Ni Lawng (ENDP - GS) Interview
<< Burmese version Published; 21.9.2010 at 19:00 (CET)
Ralkap acozah in a tuah ding mi kum 2010 Burma rampum hril awk nakah telin, Chin State, Chin miphun hrang lawng hman silo, Union of Myanmar ramsung ih um tlangpar mi zate hrang a ti thei tawk ih tuan ding tumtahnak thawn tel a tumtu Ethnic National Development Party (ENDP) ih dinhmun, cangvaihnak pawl Chin mipi in an theih thei nak dingah ENDP ih General Secretary Pu Ni Lawng cu Chin World (www.chinworld.info) in Chin State, Matupi khua rori ah va feh in hmaiton thusuahnak kan rak tuah. Pu Ni Lawng hi Pakokku University ihsin M.Sc (Geography) thawn tlawng thehsuak zo tu, kum 30 hnakih upa deuh fangfang, Mara miphun pakhat a si.
(Zuk: ENDP GS Ni Lawng >>
ChinWorld: :A hmaisabik ah ENDP nan rak din thok dan in sim thei pei maw..?
Ni Lawng: :ENDP pawl Kum 2009 October thla ah khan Chin ram Matupi township, Lai Len Pi khua ah kum 2010 election ih kan tel ding le ding lo rel tlangnak kan nei. Cumi hnu 2010 April thla ah Lai Len Pi khua thotho ah meeting nak nei sal in, 2010 election lut ding in thu nemhngetnak kan tuah thei. Kan party hmin dingah ENDP(Ethnic National Development Party) siseh tiah kan rel cat. Kan Party register tuah tu dingah Pu Van Cin - hotu, keimah Pu Ni Lawng - hotu sang pawlin Naypyidaw, Pyidawngsuh commission ah register kan tuah. Party hmat-pung-tin No.33 thawn election commission in June 16, 2010 ah lungkim nak in pek. Kan Party central ministry cu Matupi township, Lai Len Pi khua ah kan ret.
ChinWorld: :ENDP hin tui tum hril awk nak ih cuh nan tum dan dinhmun le Party din tu pawl zoh tikah chinmi leh chinram sung lawng ih cuh tum vek in kan lo hmu. Ziangruangah Chin party pakhat dinhmun in nan ding lawlaw lo?
Ni Lawng: :ENDP hi miphun pakhat hrang lawng siloin Union of Myanmar sung um tlangpar mi (ethnic) hmuahhmuah hrangah ruat ih din mi a si.
ChinWorld: :ENDP ih policy leh tumtahmi kan thei duh?
Ni Lawng: :Union Of Myanmar ram sung um tlangpar mi zaten bangrannak(Equality) neih thei nak ding hrang, milai covo (human rights) ngah nak dingah le thansonak ding hrangah tumtahnak kan nei.
ChinWorld: :ENDP ai-awh ih cuh tu ding candidate paziat nan nei? Candidate pawl ih hmin le an cuh tumnak hmun pawl in sim thei pei maw?
Ni Lawng: :Sumpai lam harsatnak le Election Commission in candidate hmin cazin ap nak tikcucan in pek mi a maltuk ruangah hmun 3 lawng ah kan cuh thei ding. Amyotta Hluttaw ah Pu Sang Hlei Mang, State hluttaw ai aw ah Pu Van Cin in Matupi ah a cuh ding ih, State hluttaw ai-aw in Haka ah Pu Hla Mang in a cuh ding.
ChinWorld: :Party fund hrangah ziangtin sumpai nan hawl?
Ni Lawng: :Party fund hrangih tulsam mi sumpai cu – Keimah Pu Ni Lawng, Pu Sang Hlei Mang, Pu Van Cin pawl in kan neih mi sumpai thawh khawm in, a remcang thei tawk in party hnatuannak ah kan hmang. Cun, member mipi lam khalin bawmnak in pek mi tla a um. Asinan, a tam bik in hlu thei mi cu Kyat-50000 lawng a si.
ChinWorld: :ENDP Party hin ziangmi harsatnak pawl nan nei ih cumi pawl cu ziangtin nan pahtlang tum?
Ni Lawng: :Kan harsat ton bik mi cu sum le pai lam hi a si ko. Himi harsatnak hi pahtlang a harsa zet nan kan Party policy feh pi dan thawn a cang thei tawk pah tlang ih hnatuan thei ding kan tum.
ChinWorld: :Chin party pawl a si mi CNP, CPP pawl thawn teh ton awknak nan nei dah zo maw, tanrual ih kom awk ding nan tum maw..?
Ni Lawng: :CNP, CPP pawl thawn voikhat hman tonawk nak kan nei dah hrih lo. Chin State sung ih cuh a tum tu party dang pawl thawn tla tu tiang thurel tlangnak a um hrih lo.
ChinWorld: :Mipi hnenah campaign nan tuah thok zo maw, ziang nan bang ?
Ni Lawng: :Mipi hnenah kan party policy simfiang nak cu kan tuah zo. Mipi lam khalin an thinlung a lut zet. Campaign nak thawn pehpar in kan hlawhtling zet ko.
ChinWorld: :ENDP in hluttaw sungah hmun nan co ngah asile Chin mipi hrangah ziangmi nan tuah/rel sak ding? example 1, 2 hrawng in sim thei pei maw..?
Ni Lawng: :Hluttaw ah hmun kan co ngah asile miphun pakhat ihsin a dang miphun pakhat parah khuahkhirh hrekkhawng nak umlo dingin tuah kan zuam ding.
ChinWorld: :Politics, pursum leilawnnak, ei le in harsatnak, social problem a nei tu chinmi pawl hrangah 2010 election hi ruahsannak pakhat a si thei pei maw?
Ni Lawng: :Hi 2010 election hi zumtlak lo nak tawkfang nawn a um ko nan mipi hrangah hamthatnak (chance) pakhat khat cu a um ko ding.
ChinWorld: :2008 Constitution thawn pehpar in ziangtin sim na duh?
Ni Lawng: :Kum 2008 constituion ihsin Chin State hrangah hamthatnak(chance) a mal tuk. State prime-minister kha President ih hril ding a si ruangah Chin mipi hrangah thatnak lam a suahpi pei maw timi kha thinphang um tuk. Chin mipi in Chin State Prime Minister ding kan hril thei lo.
ChinWorld: :2010 election hnu lamah teh ziang mi thleng awk nak a um thei ding?
Ni Lawng: :2010 election hnu lamih thleng danglam awk nak um thei ding cun dan hrampi kha rem thei dingah Party zate in zuam khawm cio a tul ding tiah ka sim duh.
ChinWorld: :ENDP in hmailam tikcucan ih nan cangvaih tum dan in sim thei pei maw..?
Ni Lawng: :Hmailam tikcucan ih kan cangvaih tum dan cu Union of Myanmar ramsung um tlangparmi(ethnic) zate hrangah dingin tampi tuan sak thei kan tum.
ChinWorld: :ENDP ih General Secretary tuanvo kai rero tu nangmah teh election ah cuh ve na tum maw? Party dang hotu pawl tla an cuh tum hai.
Ni Lawng: :ENDP Party ih GS tuanvo ka lak zo ruangah MP cuh rero ding hnak cun kan party policy a feh tluang nak ding le Party tha tei a nun thei nak ding, rinsan tlak party pakhat a si thei nak ding hrangah tikcucan pek ka tum sawn.
ChinWorld: :Chinworld insin 2010 election tuah hlan Chin mipi hnenah ENDP dinhmun in ziang na sim duh.
Ni Lawng: :2010 election tuah hlanah party dang pawlin mipi vote kha paisa thawn lei an tum hai ding ka phang. Vote pawl hi paisa thawn lei lo in, vote ih man neih zia kha mipi in an theih fiang ding ka duh. Vote pawl paisa thawn lei tum tu an um asile - cumi pa cu mipi hrangah siloin amai hamthatnak ding hrang lawng ruat tu a si tiah ka sim duh. Chin State le Chin miphun thansonak hrangih tuan thei tu ding Party lawng kha vote pek uh tiah ka sim duh.
ChinWorld: :Man lo zet cing ten tikcucan tampi in pek ruangah kan lungawi zet.
Ni Lawng: :Kei tla Chinworld parah Lungawinak tampi ka nei.
(By…B.A(Thang), Salai)
