(Burmes version) Published: 24.04.2010 - 09:00am (CET)
Tuikum 2010 Burma rampum hril awk nak dingah Chin mipi aiawh ih tel a tumtu, ralkap acozah thuthangca "The Mirror" in 24.4.2010 ah register tuah fel a si zo thu an than mi Chin Progressive Party le Chin mipi theih ter awk nak hrangah tiah CPP ih an thuphuangtu (spoke person) Dr. No Than Kap cu Chinworld.info in interview nak kan tuah ih, a tanglam vekin a si…
CW: :CPP party nan rak din suak ni in sim thei pei maw?
NTK: :March ni 24, 2010 ah a si.
CW: : Nan Party Chairman leh Secretary pawl ih thuhla tawi teh?
NTK: :Temporary lawng an si hrih ruangah lo sim a cu loin ka thei.
CW: :Party member sawm nak (campaign) teh nan thok rero zo maw?
NTK: :Bulpak biakawk ih thusimawk tiang lawng a si hrih.
CW: : CPP aiawhin MP candidate ding nan hril zo maw? Zo pawl an si ti in sim thei kem?
NTK: :MP candidate kan tuah hrih lo.. a tuan deuh lai.
CW: :Nangmah teh MP na cuh ve ding maw? Khuitawk Township ah na cuh tum?
NTK: :Hi thu lo sim ding khal a tuan deuh lai.
CW: :CPP in Chin miphun hruai thei nak ngah uhla Education lam ziangtin nan tuah ding? Compulsory system nan tuah pei maw?
NTK: :CPP tling theiin Chinram kumpi kan kut ah um hmansehla Education hi kan thuthu in duhduh tuah thei kan si pei maw? Kan si ahcun phun 10 tiang tal free education tuahsak tengteng kan tum.
CW: :Harhdamnak le pursumnak thawn pehpar in nan Policy theih kan duh i..?
NTK: :Harhdamnak hrangah sub-township ih sub-health centre khalah amal bikah Doctor pahnih thum tal ret kan tum. Pursum leilawnnak hrangah Mawtaw lamzin nasa ten laih kan tum. Khawte zate zikin mawtaw thleng thei thluh dingin tuah kan tum. Cun, India thawn border trade (ramri sumdawnnak) nasaten tuah theidan lamzin hawl kan tum fawn. Himi si lo santhar ih kan tul zet mi electric ngahdan tvk khal kan ruahman thluh zo.
CW: :Tuikum election ah CPP thawn pehpar in ziang tluk zum awk nak nan nei? Nan neh ding tin teh na zum aw maw?
NTK: :Chin State ih township 9 ah pa 8 tal ahcun kan cak kan zum. Free and fair election a si phawt ahcun kan cak tengteng ding.
CW: :2008 Constitution sung ihsin Chin mi leh Chinram hrangah ziangtluk in le ziang mi pawl nan tuan thei ding tiah nan zum?
NTK: :Central ihsin Chin State hrangah sumsaw pek suah mi a tam a mal dan ih zirin Chinram hrangih kan tuan theidan a thumaw ding. 2008 constitution ah ziangzat covo (allotment) kan ngah thei ding ti a um lo ih kan CM le MP pawlin thei tawkin an nawr pei cu.
CW: :Election lut lo ding ti lamih ruat tu pawl in kum (20) sung rori zum tlak a si lo mi ralkap cozah parah a tu ah an mah zum vek in (election) lut rero duh ding asilo an ti. Cumi parah ziang na let sal duh?
NTK: :Kannih cun,_1990 laiih ralkap dinhmun le 2010 ih ralkap dinhmun a bangaw nawn lo, an saduhthah vekin an hrangah an tuah thei thluh zo ruangah, tui cin ih hrilawknak ahcun zalen(free) zetin mipi hrangah an tuah sak kan zum. Cun, a hleice in kannih Chinmi hrangah, opportunity fate takte ra suak mi khal kan hlawknak le thansonak dingah kan thei tawkin kan hman thiam a tul. Cui umzia cu tui hrilawknak ihsin Chinmi in hlawknak kan hmuh phah thei mi a um ding tin kan zum ruangah hrilawknak ah tel kan tum tinak a si.
CW: :Chin National Party thawn ziang si nan danglam awk nak?
NTK: :CNP policy le an thuhla ka thei fiang lo ih CPP thawn an danglamnak ka lo sim thei hrih lo.
CW: :U Ne Win san lai ah MP pawl hi puppets leh rubber stamps vek fang in an ruat men. Tuitum election ah tla U Ne Win san lai vek a si thotho ding a ti tu tla an um. Himi parah na lungkim maw,? Ziang na sim duh?
NTK: :A thlengaw rero mi leitlun ah kan um. Kan ram khalah thlengaw mi um loin amah kelte in ziangkim a feh vivo ding ti theih a si lo.
CW: :Mah-Sah-Lah san lai ah MP pawl hi an thinlung sung um vekin an tongsuak thei timi hi evidence pakhat hman hmuh ding a um lo. National Convention lai ah tla a tel tu political parties pawl ih proposal pawl zianghman ah an siar sak lo. Cuti a siih- Ralkap le a party milai pawl dominate rero ding mi Parliament thar ah ziangtin Gradual Change timi nan tuah thei ding na zum?
NTK: :Mirang ih something is better than nothing (malte khal um lo lawlaw hnak cun a zia-um) an ti bangin, mipi MP 75% an um thei hnu cun tuah thei mi a um vivo kan zum.
CW: :Nagis Referendum lai ah vote petu tampi in an theih lo ih an vote rak pek sak cia a si thu pawl tampi a um tin kan thei. Tuitum election ah teh khavek tho tho in Ralkap parties pawl in an tuah lala pei maw, ziangtin na ruat.?
NTK: :2008 dinhmun le tui Election dinhmun a bangawk kan zum lo.
CW: :Chin National Front (CNF) hruaitu pakhat na rak si dah tin kan thei. CNF hruai tu na si lai na tuan mi pawl sungah - na thin nuam lo mi le na tuah sual mi teh a um pang maw? Cumi thawn pehpar in teh mipi hnenah ziang tin na sim duh?
NTK: :CNF ka hruainak ihsin haang khazet mi ka in ngah. Asinan, cui haang khazet cun hmailam mipi hrang hna ka tuannak dingah nasaten i bawm thei ding tin ka zum hnget timi lawng ka sim duh.
CW: :Chin state lawng siloin Kalay - Tamu township pawl tiang candidate neih nan tum tiah kan rak thei ih, CPP party fund hi ziangtin hawl nan tum?
NTK: :Chinram thansonak duhtu mipi hnenin fund kan hawl tum.
