|
Chin singer
KUNRIRAK (Ukte) INTERVIEW
"Boihte" timi hla ruangah Chin mipi lakih theih lar a hlawh zet tu, Chin tlangval note hlasak thiam "Kunrirak" (Ukte) cu Chinworld Team pawlin 28.3.2010 ah khan interview thusuhnak kan nei i ....
CW: : Na hmin ngai, na suahnak khua, na nu le pa hmin le unau pawl in sim thei pei maw?
Krr: :Ka hmin ngai cu Khaw Tin Uk, Ka suahnak khua cu Falam peng, Khuang Lung khua. Ka pa Tawk Bil, Ka nu Za Nei Tlem pawl an si ih unau 7 kan si.
CW: :Na fimthiam zirnak lam teh..?
Krr: :USA ah ka ra peh bet vivo tum.
CW: :Ziangtik in music lam na rak tum ih hla na rak sak thok?
Krr: : Ka kum 7 kim hrawng ihsin key 3 hla cu ka rak sak thluh thei zo.
CW: : Kunrirak timi hi nangmahte phuah awk mi maw, zo ih phuah mi a si.. ziangha a san in sim thei pei maw..?
Krr: : Kunrirak timi cu Band hmin a si sawn ih ka hmin ka ngan tel lo ruangah mi in keimah bulbak hmin ah an ruat theu. Kunrirak timi cu tlun zuang hmuahhmuah le leibok vak an el-awknak Tongkam a si ih (Kunrirak) timi Tong kam cu tangdor uh, thuai kuun uh tinak a si. “Mang ma kuun in, Kunrirak”, ti’n an rak el-aw sawng. Cumi cu tulai san thangthar pawlin kan miphun thuanthu kan hngilh lo nak dingih ka tar lang duhnak ruangah a si.
CW: :Hla teh paziat hrawng na phuah zo?
Krr: :Ka phuah mi hnak in ka phuah hrih lo mi a tam sawn lai. Ka phuah tum vek in ka ngan man dah lo. Nan..nan duh zawng hla cu ka nei ringring ko.(capoh kan hni nasa). A zate’n fing 50+ ti hrawng cu ka ready ringring ko.
CW: :Boihte timi hla kha chin mipi in kan lunglen pi nasat hlei ah kan uar nasa ih, nangmai phuah mi a si maw, ziangti’n nangin teh na feeling..?
Krr: :Boihte cu Siang Aung ih phuah mi a si.A tha ka ti nasa. Keimah in phuah khal sehla himi cafang thotho ka duh bik. Ka sak caan khalah ka thinlung i hngortu bik le thinthar i pe thei bik tu hla a si. Mipi in an rak tuar ve thei ruangah ka thin a thi nasa.
CW: :Mipi pawl ih cohlang thei le uar zet thei mi hla pakhat cang suak dingah ziang mi feeling thawn hla na sak theu..?
Krr: :Thil cu thinlung taktak ih tuah lawngah a nung ding. A liam cia mi vunruat in le vun mitthlam phah in thinlung kekkuai cing tei sak tlangpi cu a si.
CW: :Na Album a suak kum le a hmin in sim thei pei maw?
Krr: : 2006 December ah “ Ni Khatkhat Ahcun” timi Album ka rak suah.
CW: :Na Album hla pawl kha Chin mi tampi in kan uar zet ih, himi album na suah zik ah harsatnak tete ton mi na nei maw?
Krr: :A hmaisabik ah Chin mi hrangah cun sumsaw a si bik. Cun, Studio lam ih busy nak ruang khalah harsatnak a um.
CW: :Chin mi lak ah Chin hla zuar hi teh harsat deuh nak a um maw?
Krr: : A zuar lam cu a har lo. Kan zuar khawng tuk ko na’n Duhdawtnak hla (love song) cohlang thei tu kan mal deuh lai. Mah Chin hla hnakin hnamdang hla uar kan rak um velvo. Pathian misa ti aw pawl ih duhdawtnak(love song) hla an cohlang thei lo mi khal hi a har bik nak ah a tel ve. Khawsia hla kan sak lo pi. Miphun pakhat cun Pathian hla, Love song, Ramhla a um lawngah miphun picang a si thei. Zozo khal duhdawtnak nei ih Pathian semsuah mi kan si. Ziang hla khal ah thazaang pek-awk hi kan miphun in kan tul bik mi bik a si.
 CW: :Chin mi pawlin kan hla kan duh daan hi ziang tluk tiang a si tiah na ruat?
Krr: : Hla hi ziang a si ti a san thei tu le tuar daan (feeling) thiam tu kan si thei hrih lo. Kan tulsam tuk lai tiah ka hmu.
CW: :Album thar dang tuah bet ding tumtahnak na nei maw?
Krr: :Dam sung nun ah hla thotho. Hla lo cun hnem awknak kan neih si lo. Ka bei zeel ding.
CW: :Kan Chin mino pawl hi music lam ah ziang kan bang tiah na ruat? Forhfial duh mi na nei maw?
Krr: :Chin mino pawl hi hla lam ah le awnmawi khal ah kan thangso nasa. A mah lawng te zuam rero laifang ih thiambik kan tam tuk theu. Thinsau te’n thil kan ti len kan hlawhtling ding.
CW: :Na tik cu caan lawng pawl hi ziang ti’n na hmang tam bik?
Krr: :Awnmawi aw le hlasak aw hi ka thlingthla tam bik. Cun, hlafang ruat ah kan luu a zing vetvet theu.
CW: :Na ngainat bik mi le na ngainat lo bik mi hi ziang mi an si?
Krr: :Ka ngainat bik mi cu awnmawi a si ih, ka ngainat lo bik mi cu tiawter emem pawl thawi um tlang hi a si bik.
CW: :Mipi pawl hnen ihsi na theih duh mi tongkam le na theih duh lo theu mi tongkam in sim thei pei maw?
Krr: :Thazaang peknak tongkam hi ka thei duh bik ih, "a va buai tlak ve" timi tongkam hi zokhal ih kan theih duhlo bik mi si ko.
CW: :Mah te ih hlasak maw midang thawn hlasak tlang hi nuam na ti?
Krr: :A hla ih zirin si ko.
CW: :Hlasak lam cu na thiam zet ih awnmawi lam teh ziangmi tum na paih bik, ziangmi pawl si na tum thiam mi?
Krr: :A zaten’ ka tum thiam lo na’n ka tum thei thluh. Guitar hi cu ka vaidip ih ka ruah bik mi pakhat a si.
CW: :Na album suak hlan ihsin Salai Tuan Ling Thang VCD pawlih na telnak kan rak hmu i, ziang mi bik na rak tum sak theu?
Krr: :Kha cu ee, Bass kaitu um lo ruangah ka rak thai tuato men.
CW: :A tu USA ram na thleng zo ih na umnak khua in sim thei pei maw?
Krr: :Indiana State, (Caici khua) Indianapolis ah ka um.
CW: :USA ih um Chin mi pawl hi ziagnti’n na hmu a ziangziang ah?
Krr: :Aii..(huiha) an standard a sang tukih ka theithiam ruri hai lo.
CW: :USA hi kawlram na um lai ih na ruahnak vek a si maw?
Krr: :Kan khua, Khuang Lung ih Vate pel hman ka ngai sawn.
CW: :Hnakruh hawl rero lai maw na si? Maw a thup te’n na rak tong zo sawn ha?
Krr: : ……….. ka hla tuah ding mi ah ka buai tuk lai ee.
CW: :Chinworld.info hi na rak siar theu maw, ziangtin na hmu..?
Krr: : Aw.. ka rak siar ringring ho khaw. Himi Chinworld hi Chin mi hrangah a tha tuk ! Information ziangkim kan theihnak bik le Chin mi kan pehtlaih awk ringring thei nak kutzung a si ti’n ka ruat. Chin Radio siseh , thu le hla tla tampi theih ding a um ruangah ka lo lawm hai zet. Zuam sinsin uh. CW ih nan thil tuah mi pawl hi banrual ding a si lo. Nan ti tha thei tuk.
CW: :A lo contact duh tu pawl hrangah address na pek thei pei maw?
Krr: : klkunrirak@gmail.com ah in contact thei.
CW: :Leitlun Chin unau pawl hnenah cah duh mi na nei asile..?
Krr: :Kan tuah mi ah thazang pek thiam uh si. Thilthar hawl thiam uh si. Kan miphun ih tul bik mi nuncan ziaza mawi tlunthiam uh si ti ka cah duh bik.
CW: :Man lo zet cing ten na can tampi in pek nak par ah tampi lungawinak kan nei a si.
Krr: : Kei khal ka lungawi zet !
Justin Thang | 