Kum 2008 April thla sungah Chin State, Falam khua ah Burma rampum ihsi Chin mi phunsang tlawngta pawl tonawk khawmnak pakhat an nei. Yangon ihsin tlawngta palai pawl thawn kei khal ka hung feh ve. Mandalay khua ihsi kan group in rak hngak tu hmailam tikcucan ih ramhruaitu ding Chin phunsang tlawngta tamzet karlak ah Burma ramih hril suah mi Karate Champion Mai Yin Hwa Thawng Luai cu kei khalin a hmaisabik ton thei nak ka ngah. Ka hmuh veten, a ha phir mi te thawn duhnung um zetih a hni mi cu, hnih mawi zet neitu a si tiah ka hminsin cih. Midang tlawngta pawl khalih hni ringring aw, na hnih a mawi tuk tiih an sim rero mi tla ka thei ngah. Cuisin, Seminar kan theh hnu zan netabik, inntek Falam tlawngta pawlih thlahnak puai programme sungah Saya Hre Dun thawn Karate an lek tlang nak ding khal himi programme sungih tel mi pakhat a si. Uniform mawite thawn thlah nak tongkam hni siamsi tei in ra sim hnu ah, in zoh ter ding mi karate lam cu a thok cih. Cule ve ten mitu te ih a hnih nak mithmai mawi siamsi te pawl hlo theh in, mah le mah zumawknak thawn khat in mai ral lu lak a tum tu Keite pakhat vekin a lam thok rero. Thazaang khat ih a au aw, a kut thawng awn le ke sit awn pawl cun tohkham tlar hmaisabik ih a to tu keimah cu i khur ter in ka tuk hmuah in paw ter rori a si.
Thian le rualpi pawl hrangih duhnungza hnihnak mithmai pan te thawn hnihsuak (capo) sim thiam zet tu, Burma rampi aiawh ih international Karate zuamawknak ah Laksawng tamzet ngah in rampi hmin tha ter tu Great Daughter of Chinland a si mi Mai Yin Hwa Thawng Luai @ Siang Kip cu Chin World (www.chinworld.info) siartu pawl hrangah interview tuah thei nak kan nei i…
Chinworld: :Na nu le pa hmin, an hnatuan le na suahnak khua pawl in sim thei pei maw..?
Yin Hwa: :Ka pa hmin cu Salai Thawng Luai Mang a si ih ka nu hmin cu Sayamah Mang Hlei Tial a si. Ka pa cu Falam ah Audit Officer a ttuan ih ka nu cu B.E.H.S ( 2 ) ah sayamah a ttuan. Ka suah nak khua cu Falam a si.
(Hminsin: A pa Salai Thawng Luai Mang hi a hminthang zet mi Chin phunsang tlawngta hotu pakhat si dah in, Karate lektu hminthang zet pakhat tla a si. Editor)
Chinworld: :Na fimthiam zirnak lam tla theih kan duh i…?
Yin Hwa : :Tlawng cu 2002 ah khan B.A ( Business management ) in ka theh.
Chinworld: :Kum ziangzat na siin Karate na rak lek thok?
Yin Hwa : :Karate hi kum 9 ka siin ka pa nih i rak zirh thok.
Chinworld: :Karate na rak lek thok lai ah beidong ih ban san (cawlhsan) duhnak na nei dah maw..?
Yin Hwa : :Kan nauhak lai kan rak lek thok ah cu ka paih lo tak. Ka pa ka tih ih ka lek .. .ka nau Ceute le Hute thawn fighting in lek ter le in neh tuk ih ka rak ttap ringring. Lek hi ka rak paih lo zet.
Chinworld: :Na nauhak lai ah na upat tikih na si duh mi sunmang ziangmi a si. Rampi aiawh Karate lek tu ka si ding tiah teh na rak ruat aw dah maw..?
Yin Hwa : :Ka nauhak lai ah cun Hongkong action film khi kan rak zoh theu ih cumi sung ih mintami pawl vekin mi ka tthuat(fight) hai ding tin ka rak ruat dah ko nan, karate in ram ai ka awh ding ti cu ka ruat ngel cel dah lo.
Chinworld: :Ahmaisabik lek zuam awk na tel nak le na hmuhton nak pawl in sim thei pei maw.? Cui zuamawk nakah teh ziangmi laksawng na rak ngah?
Yin Hwa: :A hmaisabik ramsung lek zuam awk ka tel nak cu 1994 kum Chin State ih tuah mi tlawngta lek zuamawk nak puai ah a si ih, a pakhatnak ka rak ngah.
Chinworld: :Burma rampi aiawh Karate lek tu ih na suah dan thuhla in sim thei pei maw..?
Yin Hwa : : Kawlram ai awh ka cang dan cu, Laitlang tlawngta puai ah kha a pakhatnak ka ngah ih Myanmar Karate Federation nih in ko cih in training in pek ih, a dotdot in in hril bet vi vo. Pathian umpi nak in ka rak neh ve theu ih cu mi in in hril ih Brunei ram ah kan va zuam aw.
Chinworld: :Ramleng zuamawknak na tel hmaisabik tum ih na hmuhton mi le feeling in sim thei pei maw..?
Yin Hwa : : Ramdang ah cu 1999 kum Brunei Darusalam ih Sea-Games ah ka zuam hmaisabik ih a pali nak lawng ka ngah. Cumi lai ah ka sung nan ka nuam aw thotho. Ka hmuh dah lo mi khua le ram ah ka vak ciamco ih ka nuam aw zet. Asinan midang laksawng an ngah ih kei tla ngah duh nak, dawtnak thinlung ka rak nei..
Chinworld: :Sea Game pakhat ah zohdiktu ruangih sun phah nak a um ih na thin a nuam lo zet dah tiah kan thei. Himi tum thuhla te hi in sim thei pei maw..?
Yin Hwa : : Aw. Vietnam ih an tuah mi 22nd Sea Games ah inntek thawn final kan lek i ka neh tin ka ruat , kan saya pawl le a dang Japan saya pawl nih tla ka neh ah an ruat nan ka sung ta riai ih ka tuar har nasa. Cule Japan ih Shobu company ( Karate thil ri zuar nak ) a neitu pa nih tla nangmah na neh in ti ih hnemnak ah Japan a thleng hnu ah Shobu karate thuam in rak kuat. Thla khat sung hranwg cu ka it that tha thei lo ih rawl khal ei thei lo in ka tuar.
Chinworld: :Leitlun level zuam awk nak pawlah tel in a pa 4 nak na ngah dah tiah kan lo thei. Khui tawk ramah, ziangtik kumih tuah mi zuamawknak a si. Leitlun pum huap zuamawknak ih na hmuhton mi pawl in hlawm ve hnik aw..
Yin Hwa: : Karate World Cup ah palinak si lo panga nak sawn si ka ngah. Japan ram Tokyo ah 2004 kum ih tuah mi 9th World Shoto Cup Championship ah a si ih, ram 53 ihsin kan si. Ram pakhat ah minung pa 4 lut ngah a si ih, rit lam teh(weight) nak um lo mi, open in in lek ter. Australia, Brazil, Sout Africa le USA nu pawl thawn kan zuam aw ih ziangtin si maw Pathian nih i um pi ih ka rak neh hai. An mah cu an tum zetzet.. Cun Best minung pariat kan taang ih cumi ah Japan nu ( Asia Champion nu + 60kg ah a rak lek mi nu ) thawn kan lek ih ka sung . Best eight in hril mi ah a panga nak ka si.
Kata(form) zuam awk nak ah tla minung kan tamtuk in kan lek ih a taang mi pariat kha final court ah kan lek . cumi ah tla Japan nunau pali kha best eight ah an tel ve ih an pali in first, secend, third, fourth an ngah hnu ah kei hi a panga nak ka ngah. Ka dung ih a paruk nak hi Germany, a pasarih nak Australia le a pariat nak hi South Africa nu an si.
Chinworld: :India ram lam ihsin tla Karate va lek sak dingih sawmnak an lo tuah tin kan thei. Himi thuhla hi in sim fiang thei pei maw..?
Yin Hwa: :India ram nih lek ding ah in ko ih ka feh zik theu nan, ka feh ngaingai sal lo. 2005 kum Malaysia Open Championship ah India ramih Karate Referee pa nih in ko ih cule 2007 ah tla in ko sal nan, ka feh paih sal lo. Kan ram mi ka hmaisong thawn, Kawlram aiawh lek hnu ih mi ram hrang pi va lek ngaingai ding khi ka ruat thei sal lo ih ka feh lo.
Chinworld: :Tui ni tiang ramsung zuamawknak ih na tel nak le na ngah mi laksawng pawl theih kan duh i …?
Yin Hwa : :Kawlram sungih ka zuam mi ah hi Gold Medal 19, Silver 3, Bronze 5 ka ngah. Cun, National Championship ah le Japan Cup zuamawknak ah Best Player vei 4 ka ngah.
Chinworld: :Tu ni tiang ramleng zuamawk na tel nak le na ngah mi laksawng pawl teh?
Yin Hwa : : Ramleng zuamawknak ah Silver 3, Bronze 8 ka ngah.
Chinworld: :Acozah lam ihsi tuahsak mi lawmnak, cawimawinak tivek na ngah maw..?
Yin Hwa : : Federation le kan ram acozah nih cu kan ngah mi par ah tawk le mawi in lawm man in pek phah theu ko..
Chinworld: :Chin State le Chin mi pawlkom pawl in teh cawisan nak tivek an lo nei maw.?
Yin Hwa : : Kan lairam ih biaknak lam le nunphung pawl nih tla lawmnak capi tivek in pek. Cun, Cerhmun association nih tla sunloih nak capi in pek.
Chinworld: :Hmailam canah na dinhmun lo sawng thei tu, santhar Chin Karate lektu ding zo na hmu. Amah thawn pehpar in malte theih ter nak in tuah sak thei pei maw..?
Yin Hwa : : Kan nih lairam in cu Karate lek tu hi kan mal tuk i, asinan a cang thei ding mi pawl cu ka hmu hai phah ko. An thinlung ah zuam duhnak an neih leh neih lo thu a si ko. Himi thawn pehper in Mai Zung Len hi ka ai i awh tu ti lam siloin, heavy weight ah a cang thei mi a si ih, a mah ih zuam duhnak a neih lai a si ahcun a cang thei ding tin ka zum.
(Hminsin: Mai Zung Len hi mi hminthang Karate saya Hre Dun ih fanu a si. Editor)
Chinworld: :A tu khui tawk ministry ah ziangmi dihmun thawn hnatuan mi tivek na nei maw..?
Yin Hwa : : A tu cu ministry of Sports ah ka thawn ih, Pathian zangfahnak in 2010, Feb 25 in kha, ka ruah ban dah lo mi le ttuan ding ih ka ruat dah lo mi Sports Officer ka ttuan. A thok pek lai ah cu paih lem lo in ka nu, ka pa le ka saya pawl thu ngai in camibuai ka va phi ve ih, minung 438 sungah 40 nih kan ong. Kei mah thiamnak ruangah siloin Pathian nih i thlawsuah mi a si sawn ti ka theih ruangah, tu cu ttha ten ka ttuan ding tin thutluknak ka tuah zo.
Chinworld: :Kum 2011 Sea Game ah tel ding tumtahnak na nei maw..?
Yin Hwa : :Thailand ram ih tuah mi 27th Sea-Games kha netabik ka zuam aw nak a si. 2011 ih an tuah ding mi Indonesia Sea-Games hrang ah Federation nih in ko nan, kei mah zuam ding hnak in ka zirh mi nih hi an zuam ding ka duh sawn thlang. ka sim duh mi cu ka thih hlan lo tiang Karate cu kei mah te, san tiluan thlun in ka lek ringring ko ding nan, zuam awk nak ah tel ding cu ka paih nawn lo. Karate hi ka duh tuk nan, Referee pawl ka hua. An hmel zoh tam tla ka paih nawn lo. Curuang ah ka cawl thlang ding.
Chinworld: :Nangmah contact a duhtu le pehtlaihnak a lo tuah duh tu pawl hrangah …
Yin Hwa : :In pehtlaih theinak address cu maioliver@gmail.com ah a si. Pass Word cu ka lo sim nawn lo mai ding …he he.
Chinworld: :Chin World rak siartu pawl hnenah cah duh mi na nei asile…?
Yin Hwa : :Chin World casiar tu pawl le ka rualpi pawl hnen ah ka sim duh mi cu, kan laitlang hrang ah ka thiam sun in le ka tuah thei nak sun in ka zuam ve ding. Kan laimi mino tampi hi zuri sabah le lamlak, mithi um zan, puai zan tivek i mi thawi ih an vak tivek ka hmuh tik ah, ka riah a sia, an ai ah ka ning a zak. Kan laitlang ah laimi le laimi hi an thawi aw. Cang-ai a kua ah a lal (hrang) bang in Laitlang hi a pi tuk ah le leilung pumpuluk ah an ruat ih an puarthau in mi tampi nih mimal te an thawi ih an bur ka hmuh tikah ka ning zak in ka riah tla a sia tuk. An nih tla ni khatkhat an lungfim tikah mi an tthuat ih zu an ri mi tivek tla hi an ning a zak leh ko ding. Kei cu ka thiam mi sunte hi lai mino a lek paih tu pawl hnenah ka zirh hai ve ding ih zuri mi tthuat nak si lo in, kan Laitlang hrang hmintthatnak le Kawlram pi aiawh tu laimi kan tam sinsin nak ding ah ka zuam pi hai ding tin ka ruat. Minung pakhat te lam dik le hman ah ka hruai thei le tla kan lairam hrangah ka tthahnem ve ko ding tin ka ruat. Ka hrangah tha in pek ve uh la kan Lairam hrangah kan tthathnemnak hmun cio in kan zuam cio pei tin ka sim duh. Hivek in ka thinlung sung um mi le ka tumtah mi phuangsuak nak ah in bawm tu Chin World ttuanvo neitu pawl, B.A (Thang), Salai le, casiar tu nan zate par ah ka lung awi.
Chinworld: :Trainning kai lai, man lo zet cing ten hizat thusuhnak in rak san ruangah Chin World Media in lungawithu kan lo sim a si.
Yin Hwa : :Kei tla ka lungawi ve.
(By B.A (Thang), Salai)
