|
Dr.Van Thiang interview
 Kan Chin mi nunau lakah rinsan tlak Pathian hnatuantu, kandung naite ah Doctor 2 theh suak zo in a pathumnak kai peh rero tu kan neih sun Dr.Van Thiang cu www.Chinworld.info in hmaiton thusuhnak kan nei ih a hnuailam vekin a si...
Q : Na hmin ngai, na nu le pa hmin le na suahnak khua pawl in sim thei pei maw..?
A : Van Thiang ka si ko. Kan lam mi ih duhkawh daan cun Ei Thiang tin in ko theu. Ka nu le paih hmin cu Nu Nuam Rem le Pa H. Do Khaw Lian an si. Unau pa (7) kan si ih kei hi fanu upabik ka si. Ka suahnak hi Falam khawpi Vankau Zato in ka suak. Bualkhaw mi kan si ih Bualkhaw khua ah tuni tiang kan um ko.
Q : Tlawng na rak kai dah nak pawl le na theh zo mi pawl teh?
A : Kei hi cu Bible tlawng lawnglawng kai in ka tikcu ka hmang a si hi..Ka nauhak ihsin thok ka tlawngkai mi le ka tlawngkainak hmun pawl cu:-
Basic Primary cu Bualkhua le Zawlnu ah, Middle School cu Bualkhua ah le High School cu Falam ah ka kai.
Cumi theh ah Zomi Theological College, Falam in Diploma of Theology (Dip.Th) siseh, Grace Bible College, Gurgaon, Haryana, New Delhi, India in Bachelor of Theology (B.Th), Berean Baptist Bible College & Seminary, Bangalore, India ihsin Bachelor of Divinity (BD) siseh; Manila Theological College & Graduate School, Philippines ihsin Doctor of Ministry (D.Min) le Doctor of Philosophy (Ph. D) pawl ti tentoten Pathain bomnak in ka theh suak zo. Tu laifang ahcun Philippine Christian University (PCU) ah Doctor of Missiology (D. Miss) ka zir betih Dissertation ka ngan thok rero.
 Q : Kawlram ih Pathian hna na rak tuan thok dan le tuini tiangih na dinhmun in sim thei pei maw....?
A : Hi tin a tawi zawng in run lo sim ning la a fiang bik ding ka zum;
Bible tlawng ka theh veten Chins for Christ in One Century (CCOC) palai in kumthum pum ka pe aw ngah ve. Bible tlawng ka kai san hi mission hnatuan ka duh tuk ruangah ka kai mi a si ih saduhthah tluk in tuan thei hlah hman ningla mission hnatuan tu lak ih ka tel ngah ve hi Bawipai hnenah ka lungawi zet. ZBC ih in retnak khua Mindat peng, Madat timi khua ah kum 2 ka tuan hnu, ZBC ih fialnak bangtuk in CCOC Revival Group ah kumkhat ka feh ih Thantlang peng, Haka peng, Tedim peng, le Kaley valley pawl ah kan feh. Kan tuan sungah kan rualnu Palai Ngai Za Siam in Thlantlang peng Hmawngtlang khua kan thlenah mual in liam san men ih kum tluan mitthli lak ihsin nun thuthup thukpi ka zir ta.
Cun, FBA ramsung area pathum ah pastor ka tuan. KTC area pastor in Suangdo Baptist Church ah siseh; Rih Baptist Area pastor in Rihkhawdar Baptist Church ah siseh; Zinghmuh Baptist Area ihsin Tlangzar Baptist Church ah siseh ka tuan ih Falam peng sung ih pastor tuan hi a nuam tuk bik hmang pei maw ka ti ih Bawipa ka thangthat.
Cuihsin, Falam Baptist Association ih Women Department ah Secretary hna ka tuan. Ka tuan sungah kan Chinmi nunau pawlih dinhmun ziangtluk khaiso le somdawl kan tulzia ka hmusuak vivo.
Q : A tu netabik doctor degree tiang ngah thei dingih tlawng na kai nakah harsatnak ton mi na nei maw..?
A : Sponsor fumfe nei lo le scholarship ngah lo rori, zumnak thawn tlawngkai dingih ra pok ka si vekin harsatnak cu tampi ka tong ko. Ka kut sung paisa pia khat hman um lo caan a tam zet nan, mitthli thawn thlacam phahin ka zuam tento ih degree ka hun ngah taktak cu mangbang za taktak a si. Pathian zangfahnak lawnglawng asi ko. Ka harsatnak le mitthli tlaknak hmuahhmuah cu Graduation ni ah lungawinak mithli thawn ka khat. Pathian in duhsaktu rualpi tete pawl hmangin a ceuhceuh ten in cawm ih kar khat hnu kar khat hmailam ka pan vivo thei fang asi hi.
Q : Hmai lam canah tlawngkai pehzom vivo na tum maw asilole Pathian hnatuan na tum sawn.?
A : Tu ka zir rero lai mi ka theh thei hnu cun Bawipai rem tinak poh ah tuan ding ka timtuah.
Q : Pathian hnatuan nakih harsa na ti bik mi asilole har na ti bik can?
A :Pathian hna ka tuannak ah mi bawm ding tampi ka hmu nan ka bawm thei lo tikah le Pathian thu ziang siar lo pawl ka hmuh tikah ka ning a na zet theu.
Q : Chin mi pawl raltlan sinak dilih ramdang an feh ciamco hi ziangtin na hmu?
A : Tikcu le can a thleng awk vivo vekin minung kan dinhmun khal a herkual aw vivo ve ih cumi sungah Chin mi pawl khal kan mang hmanih man dah lomi thu le hla a hung suah tik ah ruah ding tampi a um ka ti. A miatnak a um vekin a sunnak khal tampi a um ve ko ding. Rev. James Tial Dum ih a rak sim ringring mi “Luangsuk Pathum” thu hi a dik tuk ka ti. Kan dawm thatha le kan paisa lawng hman siloin neta bikah kan minung tiang kan luangsuak vivo kan ti le kan palh tam lo ding tin ka ruat. Hmailam tesinfa tiang vun ruah ah cun PiPu roh ta mi kan ramte hi a hmuihmel cuan ter a har ngaingai in ka hmu.
Q : Ka lo sut ngam ke maw aw,!!,,, na hnakruh hlo sar ngah tu an um zo maw?
A : Hehehe! Ce-re-kheu-law! Thin le ham kai aw lo in tuah zik ual aaa! Si ngai si ti aw, ruat ding tha a si ve ngai. ka hrangah cun, thit duh tu an um tla si men ding nan duhdawt zawnruah tu ton hi a har e! Bawipai khawkhan lairel si ko ding ka ti ko.
Q : Hmailam kan Chin miphun hrangah ziangti vekih hnatuan na tum? Biaknak lamah ziangmi kan tlasam/tuah that kan tul bik tiah na hmu?
A : Chin mi pohpoh Nunau le Mipa, Farah le Milian, Mifim le Mi aa thleidan um lo ten pakhat le pakhat thupit ter awk in duhdawt aw ton taktak thei ding hi ka saduhthah a si bik. Biaknak lam thu in kan zoh tik khalah mah le mah duh aw thei si lo ih mi dang duhdawt zuam hi a si thei ngai pei maw ka ti theu. Kan neih lo mi thil midang pe tum kan bang pang pei maw tin ka ruat.
Q : Chin mino pawl nangmah vekin ramleng ih Pathianthu zir ve duh pawl hrangah ziangtin idea pek na duh?
A : By faith ih kekar hi ol a bang nan a ol lo caan tampi a um. Bawipai duhnak a si ah cun a har hmanah harsak suahsannak ding sangka khi on in a um ko ding. Bawipai sangka on mi an hmu ahcun feh ding a si ko. Bawipai thatnak rah tampi an tong ngah ve ding.
Q : www.chinworld.info hi na rak zoh ve dah maw?
A : Chin World info hi ka zoh tam nasa. Pathian hla tete nan retmi tla cu ka duh thei tuk. Ka cazoh phah ah ka ngai ve theu ih nuam ka ti zet. Hi tawk rualpi hrekkhat Hakha pawl tla cun ka hnen ihsin an la sin theu.
Q : Leitlun Chin mipi pawl hnenah cah duh mi na nei asile...?
A : Chin mi hrangah ziang Theology le zirhnak dangdang thleng hman seh la Jesuh Pathian lawng hi kai hnget in duhdaw le lungrual aw ten kan miphun kan calai, kan tong khai sang ding hi hngilh siang lo ding hi ka cah aw duh bik. Cun kan thlennak kip ih miphun pawl lakah a tel ve lawng siloin an rinsan ih hoha tu ih ret mi si ding tiang ih mi hnam dang hoha thei tu si a tha in ka hmu. Hruaitu si dingah a cuh tu silo in mi kan duhdawt le zawnruahnak ruangah mi pawlin duhdawtnak thawi cawisan mi si hi a thupi zet in ka ruat.
Q : A lo contact duhtu pawl hrangah na address, e-mail, phone...?
Ka Hmin: EiThiang
Ka Address PCU –UTS Campus
Dasmarinas 4114
Cavite,
Philippine
Cell nos. 0063-9164795306
Email: eithiangbk@yahoo.com
Q : Hi zat tikcucan in pek ruangah kan lungawi.
A : Kei khal ka lungawi ve. | 