|
|
 |
BJ thawn Kam Hleikua
Ninu tleu … Manglam Hla ihsin Lasi Hmel Tha, Tahan 1, Tahan 2, Mang Tha Mei … Hoilo Par Mitthli thawn tluang za thang ih a hrawhtu, Chinmi lakih santhar mino hlasak thiam ti ih hung tleu thar BJ thawn kan tawnawk tikah …
01. Na hmin ngai, na suah kum le na suahnak Khua in sim hmaisabik thei kei maw?
BJ: Ka hmin ngai hi Benjamin Tluang Za Thang a si nan ka pi a thih hlanah Benja ti lawnglawng in in rak ko theu ih, leitlunih ka pathian ka pu le ka pi ngainak thawn a tawizawng in BJ ka tiawknak a si. 12.09.1984 kum ah ka suak ih, ka Khua cu Falam a si ko. |
|
02. Na nu le na pa, na unaupawl teh?
BJ: Ka pa cu Pu Van Lal Sak a si ih, ka nu cu Pi Ngun Nei Sung a si. Nu khat pa khatah cun unau ka nei lo, asinan pa dangah cun u Sui Lian Mawi le Ceu Sam ka nei ih, nu dangah cun Solomon Menrihai, Zai Rem Sang, Lydia Lal Her Mawi, Lal Pek Lian, Lal Hruai Lian le Van Lal Sui Sin Par le tla an si.
03. Tlawng, fimthiamzirnaklam teh ziangtivek tiang ha na thlen thei?
BJ: Baibal tlawng cu ka theh ko in ka thei, Cozahlam tlawng cu ka paih tiang hrawng cu ka rak kai ta hmang e.
04. Elbam suah mi teh paziat lai na nei thei zo?
BJ: Pak [solo] elbam cu “Manglam Hla” le “Hoilo Par Mitthli” pahnih lawng a si hrih. Mi dangdang thawi telnak khal pahnihthum hrawng cu a um ve ko.
05. Manglam Hla elbam kha ziangtik kum ah a suak ih, ziangtivekin na rak tawlrel?
BJ: 2005 ah a suak. Tawlrel ti cu ziang ka ti pei … sumpai le fangkhat hman ka nei si lo, suahle ka duh fawn, cu tin kum thum sung hrawng thlacamnak thawn ka rak hngak ih, cu hnuah U Mangte thawn kan tawngaw ih, anih khalin ka aw cu tha a ti ve a si kei cu, cu ti cun kan rak tuah thawk. Harsatnak khal a tam nasa, awnmawi lam tla cu ka duhthu a sam lo zet.
06. Cun Hoilo Par Mitthli teh kha ziang tikcu hrawngih suak ha a si kha? Awnmawi teh zopawlin ha lo tumsak?
BJ: Kum 2007 ah a suak thei. Awnmawi cu Mosquitos ben; Van Gyi [Guitars], Julian [Drums] le Nga Minn [Bass] pawlin in tumsak ih, za ah za ka lungkim mi elbam a si ve.
07. Na elbam suah mipawl parah na hlawhtling ko in na theiaw maw? Mipi auaw teh ziangtivek ha an si?
BJ: Leilungtlun ah hin duhthusam tling ngaingai cu a har a si hi! Mipi lamin tla “Duhtu Zahra, Huatu Zahra” a si ko lo pei maw.
08. Manglam Hla le Hoilo Par Mitthli an danglamawknak?
BJ: Ah… mi tui ka lo sim zo vekin Manglam Hla kha cu midangih suaksak mi a si vekin awnmawi lampang hi ka duh vekin ka tawlrel thei lo. Hoilo Par Mitthli cu ka pai suahsak mi a si tikah a zianglam poh khalah lei le van a si ko. Awnmawi parih a nung mi le a thei ngaingai mi thawn cangvaih cu a rak tanaw tuk, sumpai um lemlo khalah a nuam sawn. Hoilo Par Mitthli tla cu Vocals, Guitars, Drums, Bass, tvk. hi duty 1 ciarah kan theh thluh mei hai. Drums tla cu nahzi 3 sung hrawng lawng a rei. Kan guitarist in “a tha ko, a tha ko” a ti ih, cutin a leng khal suak lo, cawl loin a tum peh vivo men. Hi khal hi sumpai haidaih lo ruangbikah a si ko nan ka duhdan vekin kan cangvai ngahih ka lung a kim zet ko. |
 |
09. Hoilo Par Mitthli awnmawi zuknung [Music Videos/MTV] VCD elbam na tawlreldan a tlangpithu in in ruah hnik aw he.
BJ: Hoilo Par Mitthli awnmawi zuknung elbam hi tha in petupawlin an hngakhlap cio in ka thei. Sum le pai zianghman ka nei lo nan tha in petu mipi hrekkhatin awnmawi zuknung VCD tla na tuah lo ding maw, in vun ti cun ka um thei nawn lo. Cutin ziangkim tithei Pathian hnenah ka dil ih, tu ahcun ka thehfel zo. Ka tithei sun in a thabik si ding cun ka tuah ve ko.
10. Lemcangtu teh zopawl ha an si? Cun khuitawk hmunpawlah ha nan zukawk hai?
BJ: Lemcangtu hi BJ, Mosquitos, Falam ih nurse falapawl, S. Lar Bawih, Tun Tun, Jerry, Tawpi, Bawi Bik, ET, Mawite, Isui, Suikuk, Yuh War Hlaing, Lydia Lal Her Mawi, tvk. le nauhak ahcun Van Bawi Lian le Malsawm Mawi pawl an si. Kan zuknak hmun cu Falam, Zawngto Tlang [Lungpi], Var le Yangon ti pawl ah a si ko. |
|
11. Elbam dang suah ding teh na nei lai maw? Na neih asile, nangmahte [solo] elbam maw a si thotho ding? Cun ziangtik hrawng ah a suah thei na zum?
BJ: Elbam hi Pathian in rem a ti ahcun kum khat vei khat hrawng cu neih thei theu ka tum ko. Atu fang hi cu Susan thawn [Duet] Pathian hla, Khristian elbam kan tawlrel thawk thlang ih, tui kum 2008 sungah a suak thei men ding.
12. Chin awnmawi khawvel ih na luh thawhdan le hi tivek dinhmun na thlen theinak hi ziang ruangbik ah a si na zum?
BJ: Awnmawi khawvel hi cu ka nui pumsung ih ka um lai ihsin ka rak lut thawk zo hmang. Minung kan si thawk hi cun leitlun ah umnak le kekarnak hmun khat cio Sersiamtuin in retsak ih, Amai khawkhannak le zangfahnak parih ka rak zuamnak parah a sibik ko ding.
13. Ramsung, ramleng ih awnmawimi [musician] na uar mi teh zopawl ha an si?
BJ: Uar mi ti ih vun rel ding cun an tam hnuaihni nan ramleng ahcun a hleicein KORN, KID ROCK, KURT COBAIN, P.O.D, AXEL ROSE, STEELHEART, tvk. hi an si deuh hai ih, ramsunglam ahcun ANGE hi a si deuhbik. Cun Chinmi lakah cun BJ hi a si ko.
14. Awnmawi phun [style] lakah teh ziangvek ha na duh bik?
BJ: A… Rock ti mi sungah cu a si ko ih, ka hna ih a lut thei le ka kaa ih a puak thei zawng pohpoh cu ka duh theh ko.
15. Rock awnmawi hi teh ziangtin na hmu?
BJ: Rock awnmawi hi thenkhat tla cun a-setan [Satanic] tuk an ti theu ih, Pathian thangthatnak vekih sah tla cun mi an sawisel duh zet. An mawh lo, san an man lo le tiawtir ih an theih ngaingai lo ruangah a si ko tin ka hmu. Santhar mino Pathian thei loih vakvai rero tu khi hlanlai ihsi kan hman theu mi khuahlan awnmawi thawi sah mi hla maw, tulai santhar awnmawi thawi sah mi hla ha a hna ah lut sawn ding? Thungaite ti cun Rock hi so khaw mino thlarau hlo a kai tam thei sawn. Rock cingcing cu Rock a si ko e!
16. Elbam kawm ah siseh, Wall Sheet/Poster zuk ah siseh, “666” nambat na tarlan mi le “Setan Hla” na ti mipawl hi mipi tam sawn in an theithiam lo a bang. Ziang na ti duh san bik ha?
BJ: 666 hi Baibal ih a khihhmuh mi le kei ih ka ti duh mi hi an dangaw ding. Kaa lawngih Pathian, nunnak ah hmuah thuphanhlolak, lenglam rang, sunglam dumpawl hnakin mi hmuahhmuah ih misual an ti mi pa khi mi hmuahhmuah ih an huat le an tihbik mi “666” kha a cal ah ben hmansehla, a sunglamih a thlarau a dik sawn ahcun Pathian mithmuh ah a tha sawn thotho lo ding maw. Hoilo Par Mitthli VCD sungih “Setan Hla” ti mi kha thaten zoh sehla a theihfiang theih ko ding.
17. Kuak le zu, rittheih thilpawl na tham nawn lo an lo ti vek…?
BJ: Thil cu a tha lo ti theih cun bansan mei ding a si ko. Stage parih kan cangvaihdanpawl khi mipi in zu ri le sii ri ah in neih theu ih, a na ka ti thei zet. Kan hmailam ih kan ulepawl in an rak hman theu ruangah maw si ding… Kannih cu awnmawi kan ri sawn mi a si. Ka thlarau khalin a duh nawn lo hrimhrim a sibik ko.
18. Kan Chin awnmawimi pawl hi ziangtivekih ke kar ih um ha nan si?
BJ: Mah le style cioin kan um ih, mah feeling mi cio hi kan tuah a si ko. Asinan zoih kut tang hmanah kan um lo vekin, zoih tuahsak ruangih dinhmun hnget nei tla kan um cuang lo. Mah pakhat cio ih zuamnak parah Sun Ceu tla Sun Ceu a si ih, Tuan Ling Thang khal Tuan Ling Thang a si ve. Menrihai tla Menrihai a si vekin Kurbungbel khal Kurbungbel a si ve ko. Cu vekin BJ khal BJ a si ve. Zoih kut tang le zoih hohatnak tangah hman kan um lo, Pathian kut sungah a zuam rero tu hlir kan si.
19. Kan lungawi nasa.
BJ: Kei tla nan hnenah sim cawk loin……!
Salai Peter Din |
|
