|
Pu Lian Uk (Chin MP, 1990) interview
15.04.2010
Chin mi sung ihsin 1990 kum hril awk nakah independent candidate ihsi MP hril tlin a si mi, 1970 kum ih Chin federal movement a rak hoha ruangah le ralkap uktu pawl hnenah Burma ram cu Federal uk awk nak dan ih ukawk ding ngen in Proposals a theh luh ruangih thawng rak tla dah tu Pu Lian Uk cu tuikum 2010 Burma pum hril awk nak ding thu thawn pehpar aw in a hmuh dan suh nak Chinworld.info in kan nei ih, a tanglam vekin a si.
CW: :Na suahnak khua, na nu le pai hmin le a tu na umnak hmun pawl in sim thei pei maw..?
Lnk: :Ka suahnak hi Chin Ramkulh saklam thlanglam nisuah nitlak nak alaifang tak khua a si mi Aibur ah a si. Hakha ih thanglian ka si. Ka pa: Pu Hmunnawl, kanu: Pi Zingkawi. A tu ka umnak: Washington DC,USA a si.
CW: :Tlawng na rak kai dah nak le na thehsuak mi pawl teh..?
Lnk: :Hakha Highschool ih ka kai hnu ah Rangoon United Christian High School in High School Final, Arakan Ramkulh Akyab Center in phunhra ka ong. Rangoon University in English, Burmese, History, Logic, Economics le Anthropology lak cih in Law (upadi) ah Kawlram pumpi sung BA, LL.B., first batch minung 97 a ong hmaisabik sungah Falam peng Bualkhaw khua, Pu Kap Tial te pawl thawn kan ong tlang.
CW: :1988 lai ih Burma election law le a tu 2010 ih election law ziangmi a danglam aw?
Lnk: :1988 hril awknak upadi cu Mipi hril tlin mi MP kut ah Rampi uk awk nak thu hmuah ret ding timi democracy dan le dun tling zetih ngan mi a si. 2010 hril awk nak upadi thuhla a tawi zawngin kan vun sim ahcun: Kawlram sungah miphun pakhat, tong pakhat le biaknak pakhat lawng umseh ti hi ralkap cozah pawlih an tuah san bik mi le an tumtah bik mi a si. Cuti a si theinak dingah Than Shwe le a dungthluntu ralkap sungkua lawng in an tefa sin tiang Kawlram pumpi hi uk thei vivo hai seh tiin 2008 Kawlram pumpi ukawknak dan hrampi constitution hi an ngan.
Cui dan le dun sung a thupi bik ih an ngan mi ah Kawl a silo mi miphun dang pawl hmuahhmuah cimih nak le Than Shwe le a dungthlun pawl kha hnaihnoknak petu an umlo nak dingah an mah Kawl khawsung mi lala khal catbang lo in kaihkhih hremnak ding hriamnam hrangih hman awk ah 2008 uknak dan hrampi hi ngan a si. Kawlram pum huap mipi in an duh lo ding ti cu ralkap cozah hin a theihcia mi a si. Curuangah Nargis thlisia ruangih a thawng sawm tel in thihnak rapthlak bik le harsat lungsiatnak nasa bik a tuar tu ramsung mipi in mee thitha ih an pek thei lo mi kha riahsiat pi ve dingah rak lak lo in anmah ralkap cozah miatnak ding, thuphar per nak can tha ah an rak lak ih, ramsung mipi 94% in 2008 uk awknak dan hrampi cu duhnak mee an pek tiah leitlun mipi theih in thuphan an than. Leitlun in an zum cuang lo.
Curuangah 2010 hril awk nak tuah tikah mipi in mee an pek a si ahcun 2008 uk awk nak dan hrampi hi mipi duh mi a si ruangah mee an pek tiin leitlun ih an pompi thei nak ding, mipi le leitlun bumnak hrangah 2010 hril awknak upadi hi tuah mi a si. Cu ruangah hrilawknak upadi 1988 le 2008 cu a dang aw tuk.
CW: : Upadi (Law) lam thiam mi na siih, 1947, 1974, 2008 kum pawl ih ngan mi Kawlram Constitution parah ziangtin sim duh mi na nei?
Lnk: : Panglong lungkim tlangnak (Panglong agreement) hmin ngan ttum ah: Chinram, Kachin ram, Shan ram, Kawl pawl ram pali in an mah le ramri sung cio uknak cozah le dan tuah theinak an nei ciar ding. An ram li ih tawm awk nak hmun pawl lawng ah ramkhat cio in a bangrep ih thlah mi parliament an ding ding. Cu parliament pawlin ramkom pawlpi uknak federal dan le democracy dan le dun in ramkom pawlpi cozah an din ding ti ruahnak a si.
General Aung San le a cabinet Minister/Wankyi pawl July 1947 ih thah an si thluh hnu ah a ai rawn awh tu Kawlmi hruaitu in Panglong ruahnak ukawknak dan hrampi pawl kha a hlon. Curuangah September thla 1947 constitution ah Kawlmi pawl ram in British uktu aiawh nak kha an lak ih Panglong lungkim tlangnak hmin ngantu tlangpar ram Chin, Kachin, Shan pawl kha Kawl mi cozah ih ukmi Kawl colony kut sungah ziangmawzat simtlaklo uknak thunei mi an ramkulh cozah cio an din ter. Chinram kha an mah Kawl cozah cabinet minister sungah Chinram thuhla a uktu Chinmi Vuankyi pakhat cu an mah Chinram ramri sung uknak kilkhawi tu in an tuan ter ve.
Kawlram pumpi biaknak cu Buddha biaknak ih tuah duh ah 1947 uknak dan hram rem ding thu 1962 ah a hung suak. Tlangpar mi in Panglong lungkim tlangnak ruat in Kawlram pumpi uknak danhram hi federal uknak dan hram ih rem ding an hun suah pi ve. General Ne Win in federal uknak dan cu rampi thenthek awk nak ding ruahnak a si tiah thuphan per le phuahcawp in, hrilmi cozah kut in ukawknak a lak ih 1974 ah ukawknak danhram thar a tuah.
Cui ukawk nak dan hram constitution ah Panglong agreement hmin ngan tu pawlin an mah ramkulh sung cio uk awk nak ramkulh cozah an neih mi kha a siat thluh. Panglong hmin ngantu ram kha Kawlmi pawlih ram ah a lak thluh i Kawl mi ram an uk awk nak Ttaing/Division uknak dinhmun (status) lonsak in Kawl ralkap cozah in Panglong hmin ngan tu pawl ram kha a hmin lawngin ramkulh tiah a pek hai ih Kawl ralkap in direct in an uh cih.
1974 ukawknak dan hram sungih party pakhat lawng in rampi kha ramkhat(rampak) uknak dan in ralkap acozah nih a uk mi kha mipi in an tuar thei lo. Curuangah acozah zung hnatuannak ah ram mipi zohman feh duh lo in acozah duhlo nak langter in lamzawh nakah an rak feh thluh. Curuangah mipi lamzawh ih duhlo langternak hin 1988 ah Party pakhat lawng uknak cozah an rak siat ter.
Sandahpiah hruaitu in can karlak a hruai sung acozah din hlanah General Saw Maung in ram uknak thu kha ralkap uknak in a lak. Acozah hnatuannak zungah mipi pawl hnatuan ko uh law hril awk nak kan lo tuah sak ding. Hril awk nak ihsi a suak mi MP kha ram uk thuneihnak kan pek ding tiah a than. Curuangah mipi pawl acozah hna an tuan sal lala. 1990 ah General Saw Maung in 1988 hril awk nak upadi thawn hril awknak a tuah tik ah ralkap tanpi mi National Unity Party (NUP) nih party pakhat cozah in ramkhat ukawknak danhram ngan ih uk dingah timtuahnak an nei.
Cui ruahnak cu mipi in an duhlo ruangah NUP party in MP 485 sungah hmunhra te lawng hrilnak a co ngah. Daw Suu ih hruai mi NLD le tlangparmi party UNLD in MP hmun 85% hnakih tam an hmu. General Saw Maung in ramuknak thu kha hril tlin mi MP kut ih pe ding a si thlang. MP pawlin ramsungih Party tam deuh a um thei mi federal uknak danhram pi kha ngan dingah timlam cia a si ve thlang.
Federal uk nak a si ahcun Panglong agreement hmin ngan tu ram pawl Kawlmi pawlih ram ah Ne Win in a lak i Kawl ralkap kut hnuai ah deng lut in Kawl pawlih an hun uk mi pawl kha Ne Win, Khin Nyunt, Than Shwe pawlin an thlah duh hrimhrim lo. Tlangpar miphun pawlih ram cuh sak ih lon ding lawng siloin tlangpar miphun pawl kha an miphun pi i cimih ter thluh ih hloh ter ding tiang tikcucan la i uk hrih an duh. Curuangah ram hruaitu bik a si nak a hna kha Saw Maung kut in a lak sak ih a aiawh ah Than Shwe a kaih ter. Hril tlin mi MP kut ah ram uk thuneihnak Than Shwe in a pe duh hrimhrim lo.
Than Shwe le a dungtlun an tesin fale pawl tiangin rampi an uk lawng ah tlangpar mi pawlih ram kha Kawlmi ram ah an cuh sak thei ding ih tlangpar miphun pawl khal kha an miphun cimit hloh theinak a si timi Than Shwe le a dungtlun pawlin an zum. Curuangah hiti ih tlangpar mi pawlih ram cuh sak in le an miphun cimih hloh ter dingih tuah nakah Kawlmi khawsung mi khal Than Shwe le a dungtlun pawl hnaihnok nak an pek theilo nak dingah anmah Kawlmi ramsung khawsung mi pawl khal kha cat lo bang lo in temtawn hremnak hriamnam ah Party pakhat lawng nih rampak ih uknak danhram 2008 kha an vun ngan cu a si.
1974 ukawknak danhram hi Party pakhat nih rampak ih uk ding ruahnak ah an bangaw. Asinan, rampak uknak tlunah 2008 sungih an vun bet hrih mi cu: ralkap uknak khohkhah zet mi ah MP 100 ah hril lo mi ralbawi MP 25 rori um ding le Ralkap bawi tuanvo sang hna ihsi a suak mi kha rampi President ah ret in ralkap uknak siat ter thei dingih an hmuh mi thil fate khal kha ramsung himnak a um lo an ti aw ter ding i, mipi hril mi ralkap suak president in ramuk thuneihnak kha ramsung ralbawi tumbik kut ah pek ringring ding a si.
Leitlun khuitawk ram khalah constitution hi ramsung ah thuneihnak sangbik neitu a si. Asinan ralkap sung ukawk nak vekin ramsung ralbawi tumbik in ramsung khuasung mi khal uk dingin mipi ih hril mi President in ralbawi tumbik kut ah ramuk theinak thu a pek ding mi 2008 Kawlram ukawknak dan hrampi ih an tuah tikah ram uknak dan hrampi in ramsung ralbawi tumbik cu thuneihnak sangbik neitu ah a tuah tinak a si. Cu vek cu leitlun khui ram hmanah a um lo mi mipi hremnak ding ukawk nak dan hram siava bik a si.
CW: : 2010 Burma ram hril awk nak ding hi free and fair a si ding na zum maw..?
Lnk: : Ram hruainak thuhla ah thawng a tla tu (Political Prisoner) pawl an thlah lo mi le thawng a tla tu Political prisoner pawl kha an party sung ihsi suah ter fialnak upadi ih an ngan mi hin tui tum hril awk nak cu free and fair a si thei lo ti a fiang ter zo. 2010 hril awk nak le 2008 constitution hi diknak le mipi hrangih a tha dingmi hawlnak ding siloin, mipi hremnak le Kawl miphun asi lo mi cimit ter nak hrangah miphun dang ram va lak sawng mi ralram uk in uk an tumnak, a sia tuk mi uknak le hril awk nak lawng a si. Mipi le ram hrangih a tha ding upadi siloin ramsung mipi ralkap in hrem theinak ding ah kawl tongih “seihdat sit sin ye” an timi psychology war fare tactics hlir te hmang in mipi hrem theinak hrangah tiah an ngan mi upadi a si.
CW: :Tuikum hril awk nak ihsin ziangmi pawl a rak cangsuak ding tiah na zum, Mipi pawl hrangah teh ziang si ngah ding um tiih na hmuh mi.?
Lnk: : A tu 2010 kum hril awk nakah hin ralkap pawl duhnak a thlun tu ding mipi in a tha tiih an ruah mi pawl an suak ko ding. Thuthimnakah 1990 hril awk lai ah mi zo khalin NUP party an duh lo. Asinan NUP party ihsi cuhtu an sinan, an mah bulpak mi tha tiih mipi in an hmuh nak ruangah Chin ramkulh ihsin pakhat in NUP party MP a hmu i, pakhat in MP a hmutu pa sangtu pa hnihnak si ve in mee tam zet a rak hmu thei. Kha ti lai vekin mipi in mitha tiin an hmuh mi pawl kha nga-sio ih kan tarh mi cangcel a ei tu nga in ngasio ah a awk ih a luak sal thei nawn lo vek khin, 2010 hril nak mee thlak cu hrem hmun ah mahte ih va thlak awk vek khi a si ko.
CW: : Himi 2010 election hi Democracy ngah nak ding hrang lamzin pakhat ah a cang thei tin an sim rero mi pawl parah ziangtin na hmu?
Lnk: : Ziangtin 2010 hril awk nak ihsin democracy ah a her aw ding ti ruahnak an sim mi khi a si thei lo mi an sim mi men a si. Thungai ahcun ralkap uknak hi kan tuar theilo ti cu ral a do tu in hriamnam ret tahratin an ral pawl hmai ah khuk bik in va biak ih nan thuthu in kan um thlang ding tiih surrender ralthuam va ret ih ralkap uknak va tawmpi vek khi a si ding.
Hril awk nak ih luh le mee pek ruangah ziangti hman ih democracy ngahnak ding a si thei lo nak cu: 2008 constitution an suai lai ah hril/fial cawp mi pawl minung 100 kha ralkap hruangsung ah kaih cia in an ret mi pawl an si i an duh lo mi zianghman an sim ngam lo, an ngam hmanah sim nak can an hmu lo. 1974 constitution lai ih hluttaw khal kha hluttaw kusale pawl ziang hman an sim thei lo i Baho Party committee in an rel mi poh kha lusu ih lungkimnak pek mi hlir a rak si. Cuvek thotho in 2010 khalah a si tho tho ding. Ralkap kulh mi hruang/thang sungah Thawng tla mi an siih, thawng tla nih ziang hman an tuah thei ding mi khi a si lo.
MP 100 ah hril lo mi ralkap bawi MP 25% a um ding timi khi MP 440 ah Ralkap MP 110 an um ding a si. Ralkap sungah ralkap 100 cu ralbawi pakhat in a uk bangin MP 100 kha ralkap bawi MP pakhat in ziangha an tuah ti thlir in a zohthup/thlingthla ding a si. Ralkap mitkem mi an um ahcun politic ram hruainak thuhla ihsi sualnak lak loin yazawut-criminal case thuhla in sual ah an puh dingih thawngtlak tuar men ding khi an si. Tleicia Pu Mang Lian kha ram hruainak thuhla in kaih an duh nan mi inn hmun ah ding lo in a zoh tivekin kum reipi thawng tlak sual an pek vek khi an tuah ding theih cia a si.
Mipi in 2010 hrilnak mee an pek lo lawngah a famkim lo mi ralkap cozah le tlamtling lo mi 2008 uknak dan hram an si hrih lai ih ram tampi in an mah thawn sumdawnnak le thilri zawrh lo dingah an phit hrih ding. Democracy atu dinhmun ih a tuah tan mi lamah UN le leitlun in tlamtling te ih tanpinak le bawmnak a pek in kan hmu hrih lo ih, do hrih nak ding lam a tluang hrih ding khi a si.
1988 lai ih tangka cahnah 100 le 50 an rak thah kha ralkap cozah in an ti sual ngaingai nak a si. Curuangah 1990 hril awk nak ah ralkap tanpi mi NUP in kan neh ding tiih an tisual mi an vun thuat ruangah NLD le Democracy a tan tu UNLD party pawl nih an nehtuk a si. Cutikah kawl ralkap cozah in an ruahcih mi ramsung party pakhawt lawng umnak dan, rampak uknak danhram upadi ngan ding kha an tuah thei lo ding an thei aw. Cutik ah hril mi MP pawl kut ah rampi uknak thuneihnak an pek duh lo kha democracy sungmuril thawn a kalh mi palh nak ngaingai a si bet.
A tu khal leitlun ram tinkim le UN in Party a ding mi pawl hmuahhmuah hril awknak ih lut ter thluh dingih an tuah lo ruangah tlamtling cozah ah UN le leitlun ih cohlanpi mi a si lo ding. Party pakhat ah ramhruainak thuhla in thawng a tla tu an tel ahcun cumi party kha hmatpungtin lo ding in 2010 hril awk nak upadi ah an vun ngan. Cu ruangah Daw Suu kha NLD party in suah ding, dawi ding in election law an tuah mi hi democracy dan le dun thawn a kalh aw tuk mi tisual nak ngaingai a si bet lala.
1990 hril awl lai an tisual nak khal a dodaltu pawl hrang a that ruangah a do tu nih an rak neh. Atu khal hi ralkap cozah in democracy dan muril bik thawn kalh in hril awk nak upadi an tuah mi an tisul nak cu a dodaltu pawl hrangah thil tha zet a si. Asinan hril awk ni ah mipi in mee an va pek ahcun cui an ti sual mi kha kan va rem sak vek khi a si ding. Mipi in mee kan pek lo ahcun 2008 constitution kha an duh lo mi a si ti a lang tuk ding. Curuangah 2008 constitution cu leitlun in an pawmpi lo dingih, a hnget hrimhrim lo ding.
2008 constitution ih MP 100 ah mipi hril lo mi ralkap bawi 25 rori an tel mi le a dangdang an ngan mi pawl ruangah 2008 constitution cu 1974 constitution hnakin a luar deuh sawn. Mipi zalennak pek lo in a reek bet zet ding tinak khal a si. Ralkap uknak dan in khawsung mi (civilian) kha uk ding mi uknak danhram siava a si.
1974 constitution khal kha 2008 hnakih zia um deuh sawn mi a sinan, mit hmuh kut tuah ih vun hman tikah a hman theih lo mi a rak tamtuk. Curuangah Upadi thu kha cahnah sung lawngah a um ih uktu pawl in an mah le ruah dan vekin, lawless ih uk nak .. a dik lo mi in thil tuah sualnak ah an rak hman. Curuangah Mi dik lo pawl le cozah le mipi thilri le tangka ei thup theitu pawl kha mifim pasal tha ah an ruat ih miding mifel kha santlai lo ah ruah an si.
Upadi a thiam mi Dr.Maung Maung khan President a kai tikah an upadi vekin a hun hmang ih mipi uknak ih a feh/tlak thiam lo ruangah 1974 upadi kha a ding thei lo ih, acozah a siatbal kha a si. 2008 uknak danhram khal hi duhlonak hmual nasa zetin kan langter ruangah mithmuh kuttuah (practical) in hman theihmi a si lo ding. Cun 2008 Kawlram pumpi uknak dan hrampi cu mipi thinlung duh nak tel lo mi thuphan rori in mipi 94% in an duh tiih nemhnget mi men a si ruangah 2010 hril awk nak upadi vekih hril mi acozah cu thuphan upadi parah a ding mi uk awk nak dan hram ih hril mi a si ruangah a hngetkhoh thei hrimhrim lo dingih, a siatbal olmi acozah a si hrimhrim ding.
1990 hril awk lai ih Daw Suu lamih mee petu za ah 80% hnakih tam cun an tanpi mi khi a dik lo ding. Malte rei in thawng in suah lo awk tha lo in an suah lai ding ih ramhruai nak thuhla ah a cawl/baang lo ding. Ramsung ramleng tam deuh sinsin in an vun tanpi ding. Cuhlei ah Daw Suu a suah tikah hi thuphan thawi an neh ter ding mi ralkap tanpi mi cozah hi ol sam te ih siat bal thei mi ah a suak ko ding. Cutik ah 1974 constitution le Ne Win hruainak zoh sia zetih a cem vek khan Than Shwe le a hruainak 2008 constitution khal zohsia zetin a cem ve lai ding a si. Curuangah hi 2010 hril awk nak ni ah ramsung mipi zate mee pek lo ih kian san in, mai duhnak hmundang ah feh san daih ding a si.
CW: : Atu Kawlram dinhmun hi election maw? Asilole a dang challenge sawn ha a si?
Lnk: : A do rero tu mipi kan um ruangah uknak an tisual ding lam a tam tuk. Cu ruangah cui an tisual mi in challenge ding tampi a hung suak ter ding.
CW: : 1988 CNLD founder pakhat na si ih, a tu election ah CNLD dinhmun ziangtin si pei ..?
Lnk: : CNLD khal hril awk nakih luh lo ding hrimrhim mi a si. 1990 lai hril awknak ah MP hmun 6 hmun 7 tal rak neh hai sehla zum an um deuh ding nan, asinan Chin ramkulh sungah le a leng lam thawn CNLD nih hmun 20 zikte ah hril awknak an cuh ko nan hmun 3 te lawng an hmuh mi hin nasa zetin an thang a siat ter a si. Curuangah CNLD in langsar zetin mi hmuh ding ih an tuah mi a um lo. An dinhmun ah an kaih mi foundation muril hnget hleifuan mi a um lo ahcun an din thei ding a har zet ko ding.
CW: : Kum 1990 vek in tui kum ah hril awknak a um lala ih politician pakhat dinhmun in ziangtin feeling na nei?
Lnk: : Tuitum 2010 hrilawknak hi democracy a zumtu le Chin miphun sung duhdawt thlaihsannak a neitu Chinmi hrangah sullam neilo mi hril awknak luh phu lo mi siin ka hmu. 2008 constitution cu kan pom pi thei hrimhrim lo kan timi tu hin san thuthu ah kan tesin fale pawl nih fak tlak ruahnak in an rawn hmu lai ding. 2008 constitution cohlang in hril awknak ih luh le mee pek cu mah le mah phatsan awk (betray) vek a si.
CW: : Burma Democracy hrangah milai nunnak tampi an liam zo, western ram pawlin dollar million tampi an rak bawm nan exile democracy movement ah victory timi kan hmu hrih lo. Himi hi ziangruangah si pei?
Lnk: :1990 hril awk nakah NUP party neh duh ah democracy mee a thehdarh ding i NUP in a neh pang ding ti ruah ah a minung zoh lo in Daw Suu hmin ih Party ding mi lawngte kha mee an rak pek. Cu ruangah ramhruai nak thuhla a thei taktak le a thiam taktak mi, an mah tei` party rak ding tu pawl hmuahhmuah kha an rak sung thluh. Ram hruai nak thuhla ah lamzin phunphun in pakhat asilo le a dang pakhat tiih thleng le ralkap cozah hi bawhlung lehnak vekin an thluak buai ding ko tuah thiam tu politicians an um lo tluk a si. Party pi NLD hin a party pi in ramsung ramhruai tu bik an si. Asinan Daw Suu lawnglawng an rinsan ih thawng sung ih an khuahkhirh zo hnu va rinsan kha nehnak a suah ter thei lo. A leng ih a um mi NLD hruaitu pawl in an NLD party siat bal ter lo ding ih kilven nak lawng an tuah ih, ralkap cozah neh ding in offensive ih do nak zianghman tuah thei mi an nei lo. Daw Suu thawn bangrep in a tuan thei tu hruaitu tam deuh neih an tul.
Cun, wester pawl pek mi bomnak khal hi democracy lam hruaitu tlunah zumnak a mal ruangah maw, democracy lam hruaitu pawl thil ti thiam lo ruangah maw ralkap cozah do nak hrangah anmah ralkap cozah tluk in do ve thei nak hnatuan nak ding hrang bawmnak a daih lemlo.
CW: : Tuikum hril awk nak hrang Chin ramkulh dinhmun in MP an cuh tum mi parah ziangtin na hmu..?
Lnk: :Kan sim zo vekin ralkap cozah thupek a thlun tu mi-ttha pawl an luh ter mi kha MP an cuh khal ah zianghman tuah ngam loin ralkap cozah ih mawng(fial) nak poh ah an feh ding. Hmin thatnak tivek kha an hei pek ding ih, kan miphun zuartu hmanah maw thuanthu ah an ra cuang leh men thei. Curuangah ralkap in hril awk ding an ti khal le hril awk nak boycott mi theory ruahnak thawn va cuh duh ve ding asi lo.
CW: : 1990 election ih MP pakhat dinhmun in ziangtin Chin mipi hnenah sim duh mi na nei?
Lnk: : Chin mipi ih an ruah ding simduhmi ah: Ral hmai ah khuk bil ih a thi mi cu thuanthu khalah a dik mi a tuah lo ruangah ralsia in a thi tiin hminsin tlak khi a si. An thil ti mi a dik rori mi kha mi raltha pawl cun an thih tiang teimak ngamhuai zetin tan an lak, an do tikah nehlam lamzin tampi an nei lai. An do cing in an thih khalah thudik ah raltha ngamsang in a thi tu hero miraltha mi tiin thuanthu ah an ruahnak le an hmin roling in an nung bet hrimhrim.
Kan suahnak kan ram le kan miphunpi kan duhdawt, kan tleihsannak le kan sianlo nak kha beidong in kan ngol kan hlawt awk ding zo vek Chin miphun khalin kan duh hrimhrim lo. A tu ah ramkip kan thleng, kan te kan fa in ramthangso fimnak an vun hmu lai dingih leitlun thuhla tha deuh in an theih tik ah ramri kaupi a neitu miphun kan sinak hi an thlau siang hrimhrim lo ding. Curuangah kan thuanthu a nung ringring mi history a si thei nak ding a tui san Chin mi hin kan tuah ding hrimhrim a si.
Kan ram laksak le kan miphunpi ci mit ter ding bumnak hriamnam 2008 uknak dan hrampi vek kha lungkim ih mee va pek ding cu ralsiat khuk bil in in bumtu pawl va tanpi tu mah le mah thihnak thlankhur laih khi a si. Thuanthubu sungah kan ram kan miphun siatral ter ding le hlo ding rak lungkim pi tu pi le pu tiin hmailam san deng tiang mawhsiat a tul ding mi tuisan sung minung zo hman si duh hlah uh si.
Kan ram in cuhsak nak le kan miphun cimit hlo ter ding lam siloin, kan ral pawl thawn khanphu hnih daihnak thawn a nung mi kan si nak ding, a dik mi nun dan a suah nak tiang kan do hrimhrim ding asi. San thuanthu cu cem loin a feh vivo ding mi a si. Atui kan neh hrih lo ava si hmanah tesin fapar Chin mi in a sansan pehte in an rawn kenkawh le an rawn do vivo ding mi a si ti langter kan tul. Cuti ih langter nakah 2010 hril awk nak upadi thawn hril awknakah mee pe lo, zo hman hril lo dingih kan duhlo nak kan lang ter lawngah kan neh tiang tlamtling le a nung ringring mi do nak peh vivo ding san thuanthu roling kan tanta tinak khi a si ding.
CW: :A lo contact duhtu pawl hrangah na address?
Lnk: :P.O.Box 26073, WashingtonDC20001
CW: :Man lo zet cing ten hi zat tikcucan in pek thei ruangah kan lungawi zet.
Lnk: :Kei khal hivek in kan thuruah mi mipi in rak siarve hai seh ti duh sak nak thawn nan website sungah thusim theinak can tha in pek mi hrimhrim hi ka lungawi tuk.
Sen Hngilh Piang | 