Published: 23.05.2010 - 20:00pm (CET)
Mi tam zet in a hlasak mi ngai ruangah Pathian lamih thazang nasa zet an ngah phah nak, Chin numi Pathian hlasak tu Nu Tha Hlei Vang cu Chinworld.info in interview nak kan tuah ih, a tanglam ah rak siar aw...
CW: :Na suahnak khua na nu le pa, u le nau pawl in sim thei pei maw..?
THV: :Ka suahnak Sim Dihai. Ka Pa Pu Bil Hrang, Ka Nu Hlawn Kip Hngel. Suahpi unau Nunau Paruk, mipa panga kan si.
CW: :A tu na umnak le na hnatuan mi pawl teh?.
THV: :Grand Rapids MI, USA le Lady Lake Fl, USA kan kahtlang phahphah. Ka hnatuan mi cu Sushi tuah hi a si ko. Fanau le Unau pawl thawn kan um tlang .
CW: :Ziangtik ihsin Pathian hla na rak sak thok, Ziangruangah ?
THV: :Kumriat hrawng ka si in Biak Inn ah solo hla ka rak sak thok, Pathian thangthat hla sak cu ka duh zet mi ( hobby or zuam ) zet mi asi tlun ah ka thinlung i ti nuam bik ter tu a si.
CW: :Pathian hla CD/Tape paziat na rak suah dah? Na suah kum le an hmin pawl ..
THV: :Khualtlawn nak leiram (1)- 1997, Khualtlawn nak Leiram (2) -1999, Jesuh Lawng - 2005 pawl an si.
CW: :Album thar suah ding asilole VCD/DVD thawn Pathian hla suah ding tawlrel mi teh na nei maw..?
THV: :Ka hla suah cia mi pawl sung ihsi hril sal in VCD/DVD suah thei dingah thla ka cam rero.
CW: :Na album suah mi pawl hi mipi tha pek nak lam teh ziang a bang?
THV: :Aa..thenkhat cun tha in pe zet hokhaw.
CW: :”Jesuh lawng” timi album hi Chin mipi hmuah in thazang kan ngah phah zet ih, himi hla hi zo ih phuah mi a si?
THV: :Jesuh lawng ti mi a title cu Even Tha Nei Fai ih Phuah mi a si ih a dang finghnih khat cu Silas Ren Hlei Thang le Ro Par tla an si.
CW: :Jesuh lawng tlamtling duhdawt tu asi zia ziangtik ah na rak hmusuak?
THV: :Aa.. Um.. Hi mi thu hi in sut theu ih a san dan a har deuh nak a um theu, a ni le thla ngaingai ka hminsin lo ih, Pathian in i kawh nak cu 1994 lai in a rak si zo nan, fumfe in zianghman theih ngaingai mi ka nei lo ih harsat nak phunkim ka tuar thluh hnu 2009, January thla ah Korea Pastor pawl in kan Inn ah crusade zarhkhat sung an tuah ih cumi ihsin ka thinlung ah danglam zet ih theih fiang mi ka nei, cuisin Pastor Oak Soe Park ih The Secret Of Forgiveness and Being Born Again ti ca-uk ka siar hnu in Jesuh ih thisen thianghlim ih thlen nak hih a famkim zia ka thei fiangfiang sinsin ih nitin ka nunnak ah cui thuthangtha cu sim lo, rel lo ih um thei lo ding ih fial tu ka thinlungah a um ringring.
CW: :Na nunram ah ziangmi tikcucan hi harsa na ti bik ih, ziang mi tikcucan hi nuam na ti bik?
THV: :Hi mi thu cu phun hnih in ka sim duh, Tisa lam nun ih ka tuar har bik mi cu ka pasal ih in thihsan lai can asi ih, nuam ka ti bik mi cu USA kan thlen pek ih kan sungkua kim te kan um vialvo lai can hi a si bik in ka thei. Thlarau lam nunah cun Biak inn sungih zumtu pawl kan pumkhawm awk canih Kan Pathian thangthat nak hlasak ih kutzabeng in ka aw nei tawp suah ih ka au rero lai hi nuam ka ti bik. Har ka ti bik mi cu Pathian duh lo zawng ti thei nacing ih tisa duhnak ih i neh can ah Pathian thawn hlat awk tuk vek in ka thei aw t'heumi hi asi.
CW: :Pathian thu lamih na thlarau nun lo cawmtu bik le na nun lo kaihruaitu bik.?
THV: :Nitin Bible siar le thlacam thei hi a si bik ko.
CW: :Na sir awk bik mi thil pakhat le na sir awk lo bik mi thil pakhat in sim thei pei maw..?
THV: :Sir awk bik mi ngelcel cu ka nei lo nan, ka sir awk lo bik mi cu Jesuh thawn pehzawm mi ka si zo nak hi asi.
CW: :Pathian zaihla hi nangmah in fiang ziat na phuah zo?
THV: : He..he..he..pakhat te lawng.!
CW: :Kan Chin hla pawl, a hleice in Pathian hla pawl thangso dingah ziagvek ih hmalaknak kan neih a tul tiah na ruat?
THV: :Pathian mi hman hla phuahtu tampi nei thei sinsin seh la, Cun Pathian hla hi cu mi piangthar felfel in sak seh la a man hla cuang deuh ding ti ka zum, Cui hleiah santhar mino hin hla an ngai paih cuangih mino duhzawng in a thluk tla tuah thei vivo seh la, Pathian hla hi a lei tu khal an tam vivo ding tin ka ruat.
CW: :US ih um Chin mi pawlin Pathian hla an ngainat dan dinhmun hi ziangtin na hmu?
THV: :ka rin ai in an rak ngai na zet sokhaw.
CW: :Chin rawl ah ziangmi na duh bik?
THV: :Ka nu'i buh-hut suanmi ka duh bik.
CW: :Chin ram na ngai ve dah maw, ziang mi bik na ngai ?
THV: :Ngai ve tuk ee. Lai lam kan rak um lai ih Len Khawmpi ti vek, Christmas hamn lai ti vek hi ka ngai thei bik.
CW: :Chinworld siar tu pawl hnenah Pathianthu lamin siseh, miphun lamin siseh thu tawi cah duh mi na nei asile…
THV: :Chin mi pawl cu A nung Pathian be tu kan si vekin casiar tu nan zaten nan um nak hmunkipah Pathian thu ih sin lo pial tlu tertu ding kha va ralring zet uh. Nitin cantha nan neih tin ten Bible siar le thlacam nak ah hmang thei hram uh si, cu mi cu kan thlarau nun in thangter tu rawltha bik asi. Cutin Pathian thutak ih kan um ah cun Leitlun khua zakip ah Chin mi pawl hi mi theih thlak le upat tihzah thlak in Pathian in, in cawisang vivo ding. ( Tha Hlei Vang le a fanau pawl )
CW: :A lo contact duhtu pawl hrangah … na address
THV: : 3045 Chaminade Ct, Grandville, MI 49418 USA
CW: :Man lo ciang ten hizat tikcucan in pek ruangah kan lungawi zet a si.
THV: :Kei Khal ka lung awi.
Hminsin: Nu Tha Hlei Vang ih hla ”Jesuh Lawng” timi album hi Chinworld.info ih Chin songs timi ah ngai theih ih ret a si.
