Pu Kap Tial interview
B.A (Thang), Salai
<< Burmese version Published 22.10.2010 at 08:00am (CET)
Burma ralkap cozah ih tuah ding mi 2010 election ah Chin State dinhmun in tuanvo la ih hoha tu ding – Chin State General Election Sub-Commission President Pu Kap Tial cu Chin World (www.chinworld.info) in mal lai thuhla suhnak kan rak nei ih a tanglam vekin a si.
CW: :Na nu le pa`i hmin le na suahnak in sim thei pei maw..?
PKT: :Ka nu le pa cu – Pu Lun Thang + Pi Sin Var tla an si. Falam Peng Bualkhaw khua ah 1939 ah ka suak.
CW: :Fimthiamnak lam na rak zir dah mi pawl teh?
PKT: :1967 kumah B.A (Law) thawn Rangoon Arts and Sciences University (RASU) ihsin tlawng ka theh.
L.L.B khal RASU thotho in 1968 kumah ka rak ngah.
1969 kumah Colombo Plan State Scholarship ihsin London University King`s College ah Post Graduate Studies in Conflict of Laws and International Law timi subject thawn kum (2) ka rak zir dah nan degree cu ka ngah lo.
1972 kumah H.G.P (Higher Grade Pleadership) tiih an kawh mi – Sihni sinak sang lethmat ka rak ngah.
1973 ah Advocate(b) thuthennak zungpi sihni tiih an kawhmi Sihni lam thawn pehpar in a sangbik lethmat ka rak ngah.
CW: :Acozah hnatuantu dinhmun in na rak tuan dah mi pawl tla theih kan duh.
PKT: :1973 kumah acozah Sihni hnatuan lakih a niam bik a si mi – Law Officer Grade 4 in hnatuan ka thok.
1978 kumah – L.O Grade 3 dinhmun in vuanthok (Gazetted Officer) ka si.
1981 kumah – L.O Grade 2 dinhmun in Selection Grade ka si.
1988 kumah – L.O Grade 1 dinhmun in Deputy Derector ka si.
1995 kumah Director dinhmun in Chin State Law Officer tuanvo ka lak.
Kum (60) ka kim hnu 2000 kum February thla ah acozah hnatuan ihsin Pension ka lak ih Falam khua ah ka um.
CW: :Ralkap acozah ih National Convention na rak tel dah nak thuhla theih kan duh.
PKT: :2004 kumah National Convention kum (8) lai an cawlh lawk hnu an thok sal. Keimah cu acozah lamin Chin State, Falam Peng aiawh ih kai tu dingah in hril ih ka rak tel. 2004 kum ihsin 2007 tiang vei (5) National Convention an tuah nakah ka rak tel ve dah.
CW: :Chin State ih Election Commission President dinhmun in tuanvo na lak rero tiah kan lo thei. Kau deuh in himi thu in sim thei pei maw..?
PKT: :Himi Chin State Election Commission ih tel tu zaten acozah lam ihsi hril ih tuanvo pek mi hlir a si. Chin State hrangah zung cu Haka ah ret a si ih, kan nih pawl cutawk hmunah zung kan kai. Member dinhmun in (15) kan um ih (9) pawl cu a tu fang acozah hnatuan rero lai an si. A dang (6) pawl cu acozah hnatuan kan si lo. Mipi hrangah rinsantlak milai pawl tiih an hril mi le tuanvo in pek mi pawl kan si.
CW: :Chin State Election Commission ih tel tu pawl hmin list in sim thei pei maw..?
PKT: :A tam sawn cu acozah hnatuan dinhmun ih tel an si ih an hmin pawl hnakin tuanvo an lak mi ministry pawl aiawh ih tel tu an si ruangah an hmin pawl cu ka lo sim lo mai ding.
CW: :Chin State Election Commission ih tuanvo le tuan rero mi pawl theih kan duh.
PKT: :Chin State sungah 2010 hril awk nak pi ah vote pe thei tu pawl zaten mai vote ciar kha lungkim zetin le zalen takih an pek theinak ding hrang kanmah pawlin kan hoha ding a si.
Kan kuthnuai ih a um tu Peng, township, khua le Sub-Commission pawl ah dan thawn mil ih hna an tuan thei nak ding hrang – thurawn pek nak, kilkhawi nak pawl kan tuah.
Mee(vote) pe thei tu pawlih hmin cazin fiangfel te`i suah thei dingah kan tuah.
Kan tlun ih um Myanmar General Election Commission ih tuanvo pek mi pawl tla Chin State sungah kan tuah.
CW: :A tu Chin State Election Commission dinhmun in ziangmi nan tuah rero.?
PKT: :Chin State Election Commission hnuai ih um Sub-Committee a dawtdawt pawl le Vote thlak nak ding inn/hmun ih tuanvo la tu ding pawl kha dan vekih hnatuan dingah kan zirh rero.
Mee(vote) thlaknak ding hmun kha sirhsan ah hmangin vote pe theitu ding cazin pawl kan tuah rero.
Political Party pawl khal dan vekih cangvai/campaign thei dingah kan bawm rero.
MP candidate pawlih tumtahmi le thuhla tete pawl fel ten zingzoi tahrat in a tlingtlak tiih ruah mi pawl ih thuhla tlun lam upa pawl hnenah kan kuat.
CW: :November ni 7 ah ten ziangmi tuah ding programme nan nei?
PKT: :Vote pe theitu pawl democracy dan le dun vek le zalen zetih vote pe thei dingah, vote petu pawl rori khalin vote kan pek mi a si timi an theih thei nak dingah kan zuam rero.
CW: :Hi 2010 hril awk nak hi free and fair a si ngaingai thei pei maw..?
PKT: :2010 election hrangah acozah in Election Laws & Election Rules dan le dun famkim zetin a suah sak zo. Election Laws & Election Rules vekih kan thlun thei asile 2010 hril awk nak cu zalen zet le free and fair hril awk nak a si ding.
CW: :ChinState dinhmun in teh hi hril awk nak hi a zalen mi le bangrannak a um mi hril awk nak a si thei pei maw..?
PKT: :Chin State dinhmun in a zalen mi le free and fair hril awk nak si thei ding cu keimah le ka committee pawl tel in a dawtdawt ih tuanvo neitu pawlih tumtah bik mi a si ko.
CW: :Dan le dun (Law) lam ih mithiam pakhat dinhmun in 2008 danhrampi hi ziangtin na hmu?
PKT: :2008 danhrampi ah democracy ram pawlih Basic Principles pawl a si mi (e.g S.21(a) Every citizen shall enjoy the right of equality, the rights of liberty, and the right of justice) pawl fiang famkim zetin tarlang a si tiah ka sim duh.
CW: :Chin World siartu pawl hnenah ziang cah duh mi le sim duh mi na nei?
PKT: :2010 hril awk nak hlawhtling zetih theh suak a si theinak dingah thlacamnak thawn kan bawm cio pei uh. A ra lai ding mi Parliament pawl ihsin kan State, kan rampi thangso in, a thleng danglam aw ding asile thinlung le beiseinak ret cio uh si tiah ka sim duh.
