|
Pu Zo Zam (CNP) interview
 (Burmes version) Published: 17.06.2010 - 13:30pm (CET)
 1986 kum ihsi Burma ramsung calai lamih rak lut thok tu, Cartoonist dinhmun ihsi ralkap cozah ih tuah ding mi 2010 election ah Chin mipi aiawh hril awk nakih tel dingah le Chin mino thangthar pawl thawn Chin National Party rak din in, President tuanvo la tu Pu Zo Zam cu www.chinworld.info nih interviewnak kan tuah ih ….
CW: :Nan Party dinthok ni in sim thei pei maw..?
PZZ: :Facis pawl dothlengnak ni a si mi 27 Mar 2010 ah kan din thok.
CW: :CNP Party ih logo ziangmi a si. Thantar (flag) teh nan nei zo maw..?
PZZ: :Kan Party hminsinnak logo cu Vapual zuang lai zuk a si. Kan Party Thantar cu a pawl, a sen, a hring …rawng thum laifang ah Deirel arsi tumpi pakhat thawn a si.
CW: :CNP Party ih hmuitin mi in sim thei pei maw…?
PZZ: :CNP hin hmuitin mi pathum a nei...
(a) Tuihlan le 1948 kumah Chin miphun pawl hi Union rampi independent ngahnak le thuneihnak hrangah thupi zetin an rak cangvai, tu cu mifim cathian thangthar mino hotu pawl hrangih hmalak nak ding platform tuahsak can a si ih, cuticun hmailam can Myanmar politic hohanak lamah hruaitu dinhmun in tuanvo an lak thei ding.
(b) Union rampi ih political, economics, social, education, health sector etc pawl tha zetih hoha/lamhruai thei tu ding Chin phun duhdawtu pasaltha pawl funtom in rintlak mi santhar mino hotu si dingah thurawn pek ih bawm ding.
(c) Federal rampi dinsuah ding..
CW: :CNP dinhmun in Chin miphun hrangih nan tuah tum mi pawl in sim thei pei maw..?
PZZ: :Fimthiamnak, harhdamnak le sumdawnnak lam bulhrampi pawl kan tuah ding. Private fimthiam zirnak le harhdamnak lam tuah ding khal tha kan pek ding. Technology suak netabik pawl, social economy, market economy pawl hawlnak, leitlun ih mipum tambik pahnihnak a si mi India ram thawn ramri sumdawn tonnak lamzin tuah ding ..tvp. Chin rampi tuah that sal nak hrang programme tampi kan nei ko. Tlangpar cawlhbuk (Mountain resort) pawl khal kan tuah dingih, ramsung ramleng tourist pawl ra leng in Chin ram ih a mawi zet mi pangpar phunkim pawl, hmunram pawl le a bangaw lo mi nunphung, cin le dan pawl khal hmuhton nak nei thei in, an tep thei hai ding a si.
CW: :Tuihlan Chin miphun hrangih na rak cangvaih pumpek awknak in sim thei pei maw..?
PZZ: :Chin miphun hrangah maw..? Oh ..sim tlak lo, mal tak te pawl lawng si ka tuah dah.
CW: :A tu ah ziang hnatuan in pum na cawm aw bik?
PZZ: :Taxi hlun te pakhat ka nei. Hi ka Taxi siate hi Yangon khawpi sungah a tlan zok rero ko.
CW: :Na suahnak Teddim ah MP cuh na tum tiah kan thei. CNP hin MP cuh tu ding pawl nan hril fel zo maw..? An hmin le towship pawl in sim thei kem..?
PZZ: :Tu dinhmun ahcun thuthup a si lai hrih ruangah ka lo sim thei lo. Neta ah kan than leh ding.
CW: :Party campaign teh nan tuah thok zo maw, member paziat hrawng nan nei zo?
PZZ: :Kan tuah ding mi hmanhman ten kan tuan rero ko. Party member khal a tul zat hnakih tam ngah ding kan beisei.
CW: :2010 election ah CNP in ziangtluk tiang zumawknak nan nei? Hmun ziat ah nehnak co ding nan zum aw?
PZZ: :2010 election hrang CNP in zumawknak tumpi kan nei ko.
CW: :Chin State ihsi na tlun pek te a si ih, 2010 election hrang Chin mipi ih ngaihruat dan dinhmun ziangvek a si.
PZZ: :Chin mipi pawlih election ngaihruat (phur) dan cu mirang tongin cun “Not so bad, not so good” ti ding a si.
CW: :Chin mi pawl tamzet umnak, Chin ram lenglam – Kalaymyo, Tamu township le township dang pawlah CNP in cuh ding tumtahnak nan nei maw..?
PZZ: :Tikcucan bithliah harsatnak ruangah Chin state pakhat hrang lawng kan ruat.
CW: :Nan Party hrang fund ziangtin nan hawl ding?
PZZ: :Party fund maw! Hi, ka rual – nan mah khal in bawm ding awm tak nan si. Tha ten nan thei ko. Kan nih Chin mi pawl cu zahumnak hrangih nung mi kan si. Sumpai hrangah a si lo. A dik ko lo maw..?
CW: :Ram dangdang ih um Chin mipi thawn teh ziangtin pehtlaih tuan tlang nak nan tuah ding?
PZZ: :IT san pi ah hin thuthang media pakhatkhat in siseh, email thawn siseh, telephone thawn khalin pehtlaihnak kan tuah vivo ding.
CW: :CPP thawn teh tuan tlang ding tumtahnak nan nei maw..?
PZZ: :Tu tiang ahcun thutluk nak tuah a si hrih lo.
CW: :2008 dan hrampi ah 25% cu ralkap uniform hruktu pawl an si. A tang mi 75% khal civil thuam hruk ralkap pawl an tel lai ding. Cuti a si ih mi pali ah a malbik ralkap pakhat a tel ding ruangah nehnak nan co a si hmanah tha ten hna nan tuan thei ding maw..?
PZZ: :Kan nih cun kan hnatuan pawl tha tei hna tuan thei dingah duhdawtnak lawng kan hawl ding. Uniform pawl hawl ding kan si lo. A fiang zet ko… thuthim nakah mi pakhatkhat ih duhdawtnak ngah na duh asile nangmai duhdawt lainat nak kha na hmuh ter a tul.
CW: :Dan lo a si mi ralkap cozah hmanin rampi hitluk rap bet in an uk ih, dan vekih a ding mi acozah an si betbet ahcun an luar deuhdeuh ding tiah na zum maw..?
PZZ: :Tu a ra kai ding mi acozah hi ralkap acozah hlang an si nawn lo. Hi cozah thar ah hmuhton nak nei tam ih, a tlingtlak mi milai pawl hmuh ding/an tel ding duhthusamnak ka nei. Thla ka cam.
CW: :Election do kalh tu pawlin tui tum hrilawknak hi ralkap acozah cu dan vekih tuah nak men lawng a si. A dang pawl hmuahhmuah cu amah kel a si thotho ding tiah an sim. Himi thu ah ziangtin na sim duh.
PZZ: :In suh duh mi cu “zahumnak le hamthatnak” timi a si maw..? Thu pakhat ka lo sut ding. Hi hril awk nak ngaihsak lo ih na dodal nak kha nangmah le nangmah mi zahum pakhat tiah na ruat aw maw. Kei cun “No” timi san nak lawng ka pek ding. Thuthimnakah hamthatnak timi hi zahumnak thawn na kai hnget/kawp thiam asile nang cu a hlawhtling zet tu mi pakhat ah na ra suak ding.
CW: :A pathumnak thazaang(Third forces ) timi pawlin, ralkap cozah ih lamzin lilawn an tuah rero mi pawl khal hi thansonak pakhat a si ko tiah an sim. Thuthangca pawl khalah kum 20 sung rori theh ih theh ti umloin lamzin lilawn an tuah rero. Asinan, Burma mi pawlih ramleng feh hnatuan duhnak le retheih harsatnak pawl nitin tlak niam lam pan loin a zual deuhdeuh. Lamzin lilawn tuah nak hi Burma ram politic buainak ih tul bik mi a si maw. Thansonak thawn pehpar in ziangtin sim na duh.?
PZZ: :Lamzin lilawn tuah rero nak hin kan ram buainak pawl a reh ter tiah ka ruat lo. Kan harsat buainak pawl hi kum 20 sungah a reh ter thei lo. Ngam zetin ka sim ding, hiti vekin kan feh vivo ding asile kum zabi pakhat sung hmanah hi buainak ti reh ter theih a si lo ding.
CW: :CNP thawn pehpar in ramsung ramleng ih um Chin mi pawl hnenah ziang sim duh mi na nei..?
PZZ: :Duhdawt mi Chin phunpi u le nau – Ziangtik lai khalah kan lo hngilh dah lo a si. Nan zaten Pathian in thlawsuah lo pe hram seh.
Chinworld Team | 