|
Pum Za Chin (CCN) Interview
 << Burmese version Published:23.6.2010, 20:00pm (CET)
 Chin Community Norway ih President tuanvo kai tu le Point of Peace Foundation, Stavanger, Norway ah Project consultant in siseh, North Sea Baptist Church ah international coordinator ih tuan tu Revd Pum Za Chin cu Chinworld.info in interview nak kan tuah ih, a tanglam vekin a si.
CW: :Na thuhla tawi in sim thei pei maw..?
PZC: :Ka suahnak cu Tui Lang khua, Tiddim peng ah a si. Ka pa Gin Khan Thang, ka nu Awi Dah Ciin a si. Ka nu le pa cu a tu ahcun Kalaymyo ah an um. Kei cu 1966 ihsin Yangon ah ka um.
CW: :Na fimthiam zirnak lam teh?
PZC: :India ram Culcutta ih B.th ka theh in LeipiBaptistChurch ah Pathian hna ka tuan.
CW: :Ziangtik ihsin kawlram na suahsan ih ziangtik ah Norway ram na thleng.?
PZC: :August 2001 ihsin Malaysia ka feh ih, 2003 October thla ah Norway ram, Stavanger khua ah ka thleng.
CW: :Norway ram na thlen pek lai ah Chin mi rak um cia pawl ih dinhmun ziangtivek a si?
PZC: :Norway ram ka thlen pek lai ah Chin community neih a si hrih lo. Chin mi an umnak hmun pawlah feh in an tulsam mi Bible le hlabu tivek ka va cah sak, an tulsam nakah ka thei tawk in ka bawm hai. 2004 July thla ah Chin Community Norway hi din thok a si.
Chin mi a tam sawn cu Baptist kawhhran kan si ruangah kan mah le umnak hmun ih Baptist kawhhran ah kan lut hai. Cutin Norwegian Baptist Union thawn kut kan kai aw thok. Kum 2006 ah khan Norwegian Baptist Union in Ordination in pek ih, Norway ram Chin mi lakah Ordination ngah hmaisa bik tu ka si. Integration Pator ah in hmang cih.
CW: :Chin Community Norway ih nan tumtah mi pawl in sim thei pei maw..?
PZC: :CCN hi ni 26 July 2004 ah rak din thok a si ih, Norway acozah hnen khalah register tuah fel zo a si. A tumtah mi tlangpi pawl tla cu ..
(a) Norway ramih thleng Chin mi pawl anmai ram nun dan ih kan nun thiam ve theinak ding (integration) hrang ah bawm ding.
(b) Chin mi hrangih hnatuan tu Organisation pawl thawn tuan tlang ding. Milai covo le Burma ram democracy ngah nak ding hrangih tuan tlang ding.
(c) Chin mi refugee ih ra thleng pawl an tulsam nakah bawm ding.
(d) Chin nunphung, cin le dan, Chin calai pawl kilkhawi ding.. timi pawl an si.
CW: :Pumcawm awk nak hrangih na hnatuan mi in sim thei pei maw?
PZC: :Kum 2007 ihsin Burma ram democracy ngah nak ding hrangah Point of Peace foundation, Stavanger khua ih um mi thawn kom aw in tuini tiang hna ka tuan. Himi foundation ah Project consultant ka si.
CW: :Point of Peace cun Burma ram hrangah ziangti vekin hna nan tuan ?
PZC: :Hi foundation hi Democratic Voice of Burma (DVB) awsuahnak rak din thok tu a si. Cun, Nobel Peace Prize winner`s follow up programme timi, Nobel remdaihnak laksawng ngahtu pawl pakhat le pakhat pehtlaih aw thei dingah kan bawm, Pi Aung San Suu Kyi telin hi laksawng ngahtu pawlih keneh (footprint) pawl kan khawl.
CW: :Chin miphun le Burma rampi hrang khalih hnatuantu na si ih, 2010 Burma ram hril awk nak ding hi ziangtin na hmu?
PZC: :Tuikum hril awk nak ding hi tlangpar mi pawl covo hrangih aa-mah-khan nak um lo mi 2008 dan hrampi nemhnget nak ding le election law khal free and fair lo takih an tuah ruangah, election siloin selection sawn a si tiah ka ruat.
CW: :Ramsung ih Chin Party ding mi pawl cun tuikum hril awknak ih tel tumin tan an la rero. An nih cun election ih kan tel asile ChinState hrangah pakhatkhat kan tuah thei ding tiah an sim. Himi ah ziangtin na sim duh.
PZC: :Ramsung ih Chin party 2 pawl election lut dingih ENC pawlin campaign an tuah rero mi cu theihthiam harsa zet a si. Election ih tel hi ralkap pawl lal rei nak hrangih bawmnak a siih, ChinState hrang thathnemnak a suah pi ding ka zum lo.
CW: :ENC pawlin ramsung ih Chin party 2 thazang an pe, an bawm rero na ti duh nak maw?
PZC: :Si ko, election thuhla ah simfiang nak ciah an nei lo. Asinan, ENC sungih thenkhat pawlin ramsung Chin party pawl an bawm mi hi cu an policy parah hnget ten ding lo in, mai hrang hlawk nak ding an tuan a si sawn maw tiah rinhlelhnak ka nei.
CW: :Norway ramah Chin miphun ziangzat tluk hrawng nan um zo?
PZC: :A cekci in cu ka thei lo. 1500 hrawng kan si thlang ding ka zum. Tuikum ah mipum 200 hrawng an ra thleng bet ding.
CW: :Norway ramih harsatnak le nomnak mal lai in ruah thei pei maw..?
PZC: :Thleng thar pawl hrangah thlatang ih an hung thleng asile nikhua dai tuk mi le tong lamah harsatnak an nei cio hai. Cun, hitawk ah nauhak vuak le velh awih asilo. Cumi cu fate nun sim ding nei pawl hrangah harsa an ti zet. An fate nun an sim tikah kan lai dan thawn a bangawk nawn lo ih harsat nak an tawng theu.
Biaknak lamah cun Baptist kan si tlangpi ruangah Baptist kawhhran ah kan lut. Asinan, neta deuh ah mahte kawhhran ih ding tu Chin kawhhran 6 lai tuah cun kan um zo. Zumnak lamah kan phur zet hai ih lungawi za ngaingai a si. Biaknak lamih kan pek awk zet ruangah anmah Norway mi pawl khal an lungawi in in fak zet hai.
CW: :Chinworld siartu pawl hnenah cah duh mi na nei asile…
PZC: :Chinworld hi Burma ram thuhla update le Chin Politician pawlih hmuhdan tivek nan tarlang theu ih a lungawi um ka ti zet. Chin mipi hrangih information tha zetzet in pek theu ruangah lungawi za ngaingai a si. Chin mi tamsin in pelh lo tei nan rak siar ding khal ka lo duhsak zet hai. Cun, Chin mipi hnenah … a dik mi policy le principle parah hngat aw in, mai hrang hlawknak men silo, miphun hrang that nak ih ding sawn dingah tha ka pe duh. Tuikum hril awk nak hi NLD le tlangpar mi party tum pipi pawl an tel lo ruangtah international ih nemhnget pi nak an ngah ding ka zum lo.
CW: :A lo contact duhtu pawl hrangah teh …?
Pum Za Chin
Tel: 0047 92882868
pumzachin@gmail.com
CW: :Man lo cing ten hizat tikcucan in pek ruangah kan lungawi zet.
PZC: :Kei khal ka lungawi. Chin miphun zaten Pathian in thlawsuahnak lo pe hram seh.
Chinworld Team | 