawngpi" Cuang Kim thawn
(5) "Kan Van Khawpi Nuam" Dorcas Lal Biak Eng le Ro Thar Hngak thawn
Keimahtei' ka suah mi 2 cu:-
(1) "Beunak Lungpi"
(2) "Bungbel Thianghlim"
Ka elbam hmaisa bik "Khraws lawng ka tluangkhawnnak" hi 1987 ah kan rak suah ih Van Lal Sak ih suahsak mi a si. "Bungbel Thianhlim" hi ka suah neta bik a si ih kum 2003 hrawngih suah mi a si ta hmang, Rev. Timothy Lal Hlun Eng ih in suahsak mi a si.
T : Na hlaphuah mi ruangih piangthar teh an um ve maw?
S : Thungai asile si lo cu ka thei lo nan ka hlaphuah mi ruangih piangthar tiih in simtu hi ka thei hnuaihni ih ka lung a awi zet.
T : Elbam thar, hla thar tawlrel mi vek teh na nei maw?
S : VCD tiang tuah ding cun kan tum rero. Asinan, in suahsaktu ding pawl parah a thumaw deuh bik. Keimah lam cu ka tiari (man) ringring ko. Pathian in suah theinak can tha in pe ding ti khal hi ka beisei zet.
T : Calai lam teh hi na paih zawng a si ve maw?
S : Calai lam hi ka paih ve zet. Casiar tla hi cu ka paih zet ih cabu ka hmuh thei mi cu ka siar deuh thluh. Cun Senhri mekazin le thuthangca dangah tla cahram thei tawkin ka ngan ve phahphah.
T : Cabu teh ngan mi na nei maw?
S : Suah zo mi cu ka nei lo nan "Ziangruangah Piangthar kan tlu theu?" ti mi cabu cu ka ngan theh zo. Dr. Sui Lian Mang ih suahsak ding a si ih tui kum sungih in suahsak thei ka beisei zet.
T : Chinmi pawl hrangah Pathian thu lamin siseh, miphun lamin siseh thutawi cah duh na neih le?
S : Pathian thu zawng cun, "Khui hmun, khui ram, khuitawk kan thlenih kan um khalle Pathian lo cun zianghman a cang thei lo. Curuangah Pathian Thu hi thupi bikah retin Pathian tihzahte'n Pathian Thu hi nunpi thei ringring zuam cio uhsi," ti hi ka cahawk duh bik mi a si.
Miphun zawng cun, "Kan suahsemnak hi hngilh riai lo ding a si. Kan thluak, thazang, neih le siah, ziangkimin kan ramte hi hngilh riai hlah uhsi." tiin ka cahaw duh.
T : Kan thusuh mi pawl thinsautei' in san ruangah kan lung a awi zet.
S : Kei khal hi vekih tawnawknak can tha in pek ruangah ka lung a awi ve zet. | 
