CW: Khuitawk hmun pawlah tlawng na rak kai dah in, ziang mi pawl na theh suak?
RB: A hmaisabik ah Pakokku ih Wesley Methodist middle school ah tlawng ka kai ih, cuihnu ah Mandalay ih Catholic tlawng St.Peter High School ah ka kei leh. Cu tawkah kum 8 ka kai ih, phun 8 ka ong. Cumi hnu ah Falam high school ah kai in, kum 1968 ah phun 10 ka ong.
Cumi kum ah, Rangoon ih Institute of Econbomic ah ka lut. 1968-69 ah University Outstanding Student (Luyechhun ) ih hril ka si. 1971-72 ah Rangoon university i tlawngta pawlpi ah secretary ah in hril. 1972 ah B.Econ. degree ka ngah.
Cule zirnak lam ah peh sehla, 2005 ah Alaggapa University ihsin, India History in M.A. ka ong ih, 2006 ah M.Phil. ka la. 2007 ah Bangalore i Faith Theological College and Seminary in Indian Church History thesis in Ph.D ka ngah leh.
CW: Mizoram ah kum reipi Daily thuthangca larbik neitu le suahtu na si tiah kan rak thei ih, ziangmi thuthangca, Magazine pawl na rak suah in ziangtik kumah Mizoram na rak thleng. Ziangti vekin na rak tuah thok.?
RB: Mizoram ah 1976 in ka um thok. Ratu high school ah teacher ka tuan ih, cui hnu ah Mat le Tut phai ah kum 2 lai hmuan tla ka tuah. 1983 ihsin, Zoeng Megazine ka suah thok, Mizoram ih news magazine a hmaisabik a si. Cule 2000 kum ah Hnehtu daily ka suah leh.
CW: Cabu ngan mi le suah zo mi na nei maw..?
RB: Ca hram ti cawk lo ka ngan nan cabu cu ka ngan hrih lo. Mi nganmi uk 3 cu kei mai sum in ka suah ih, a lak in ka zem.
CW: Mizoram pum huap in laksawng ngah mi na nei dah maw..?
RB: Mizoram pum huap in Best Magazine lawm man 7 ka ngah ih, best daily lawman pakhatnak ka ngah.
CW: Mizoram na umlai ah kan Laimi mi harsa, mi rethei tam zet na rak bawm dah ti khalin kan lo thei ih zo vek pawl le zingvek ih mi harsa pawl ziangtin na rak bawm theu?
RB: Mizoram i ka um lai ah mi ka bom mi pawl hi kan ngan tlem thei lo ding ih tlun ah mah porhaw tla ah kan cang tuk pang ke. Asinan mal te ka sim duh mi cu Bible tlawngta 6 lai cu keimah ring rori ih kai an si. A dang 20 lai khal sum mal te te in ka bom ko. Damlo pawl ka bom thei tawk in ka bom, ka lungkim zet mi pawl cu ka Maruti car ah mithi ka phur dah lo ding ka ti mi kha Mother Teresa a thih ahkhan a mai pek awk nak thei ringring in, ka car in mitthi 3 driver dang thawn ka phurh ter, kei mah rori in mithi 2 ka phur.
CW: A tu na umnak hmunah ziangti vekin kan miphun hrang hna na tuan peh vivo, ziang mi tuanvo na kai?
RB: Delhi ka um hnu kum 6 sung ah Chin Refugee Committee ah fund chairman ka tuan dah, Falam Union President tum hnih ka tuan. Delhi Burmese Christian Fellowship ah kum 5 sung chairman ka kai, tu ah vice chairman in ka um. Mi harsa bomnak Burma Charity Fund ah a hmin in director ka si.
CW: Kan miphun lungrual theinak dingah ziang mi kan tul?
Na hmuhdan in sim thei pei maw..?
RB: Kan miphun lungural thei nak ding ah ngaithiam awk nak pawl, midang hrasat nak theih thiam pi nak pawl, midang hrang khawruah nak pawl kan tul in ka thei.
CW: Ziangti vekih tan kan lak asile kan calai a thangso ding..?
RB: Kan calai thanso nak ah hin ca ngantu pawl sum le pai lamin kan bom thei a tul. Cauk suah nak nei si lo, leh lamah cangan thiam thiam kan tam zet in ka thei.
CW: Tulai kan Chin mi pawl refugee ngah ih ramleng kan suak ciamco hi ziangtin na hmu ?
RB: Kan ram a harsat tuk tik ah refugee I kan suah ciam co cu a tul ko. A si nan kan Lai ram le kan Lai miphun an nghilh lo nak ding I a kai khawm tu pawl a um cu a tul in ka thei. Ram tha feh tu pawl hin an sung khat lawng si lo in kan ram an run bom thei nak ding kan tawlrel pi a tul nasa.
CW: Kan
Chin ram hrangah ziangti vekin vision na nei? Lairam thansoter nak dingah ziangti vekin sunmang na nei?
RB: Lairam thanso nak ding hi kum 40 lai cu ka ruat zo nan a tak cun ziang hman ka tuah thei hrih lo a si hi. Nikum I South India ka tlawn lai ah khan "Ka Tlawn Ram" tiin ka sun mang pawl ka ngan zo I, tui kan thusuh awk nak ah cun ngan cawk a si lo ding. Rihli mawi zet I tuah dan ding, Falam khau thanso tir dan ding, Lo thlawh dan pawl, kawhhran kan tuah that dan ding pawl tla cu nah ka ngan a si.
CW: Leitlun Chin mipi hrangih na thucah duh mi?
RB: A cangcang cun kan thenaw ruri theu nan a ngaingai a ra thlen ah cun Lai (Chin) miphun thotho kan si. Cui ruang ah cun kan theih tawk I rualrem nak kan tuah ring ring a tul ko.
RB: Nan Chin World thuthang hi ka siar thluh lo khal le ka ong ring ring ko. Nan ti tha nasa. Nan pek awk thei dan ka lo fak zet a si.
CW: A lo contact duhtu hrangah na address in sim thei pei maw..?
RB: Ka address cu ZRA 249, Nihal Vihar, Nangloi, N.Delhi, India ti a si I, ph. Cu 0091-9212070537 a si.
CW: Tikcucan pe in thuhla hi hmuah in sim thei ruangah kan lungawi zet a si.
RB: Kei khal ka lungawi.
