|
Rev.Thawng Kam (ZBC GS) Interview nak
 Zomi Baptist Convention Gen Sec Rev.Thawng Kam cu Chin mi pawl vehvai dingih Norway ram a hung tlawn laifang 18 Sept, 2009 ah Chinworld in hmaiton thusuhnak kan rak nei ih a tanglam vekin a si.
Q. Sayapa, na hmin ngai, na suahnak khua le a tui na umnak pawl in sim thei pei maw?
A. Ka hmin ngai cu M.Thawng Kam a si ih Tlangpi khua, Than Tlang pengah ka suak. ZBC Falam ah a tu ka um.
Q. Na nupi fanau pawl teh?
A. Ka nupi hmin cu Tin Hnem a si. Fapa 2 le fanu 3 kan nei. Van Tha pa, Van Tha nu tiah in ko theu.
Q. Pathian hna na tuan nak pawl le ZBC General Secretary hnatuan hi ziangtik in na rak thok.
A. 1990 kum ihsin 1997 tiang Than Tlang ah Pastor hna ka rak tuan. Kum 2007 April thla ihsin Falam ah ZBC GS hna ka tuan thok ih kum 2010 tiang a si hrih ding.
Q. Norway ramih na hung tlawn nak san bik in sim thei pei maw..?
A. Norway Baptist Union in Norway ramsungih um Chin mi pawl hung tlawng (vehvai) aw tiah invitation in kuat ih, curuangah kan Chin mi pawl lo vehvai dingin ka hung a si bik.
Q. Ziangtik ni ah Norway ram na thleng thok ih ziangtik tiang na cam thei ding?
A. 30 June 2009 ah Norway ram ka thleng ih July nikhat in khualtlawn ka thok cih. Tui ni tiangah khua 21 lai ka tlawng zo ih, hi ramsung ih um Chin mi pawl ka lo vehvai kim zik thluh thawkhat a si, curuangah September ni 23 khi Kawlram ah ka kir sal ding.
Q. Pa Bik pakhat dinhmun in Norway ramih um Chin mi pawlih Pathian kan biak dan, kan nuntu khawsak dan pawl hi ziangtin in hmu?
A. Nan umnak ram cozah a that tuk ruangah nan hna a ngam in nan nun a nuam nasa. Ram thangso dang ka fehnak ih um Chin mi pawl hnakin nan nuam sawn. An upa pawlin Chin mi pawl cu hnatuan nan taima zet tiah an lo fak zet ih an mah khal an lungawi zet hai. Nan umnak tinkim ah Pathian theihhngilh lo ten khawmnak, Pathian biaknak nan nei thei vivo hi lungawiza ngaingai a si tiah ka ruat. Malaysia ih khawm dah lo pawl khal hitawk ahcun kawhhran hruaitu nan tuan ka hmu cu lungawi thatho za ngaingai a si.
Mino thenkhat pawl nan tlawngca zirnak ah zohthim tlak zetin ka lo hmu. Tui kum sungah tla Chin mi lak ihsin Engineering kai thei tu ding mi 4 nan um thei. Hiti vekih nitlaknak ram pawlih fimnak zir ban ih nan um hi lungawiza ngaingai a si. Cun, hnatuan hman nan neih man hlanah inn lam, Laitlang ih um sung le khat u le nau nan seherh zetin ka hmu ih ka hrangah good news rori a si.
Amahlawngte nan umnak hmun pawl hi nan tekdarh aw tuk. Nan mai duh thu cu a silo nan unity hrangah hnatuan tlang a harsa. Cun, Khrihfa bu nan hun din ciar tikah Laitlang lam nan um lai ih feeling a um zet in ka hmu. Kan tong, nan tong tivekin. Bu/Pawlkom nan hun din tikah hruaitu tihzah upat dan nan thiam hrih lo deuh. Cumi ruangah nan cak ding tlukin nan cak theilo nak a si.
Nan fate pawl zirhnak lamah nan tlasam deuh. Mai Lai tong thiam ding tlukin an thiam lo. Nan zirh tawk lo. Thenkhat nu le pa lephei cu Norway tong zirnak ih hmang tla nan um. Nu pawl tambik ih in sim mi cu fate thawi lo ding hi har an ti bik, fate thawi hi thusim ah kan ruat. Khami kha a diklo, a tih lawng in tih men, ziang kan sim duh ti an thei cuang lo. Thinsau deuh ih kan zirh a tul.
Kawhhran thu thawn pehpar in thenhra thenkhat pe lo nan tam zet. Kawhhran din hnuhnu ahcun thenhra thenkhat hi cu pek hrimhrim ding mi Pathian ta a si.
Q. Chin mi pawl refugee ih ramleng kan fehsuak ciamco hi ziangtin na hmu, kan suah vivo hi a tha na ti maw..?
A. Nan rak fehsuak mi hi kan nih hrangih in bawmtu thazet a si. Rak fehsuak lo uhla Lairam ah ei ding kan neilo ding. Kawlram education tlaksiat zet lai ah tlawng tha ten nan kai thei ih thil tha zet a si. Asinan Chin mi pawl kan fehsuak bet rero mi cu riahsia za ngaingai a si. Kan ram ziangtin kan tungding sal ding timi ruat paih nawn lo ih feh cu a thalo. Kan nunphung hlo lo dingin Khrihfa bu ah nan hlom awk a tul, Khrihfa bu hngetkhoh zetin nan din a tul. Global Chin Christian Fellowship, tivek tiang hman tuah a tul rori in ka hmu. Laimi kan si, Khrihfa kan si timi thinlung kan fale pawlin an neih lole kan hlo cih a si ko.
Q. Lairam ih kan nuntu khawsak dan le ramleng ih kan nuntu khawsak danah ziangmi a danglam in na hmu? Kan thlun ding le hrial ding ih na hmuh mi?
A. Tui dinhmun ih ka lo hmuh danah kawhhran lamah cun nan tawk hrih ko. Amah lawngte cak deuh ih nan din a tul tiah ka ruat. Hnipuan hruk ahcun danglam a tul hrimhrim ko, asinan an mai nundan vekin khua lam sumpai vun bawm ding tikah na bank card, ka bank card ih ta … sumpai kan hmang ding ti a si ih nu le pa then awk nan man cia ringring a bang. Lairam ahcun sung le khat thawn kan siih, sung le khat mithmai zoh talin maw thenawk a har. Hinah cun thenawk a ol tuk in ka hmu. An fel dan, thusim an lun dan, dan le dun an thlun dan, an thianhlim duh dan ..etc. an nundan mawi pawl kan cawng dingih, kan nupa tang in then tu ding, kan unity in siatsuah tu ding an nundan pawl kha kan hrial thiam a tul. Christian kan si ti thei ringring in, an nundan hmuahhmuah kan cawng lo ding. Kan freedom neih mi kan hmanthiam a tul.
Q. ZBC thuhla lam kimcang deuh in in ruah thei pei maw..? Hmailam tikcucan ih nan hmalak tum dan tivek pawl tla…?
A. ZBC hi association 28 le Local Church 6 kan um. A umzia cu Laimi kan kim thluh hrih tinak a si. Member ting 2 luan kan si. Pastor 1163 kan um. Khrihfa bu 873 kan um. Falam khua ah ZBC zung hmunpi a um.
a). Tong zirnak tuah kan tum.
Sunday school ah Halkha, Falam, Tiddim, Matu, Cho, Mizo tong pawlin cabu suah kan tum. A umzia cu nauhak pawlin mai tong asilo mi kha kumkhat ah pakhat an zir ringring ding. Himi cabu tuahnak hrangah material kan nei zo, sumpai kan neih daih hrih lo ruangah kan tuah thok hrih lo nak a si. Hiti vekih kan tuah suak thei asile tuihnu kum 15, kum 20 hrawngah common language a si lo hmanah kan tong kan thei aw thluh thei ding tiah kan zum. Cumi cun kan rinhlelh awknak(kan zum ngam awk lonak) a hlo ter ding tiah ruahsannak kan nei. Kum 2010 in hi cabu kan suah thok thei ding.
b). Mission hnatuan dan thleng kan tum…
ZBC in CCOC thluh hnu ah CMC (Centenary Mission for Christ) kan tiih mission field 3 kan nei. Chindwin field, Pakokko field, Yaw field pawl tla an si. Himi field pawl hrangah Pathian thuthangtha simtu/Pathian hnatuan 56 kan thlah. Cui hlei ah Bible tlawngta 20 lengkai kan cawm bet lai. Cun, tuikum ah Rural student 160 kan zoh bet hrih ( PrimaryihsiHigh School tiang tlawngkai rero tu pawl an si), himi hi kumtin kan zoh theu mi a si.
 Mission field ih mi kan thlah mi ah Biakinn sak sak, tikhur laih sak simaw a tul mi tete kan bawm bet vivo. Admin budgjet (fund) ih lethnih hi mission hrangah kan hmang ringring. Kum 2000 ihsin CMC hi kan thok ih 2008 tiang kum 9 sungah mipum 1060 hrawng zumtu mithar kan ngah. Cumi lakah Kawl, Laimi pawl khal an tel. Thlanglam Laitlang hi kan fehsan (witdraw) tikah an run harsa zetih curuangah nikum 2008 ihsin Paletwa ah mi 4 kan thlah sal. Tui kan mission stragedy hi kum 2013 ah thleng kan tum.
Kan thleng tum dan cu direct in kanmah nih mission field kan hawl ding, field kan hril sak ding, a fehtu ding pawl trainning pek le pehtlaih awknak lam siseh, mission news exchange pawl kan tawlrel dingih admin lam thuhla hmuahhmuah kan kai ding. Mission a thlahtu le a tuantu ngaingai ding cu association le local church pawl an si ding. Duh le rualpi 4 – 5 vek khalin an tuah/thlah thei ding. Association le local church pawl hin anmahte fund raising tuah in minung khal anmah te an hawl ding a si. Tui ni tiang mission hnatuannak ruangah ZBC unity hi a that phah zet a si. (Zuk: Rev. Thawng Kam {a lai to} le OCCF kawhhran member pawl).
c). Master planning
ZBC quarter le compound mawi zet, tha zet le rei daih (tang) zetih sak kan duh ruangah architech design kan suai ter tum rero lai ih kan theh tikah BM, EC ah kan suah pi ding.. Tui dinhmun ah quarter khal hi kan daih aw lo zet. Himi planning hrangah ramsung ramleng ihsi bawmnak khal kan tul lai ding a si.
Q. Chin miphun lungrualnak dingah ziang kan tulsambik tiah na hmu?
A. Kan Chin miphun lungrualnak nei dingin cuh awk lo a tul. Pakhat le pakhat rinhlelh awknak (zum awk lo nak) kan hloh ter a tul.
Q. Leitlun Chin mipi hnenah cah duh mi na nei a si le..?
A. Chin miphun hmuahhmuah huap theitu Pawlkom ih hnatuan nakah thinlung pe (consentrate) nak nasa sawn pe in, kanmah tualsung(local) thilthu ah nasa tukih tan lak/buaipi lo ding. Cuti lawngah lungrualnak a um thei ding.
Q. A lo contact duhtu hrangah na address ?
A. Rev.Thawng Kam
General Secretary
ZBC Falam.
mtkam2007@gmail.com
Q. Hi zat na tikcucan in pek thei ruangah kan lungawi ngaingai a si.
A. Kei khal ka lungawi zet.
Sen Hngilh Piang | 