Mai Lal Rin Kim@Chili Tiger (Tiger Girls Band) Interview
B.A (Thang), Salai
Burmese version
Click here>>
Published: 2.9.2010, 04:00am (CET)
"Chinmi pawlih leitlun” tiih kawh mi Chin World (www.chinworld.info) cun Chin ram ihsi theih tlak pasal tha nuhleitling pawl Chin mipi le Burma ram mipi hnenih theih ter dingah tuanvo a nei. Cui a tuanvo neih mi hnuai ah tui zarh sungih a phuansuah duh mi cu – Mai Lal Rin Kim @ Maa Kim hi a si. A nih hi leitlun ih hminthang Spice Girls music band pawl vekin Burma ram sungah a hmaisabik nitlaknak ram lam nunau music band vek a si mi Tiger Girls timi band ah Chili Tiger ti hmin thawn tel tu a si. Hi band hi tikcucan reilote sungah leitlun thuthang pawlih ngaihsak hlawh zet in, leitlun ih nunau music band ropi Spice Girls thawn hman an tahthim hial. Mirang le Kawl – tong cihnih hmangin an hla pawl cu Burma ram sung lawng hman silo, international tiang ih zuar suak thei dingah tumtahnak neiin thei tawp a zuam rero tu pawl an si. Mague khua ih show an va neih hnu Yangon an ra thlen sal ve ten Chin World Media casiartu pawl hrangah hmaiton thusuhnak kan rak nei thei.
CW: :Na nu le pai hmin le na suahnak khua in sim thei pei maw..?
Chili T: :Ka nu le pa cu Pu Sang Hlei Ling le Pi Lian Hlei Sung tla an si. Ka suahnak cu Kalay Towhship, Siadaw khua a si.
CW: :Fimthiam zirnak lamih na tehsuak mi teh…?
Chili T: :Bsc(Math) in Yangon ah tlawng ka thehsuak.
CW: :Na nauhak lai ih na si duhmi sunmang hi ziang a si. Hlasak thiam pakhat si dingah teh tumtahnak na rak nei dah maw..?
Chili T: :Ka nauhak lai ihsin hlasak paih zet mi ka si, Sunday school ah tla hla ka sak theu. Hmansehla Professional singer ka si tengteng ding ti cun ka tumtah ngam lo nan ka si duh mi bik cu a si.
CW: :Lai Hla Album paziat na suah dah zo? Cumi thu thawn pehpar in mal lai in sim thei pei maw?
Chili T: :Lai hla Album 2 ah ka sak zo ih, Pakhat cu Falam hla lovesong ''RIN UM TEN'N'' timi ah a si. Sponsor tu hi Tikhing Awnmawi (Canada) an si, singer Pathum (SUSAN, THLAPI, MAKIM) tin 2009 ah CD in suah asi. Pakhat leh cu Mizo Gosple hla "I THU NISE'' timi a si. Kei leh ka rualpi pahnih (Estheri & Edentharnghaki) kan pathum in 2010 ah CD tho tho in kan suah. Hi Album 2 hi kan thei tawk in kan zuam mi a si, tu ahcun ram dangdang ah zem suah asi zo ih, in bawm ciar ding in ka lo ngen duh, in rak leisak zo tu pawl hnen khal ah tampi lungawinak ka nei .
CW: :Tiger Girls Band a ra suah nak san le a ra suah dan in sim thei pei maw?
Chili T: :Tiger Girls Band hi 2010 Feb thla ih din thok mi a si. A tumtah mi bik cu Nu le Pa nei lo hngaktah pawl hrangah tanpinak hawl ding ruahsannak thawn din suah a si. Kan Tiger Girls trainer Nicole May (Australia ), hi Musician a si ih, kawlram ah hla sak lawng siloin, ramdang vekin laam thawn a tel mi Girls Band a um hrih lo tikah Tiger Girls hi a din nak san a si. Kawlram khal in international level tiangin a Hit ve ban thei ding timi ruahsan nak thawn a si.
A hmaisabik ah hngaktah nauhak pawl hrangih kan tuah sak mi vun rel seh la, North-Dagon ih um Orphange tlawngah Charity kan neih ih hlasak leh laam nak in nauhak pawl thawn pawlkom awknak kan neiih Music instrument pawl tla present a si.
CW: :Nan band hi sumpai lamih sponsor lo pe tu pawlkom tivek a um maw..?
Chili T: :Tiger Girls band sponsor in pe tu hi Yangon Directory, Mandalay Directory (Sound impect production ) a si .
CW: :Tiger Girls Band ah tel thei dingih na rak pahtlang mi lamzin pawl in ruah thei pei maw..?
Chili T: :Tiger Girls Band ih ka tel theinak hi ka NU leh ka Pai thlacam sak nak, Pathian zangfahnak ruangah a si tin ka ruat. Keimah bulpak ih hlasak leh laam lam ka cangveihnak pawl vun lo ruah hmaisa sehla .. Hla hi cu ka nauhak lai ihsin ka sak ih phun 10 ka theh in Mopuai leh show a phunphun ah ka sak theu. Laam hi cu 2005 ihsin(Kristian lalmuanpuia) hnen in ka zir thok ih, cu hnu ah DVK tin Group kan din. DVK group in show a phunphun leh Chin National Day ah siseh Water festival (Kawl tidai theh puai) ah siseh Performance kan nei theu. Tu ih Tiger Girls hrang competition hi January thla ah tuah a si ih, mi 120 lenglo zuamawknak kan nei. Cumi lak ihsin mi 20 an hril, cu theh in top 5 an hril sal ih Pathian zangfah nak in ka tel ban a si. Hi zuamawk nak hi hla khal siseh laam khal kan thiamcia si loin a hmun lawngah in zirh ih Pakhat te tein kan zuam aw mi a si. Ka lo sim zo vekin ka rak cangveihnak ih ka experience thawn, cuhlei ah thlalang (Mirror) hmai ah practise nak ka nei theu ih ka thei tawp in hi zuamawknak hi Pathian henah hlan phah in si ka rak tel.
CW: :Tiger Girls Band sung na tel ngah ruangah ziang tin feeling na nei?
Chili T: :Hi tivek ih zuam awk nak step hmuahhmuah pahtlang thei in Pathian in ka thlacamnak in sang hi ka lungawi tuk ti bak lo cu rel danding dang ka thiam lo. Cun, Chin mi ka si hi ka lungawi hleice cuang. Ziangah tile, kan Chin mi lak ihsin hiti vekih ka tel ban ve hi mak ka tiih , kei mah leh kei mah uar awk nak(proud) lam siloin Pathian nih keimah hmangin kan Chin miphun cawisan a duh si pei maw tin tla ka ruat ih keimah lam khalah a hlan ai ih nasa sawnin zuam duhnak a thar in ka nei sal.
CW: :Tiger girls hmailam can ah ziangti vekin hmalak nan tum vivo? ziangtik ah show nan nei ding?
Chili T: :Tuhi CD kan suah zo. Hi album hi Sound Impect Production in in suahsak ih – excellent Creation nih in thehdarh sak. Hi CD sung ih hla in ngan sak tu hi mi pakhat lawng a si ih, LR Chan timi kan mah Chin mi thotho a si. Show puai hi tam nawn kan nei zo, tu tla khawte lamah feh in show kan neih hnu ka ra kir sal pekte mi a si. VCD hi September thla in kan zuk thok ding. Band thar kan si ko nan mipi pawlih tha pek nak kan dawng nasa. VCD kan theh cun Album thar tuah kan tum. Zarhkhat ah nili sung Nikki ih hoin training kan nei ringring ih, kan costume ding khal mi dang thawn bang aw lo dingin idea kan thawh ciar ih kan ruat khawm theu. Cun, kan Album thar hrang ding ah hla kan colect rero lai a si .
CW: :Tiger Girls Band sung ih tel mi na rualpi pawl ih an thuhla mal lai in sim thei pei maw?
Chili T: :Kan Pa 5 in Tiger hmin kan nei ciar ih Baby Tiger, Chilli Tiger, Electro Tiger, Missy Tiger leh Tricky Tiger pawl a si. Kan character hi Pakhat leh Pakhat a bang aw lo ih character thawn mil aw dingin Tiger hmin in pek nak san a si. A hmaisa bik ah (Baby tiger) Amon hi Kachin miphun christian a si. Tiger Girls ih a luh hlan ahcun a nih hi Model a si, dancer group an nei ih, cun ( Myanmar superstar singing )tour ah a tel. A nih hi kan lakah a nauhak bik ih a style hi punk school girls Alter/ Rock a si. Cu nah Baby tiger kan ti nak san a si. Cun, kei hi cu Chinmi ka si vekin traditional, Jungle & wild style in kan Band ah Performance nak ka nei ding a si. Cu theh ah, Missy hi kan lak ah Nunau nawn in leh chei awk dan lam khalah mawi nawn ih performance ding a si, a nih khal hi Myanmar superstar singing tour ah a tel ve ih, T.G a luh hlan ah Model pakhat a si. Actress a si bak ah Presenter khal a tuan. Cun, Electro hi (Htike Hike ) a si. A nih khal Myanmar superstar thotho ah tel in Melody world ah tla hla a sak dah. A nih character cu nunau si tho ih nunau bang lo eg. Lady gaga vek deuh fam teh, Robot vek ih lemcang ding a si. A netabik nu cu Tricky (Waihnin ) a si. A nih hi T.G a luh hlan ah cun dancer group an nei ih show a phunphun ah laam theu tu a si. Cun, a character hi Hiphop a si ih hla a sak khal le rap lam, hip hop lam a sak tam bik. Pakhat leh pakhat character dang theh a si tik ah audiance khal hi an bangaw lo nasa .
CW: :Hmailam ah international level in ziangtivekin hmalak nan tum?
Chili T: :Tui VCD kan zuk theh cun Original Album tuah kan tum ih tu hi kan khawl rero lai a si. Pakhat leh pakhat thei aw cia le rualpi aw cia kan si lo nan kan theihthiam pi aw ih Pakhatkhat kan tuah ding asile kan rawn aw ih kan tuan tlang theh. Leader kan um lo ih kan zaten bang awrep in chance kan nei. Cun, Original Album ding hi Idea a phunphun kan thawh khawm ih international level ban thei dingin kan zuam nasa lai.
CW: :Leitlun thuthangca pawl ah tla nan Band thuhla an suah rero tiah kan thei. Ziangmi thuthangca pawlah an lo suah hai?
Chili T: :Autralia ih Magazine 2, The AGE & SMH ah siseh Aljazeera chanel khal ah Tiger Girls thuhla mal lai cu an suah rero zo. A tha bik le Kan thei tawp cun kan zuam nasa .
(Thubet: England ram ih Guardian nitin thuthangca ah le Thailand ramih The Nation nitin thuthangca khalah Tiger Girls Band thawn pehpar mi thuhla pawl suah a si. Editor).
CW: :Ziangvek music pawl na ngai tam bik?
Chili T: :Musician ka si vekin hla cu a phunphun ka ngai theh ko. Ka ngai tambik deuh mi cu Modern rock, Pop, R&B, alternative jazz pawl an si ih ka duh theh ko. Modern hi ka uar deuh nan kawlram ah duh vekin a hit hrih lo tikah a leng show tivek ah cun pop leh alter ka sak tam deuh .
CW: :Ramsung ramleng hlasak thiam ah zo pawl na uar hai bik?
Chili T: :Ka uar theh ko. Musician pakhat ciar hin mah le thiamnak an nei theh ih, ahhhh... kan ram sungih ka uar bik pawl cu Layphu, Sangpi, Zawpine, Tinzamaw, Zamnu, Sungtinpar pawl ka uar nasa. Ramleng ah cu Shakira, Britney spear, Lady gaga leh Evanescence ti pawl hi ka uar cuang .
CW: :Nangmah le Tiger Girls Band pehtlaih a duhtu pawl hrangah teh ..?
Chili T: :Ka Email cu mailalrinkim@gmail.com a si. Ka Face Book ID cu Chili Tiger ti a si. Kan band ih Face Book ID cu – Tiger Girls Burma timi a si. Cun, kan Band ih address cu
24/A.
Ma Kyi Kyi Str.
SanchaungTownship,
Yangon,
Ph: 095201256
CW: :Music paih zet mi Chin mino pawl hnenah ziang thu na cah duh mi a um?
Chili T: :Music hi kan ta a si, kan duh dan in ka tuah thei ve a si. International level tiang khal in kan ban lo ding ti khal a rel theih loh, cunah dungsip loin hmuitinnak nei in leh chin mi hrangah ti`n hmai lam nawr sin uhsi tiah ka rel duh. Cun, tu kan Tiger Girls khal hi tha in pek uh, keimah khal tha in pek uh, nan tha pek nak lawngah kan ding suak thei ding, tha in pek zo nak khalah tam pi ka lungawi. Cule keimah le Chin mipi karlak ih theihter awknak in tuah sak tu ( Chin World ) par khal ah tampi lungawinak ka nei, a tul mi um tla le in comment uh, nan zate parah ka lungawi.
