Pi Kam Khant Dame (NDF MP Candidate) interview
B.A (Thang), Salai
<< Burmese Version Published 9.10.2010 at 19:30 (CET)
Burma ralkap cozah ih tuah ding mi 2010 hril awk nak tel tu ding democracy thanzang tumbik Party tiih kawh theih, National Democratic Force (NDF) Party candidate hrangah Yangon division ihsi cuh tu ding a hmaisabik Chin miphun Pi Kam Khant Dame cu, a politic hmuhdan, a ngaih dan pawl thei dingah Chin World (www.chinworld.info) in Chin mipi pawl thawn theihter nak hrangah tiah kan rak tarlang a si.
Pi Kam Khant Dam ih thuhla tawi;
Hmin: :Pi Kam Khant Dame@Kamno
Nu le pa hmin: :Pu Kam Za Hau
:Pi Dim Pum Cing
Suahnak khua: :Thuklai khua, Tedim township.
Suah kum: :1.12.1968
Hnatuan: :Lawyer
Fimthiamnaklam: :LL.B, DIL (2003), DBL (2004).
A aiawh mi Party: :National Democratic Force(NDF)
A cuhnak ding : :Pyituh hluttaw, Taung Okkalapah township, Yangon div.
A address: :No.12, 133 Street. Ma-u kone, Tamui, Yangon.
CW: :A hmaisabik ah na hnatuan le na fimthiam zirnak lam in sim thei pei maw..?
KKD: :Kei cu tu ah thuthennak zung lawyer(sihni) pakhat ka si. Dan le dun lam zirnak thawn tlawng ka theh.
CW: :Innsang na nei zo maw. Yangon ah innsungsang thawn um nan si maw..?
KKD: :Fala hnahkhat te ka si lai ko. Yangon ah keimah te ih um ka si.
CW: :Politic lamih na luh thok nak san in sim thei pei maw. Politic tuah nak ih na ruah/ngaihdan pawl tla theih kan duh i?
KKD: :Tuihlan ihsin mipi hrang bawm thei nak/hlawknak pe thei mi lu-hmuh-zi hnatuan pawl tuan ding ka rak phur zet. Pawlkom a phunphun khalah thei tawk rak tel ve phah in politic lam ihsi mipi pawlih tulsam mi kha thei tawk zuam sak ding ka duh ruangah politic lamih ka luh nak san a si. Rampi hamthatnak humhalh tu ding cangvaihnak zate cu national politic a si ko. Kei cu national politic tuah ding duhthusam nak ka nei.
CW: :NDF aiawhtu dinhmun in election candidate ih hril na si dan tla theih kan duh. Taung Okkalapah township candidate ih hril na si dan tla in ruah hnik aw.
KKD: :MP candidate pawl hrang registration tuah man pek nak ding form an khar zik zawngah NDF pawl pehtlaihnak ka tuah hai. A thok pek ahcun Tiddim township ih National Unity Party(NUP) ihsi cuh ve dingah hmin cazin ka rak pek zo. Yangon ih training ka kai lai ah Tiddim NUP pawlin keimah cu reserve hrang lawngih in ret thu ka thei ih independent candidate in cuh sawn dingah ka ruat aw thlang. Tiddim NUP thawn kan pehtlaih awknak a cat lak ruangah reserve men fang ih ka can nak a si thu ka thei. Cutin, journal pawlah party thuhla siar phah in, party dang hmuahhmuah hnak in NDF ka duh bik. An ai awh ih tel ka duh ve ruangah NDF Yangon division ih sizungzi hmu Dr.Myat Ngyanah Soe cu pehtlaihnak ka tuah. Dr. Myat Nyanah Soe in Yangon division ih NDF constituency lawng mi pawl in sim. Taung Okkalapah township ah lawnglak a um ih, cutin Taung Okkalapah ih ka cuh tumnak a si.
CW: :Himi zawnah thu malte lo suh duhmi ka nei. Yangon ah tlangpar mi nunau pakhat dinhmun ih cuh hnak cun Chin State ah party pakhatkhat aiawh in simaw, independent candidate in simaw, cuh ding a remcang sawn lo maw…?
KKD: :Kei cu Yangon ih tlawngkai ka si hlei ah a tu ka umnak hmun khal a si. Ka hnatuan nak khal Yangon ah a si. Yangon ih um mipi pawl cutluk an ruahnak a tenau ding tiah ka zum lo. Khui tawk hmun ihsi ka cuh a si khal le remcan lo nak a um thei ding ka zum lo. Party khalin in bawm rero ko.
CW: :Na zuam dingmi hi Yangon mayor U Aung Thein Lin tiah kan rak thei. Nangmai dinhmun in teh nehnak na co ding tiah na zum aw maw..?
KKD: :Ka neh ding tiah ka zum aw ko. Mipi pawl khal ka zum hai ko.
CW: :Campaign nak teh na tuah thok zo maw.? Harsatnak ton mi teh na nei maw..?
KKD: :Campaign kan tuah thok rero zo. NDF hotu pakhat a si mi U Thein Nyaunt vek politician mihlun pakhat thawn, a dang NDF party member pawl khal keimah thawn in thlun hai in pawl sawm nak in tuah bawm ih harsatnak a um lo.
CW: :Campaign na tuah dan style in sim thei pei maw..?
KKD: :Inn khat hnu inn khat ah va lut in candidate hmeltheih ter nak cahlap te pawl va zem. Cun, U Thein Nyuant in keimah cu mipi thawn hmel theih ter awk nak in tuah sak vivo. Mipi pawlin an theih fiang lo mi a um asile kanmah pawl in suh sal. Kan nih khalin kan thei tawk kan let sal. Zarhtin, zarhte zarhpi ni tivek ah campaign nak kan tuah theu.
CW: :Mipi hrangih na rak cangvaih nak pawl in sim thei pei maw..?
KKD: :Unicef le MCC (Myanmar Christian Council) kom aw ih an tuah mi sualnak tuah tu nauhak pawl le an parih siat suah nak a tawngtu nauhak pawl thuthennak zungah ka thiam mi dan le dun fimthiamnak thawn humhim in ka rak bawm dah theu. Miphun, biaknak thleidannak umlo in dan le dun thuhla ih bawmnak in ra dil asile man lak lo ih rak bawm theu dah nak tla ka nei. Thuklai khua, Tiddim township ah – mino thansonak innpi le mai thazang hmang nauhak tualleng tlawng ah president dinhmun in tuanvo ka lak rero. Santhar mino pawl fimthiamnak, sumdawnnak, nuntu khawsak hnatuan thansonak lam thawn a pehpar mi subject pawl tikcu ka nei asile ka neih vekin a lak in ka zirh theu hai. Politic lamih cangvaih nak cu ka rak nei dah lo.
CW: :Politic buainak, ei-in harsatnak, nuntu khawsak harsatnak a tuar rero tu mipi pawl hrangah tui tum hril awk nak hi ruahsannak um mi a si tiah na zum maw..?
KKD: :A tam le a mal ziangmaw cin tal cu a thleng aw ko ding tiah ka zum. A tu vek danglamnak umlo mi si ringring hnak cun mipi hrangah hril ding mi tete a ra suak tiah sim a theih.
CW: :MP pakhat ih tuanvo hi theih kan duh ih.?
KKD: :MP pakhat ih tuanvo cu mipi hrangih tulsam ding mi dan le dun pawl thehluh, rem a tul mi pawl rem that ding hi a si bik ko.
CW: :MP pakhat si tikah mipi hrangih thehluh duh mi dan le dun hrekkhat pawl --- thuthim nak pahnih khat te thawn in sim thei pei maw…?
KKD: :Mipi hrang tuah sak ding mi tampi a um ko. Parliament ah MP pawl zaten rel khawm ih a tu dinhmun ih tulsam mi, a poimawh bik mi pawl kha a hmaisabik ih thehluh ding a si ko.
CW: :MP candidate registration tuah nak hrang sumbur mi ziangtin na pahtlang. Na telnak NDF party in an candidate pawl hrang ziangti vekin bawmnak an lo pe.?
KKD: :Kei mai neih cia mi sum le pai thawn registration tuah man hi ka pe. Kan party cun campaign tuahnak lamah phur zetin in bawm sawn hai.
CW: :Ramsung mipi pawlih ruahnak vekin - Nunau pakhat dinhmun in mipa pawl thawn bangran ten politic nan tuah tlang nakah harsatnak na ton mi a um maw..?
KKD: :Danglamnak ih harsatnak si maw na sim.? Umm … a umlo ding tiah ka ruat. A bangrep aw theh ko. Mipa pawlih an ti thei vekin kan nih khalin kan ti thei ve. Campaign kan tuah lai ah innkhat hnu innkhat, lamzin pakhat hnu pakhat feh a si ih thenkhat pawl cu an tha a bang zet thlang.. U Thein Nyuant in, “na taksa a kham ve lo maw si? tiah in sut ih, kei cun “Chin nunau ka si, tlangpar nu fam teh. Hivek thamtham cu ka tuar thei tuk“ tiah ka let ih, a nih cun "a dik, a dik, ka rak theih hngilh pang ih cunah ho khaw“ tiah in let sal.
CW: :Hril awk nak hi mipi pawlin an thinlung a lut lemlo vek khi a si. A danglam cuang lem lo ding tiih an sim mi parah ziangtin na sim duh?
KKD: :Campaign kan feh lai ahcun interest lemlo vekin kan va tawng dah lo. An interest lem lo asi khal le cumi cu media ruangah a si ka zum. Hril awk nakah zo pawl an tel ding, ziang mi an tuah rero timi pawl mipi hnen ah thuthang tete theih ter ringring thei si sehla an run interest zet ding. Campaign kan feh lai ah innkhat hnu innkhat lut kim thei thluh ding kan zuam. Cuti vekih kan tuah nak khal cu mipi pawl thawn nel awk kan duh ruangah a si.
CW: :USDP sawisel ngam tu hi UDP party lawng a um. Democracy force tumbik a si mi NDF party le a dang party pawl in an sawisel mi hmuh a si lo. Tuvek dinhmun hmanih nan sim ngam lo ah teh, neta ah sim tul nak um khal sehla nan sim ngam lo ding tiah Party pawl hi ka lo sawisel duh.
KKD: :An sawisel ngam lo mi a si ding cu ka zum lo. An nih khal an mai hnatuan tuan, mah khal mai hnatuan tuan cio sawn ruangah a si ding. Hril awk nak theh tikah parliament a ra suak dingih cutik ah zatei` sim le rel khawm vialvo a si ding tiah ka zum.
CW: :USDP candidate Dr.Hmuh Thang in 2008 danhrampi kan pom thei ruangih election lut ciocio pakhat le pakhat nang cu ralkap party, kei cu civilian party tiih rel awk ding a mawi lo tiah Chin World thawn interview kan tuah nakah in rak sim dah. Nang in teh ziangtin na hmu?
KKD: :Election ih lut tu milai pawl kan zaten kan thlennak ding hmuitin cu a bangrep aw thluh ko. Hmun pakhat lawngah a si ko. Parliament ah hril tlin cia mi pawl zaten group pakhat ah an cang ding. Cutikah, cui party cu, hi party cu tivek pawl an ruat paih nawn lo ding tiah ka zum.
CW: :Chin miphun le Chinland hrangih na thinlung duhsaknak theih kan duh.
KKD: :Kan nih Chin miphun pawl cu Kawl pawlin in hmuhsuam timi ruahnak kan neih ringring mi te hi a thalo tiah ka ruat. A taktak ahcun Kawl pawlih hmuhsuam thei dingih kan um ruangah sawn a si. Mai miphun, mai State hrangah mah rori in tanhmun la in, tuanvo lak thei ding zuam a tul. Pehtlaih awknak a harsa mi tlangsang karlak pawlih um kan nih Chin miphun hrangah thansonak lam hnatuan pawl, nuntu khawsaknak lam hnatuan pawl tuan ding ka cak zet. Ka suahnak a si mi Thuklai khua ah mino thansonak innpi ka tuah nak san khal mai miphun pi pawl an nunram khaisan duh nak lungput ruangah a si. Cutivek mino thansonak hrang innpi pawl kan state pumhlum ah tuah/ong thei vivo ding, Chin miphun pawlih nunram khaisan ter theinak ding thansonak lam pawl cak zetih tuah thei ding ka zuam rero lai.
CW: :Chin Party a si mi CNP, CPP pawl parah tha pek duh mi na nei asile sim hai aw.
KKD: :Chin miphun pawl umnak Chin State ah Chin Party pawlin hmun ngah dingih an zuamnak ka rak hmuh tikah ka lung a awi tuk lawmlam. Very welcome rori a si. Hril awk nakah CNP le, CPP pawlin nehnak co thei hram hai seh.
CW: :Kan hmai hril awk nakah vote pe lo in le dokalh dingih an sim rero mi pawl thawn pehpar in ziang sim duh mi na nei..?
KKD: :Vote pek ding le ding lo hi milai pakhat hi covo a si. A zalennak neih mi khal a si. Hi zawn ah mitu khalah ka rak sim zo. A danglam cuanglo mi dinhmun pi sung ihsin hril ding a ra lang mi hi beiseinak pakhat a si. Hril awk nak ih tel tu candidate pawl sungah hnatuan taktak tu ding, mipi hrangih tuan a duh ngaingai tu hril tlin an sile Parliament ah mipi hrang a ngah thei sun hmuahhmuah a tuah vivo thei. Curuangah mipi pawl cu Vote thlak uh tiah ka sim duh.
CW: :Chin World ihsin Chin u le nau pawl netabik sim duh cah duh mi na nei asile ….
KKD: :NDF Party candidate dinhmun in Yangon, Taung Okkalapah township ih cuh a tum tu keimah cu Chin mipi pawl karlak ah hmel theih ter awk nak hrangih in tarlang tu Chin World hnenah ka lung a awi ngaingai a si. Hril awk nak ih luh hlan te ah ka miphun pawl a si mi Chin miphun pawlin tha in ra pek rero hai tiah ka ruat aw. Chin World parah ka lungawi zet. Interview in tuah nak a rak siar tu ding Chin mi u le nau pawl par khalah ka lung a awi. Nan zaten Pathian hnenah hril awk nakih ka neh thei nak dingin thla in rak cam sak hram uh. Nan theih cia vekin Yangon, Taung Okkalapah constituency ah Yangon Mayor General U Aung Thein Lin thawn zuam aw ding kan si ih, David le Goliat vek kan si. Asinan, ka zuam nak ding constituency ih mipi pawl le Chin mipi zate nih in bawm asi ahcun ka neh tengteng ding a si. Chin miphun pawlih thapeknak thawn lawngin kei cu miphun dang karlak ah ka mithmai a nau lo ding a si. NDF Party meeting nak khalah Yangon ih um Chin miphun zaten NDF ah mee an pek theh ding, ziangah tile Chin miphun pakhat NDF ih a um ruangah a si” tiah ka rak sim dah hai. Yangon khui tawk hmunih na um a si khal le NDF vote na rak pe asile keimah kha vote in pe tinak a si. In bawm hram uh tiah Chin miphun zate hnenah ka sim duh. Khamouh lukhum kha rak vote cio uh tiah.!
