|
Van Cung Lian - Interview
 Kan Chin mino lakah kum note (kum 24) ih Phunsang tlawng (Civil engineering) ramleng ih thehsuak thei kan neih mi Salai Van Cung Lian (Aa nau) cu Norway le Sweden ram ih Khrismas le kumthar in ra hmanpi lai 30.12.2008 ah Chinworld in hmaiton thusuhnak kan rak nei ih a tanglam vekin a si.
CW: :Na suahnak khua, na nu le pa u le nau pawl in sim thei pei maw..?
AN: :Ka suahnak cu Falam khua a si, Ka nu le pa cu Pu Thawng Bil Lian le Daw Mawi Sung an si. U nau pa ruk kan si ih upa bik ka si. Ka nau le hmin pawl cu...
(1) Sui Sin MawiVan Sui Mi Mawi
(2) Lal Hup Lian
(3) Mi Za Lian Mawi
(4) Lal Tin Lian tla an si.
CW: :Kawlram ah tlawng phun ziat tiang na rak theh suak zo?
AN: :Kawlram ah Distance Education English major in 2nd year tiang ka theh.
CW: :Ramleng ziangmi Phunsang tlawngin, ziangti vek fimthiamnak na zir suak..?
AN: :Kapa in ram leng suak ding hi in fial ring ring mi a si. Kei mah cu ziang hman ka rak thei lem lo. Ziang ka tuah paih khal ka thei aw lo kha lai ah. Kapa ih tawl rel nak in Yangon ih British Council ah mirang ca ka rak zir ih England ih tlawng kai ding hi ka rak duh thok. Kha lai ah tlawng kai ka rak duh men men, a kai thei dan ding hi ka rak thei lo. Mi an feh tam pi ka thei nan ziang tin an feh, ziang tin an tawl rel ti tla ka rak thei lo. Agent an tam pi, ka sung san nan a rem cang thei lo. A si nan Pathian lam hruainak in Regent Consultancy ih Managing Director Kevin thawn kan rak tong aw in a mah in ziang kim in bawm thluh, Mi rang ca than so nak ding si seh, tlawng lam si seh, visa hrang ih a tul mi hmuahhmuah a mah ih Guide pek nak in UK tlawng ka rak kai thei mi a si. Hi tawk ka thlen hnu khal ah Academic lam in si seh, thil dang khal ah bawm nak in pek ring ring.
CW: :Ramleng phunsang tlawng na kai peh ding tikah ziangti vekin timtuahnak na nei, harsatnak na ton mi a um maw..?
AN: :Pathin lam hruai nak in a rak remcangi thluh ah a cang. Kevin ka tong tik ah a mah in ka kai thei dan ding pawl fiang ten in sim, Cule 2003 ah IELTS ka rak phi ih mirang ca lam in cu College lut ding ah ka rak qualify. Asinan mirang ca lawng a rak ngah lo ih a dang subject pawl khal ka kai bet. Engineering ka kai duh tikah Maths le Physics napin ka zir sal. Inn khal ah Home tuition ka lak, cule Yangon ih hmun dangdang ah mirang ca thawn, GCE-O level Maths le Physics pawl zir in timtuahnak ka nei.
CW: :Tlawng na theh suak hnu ah ziang mi na tuah? Hna na tuan cih maw..?
AN: :Pathian zaang fah nak in 2008 July ah Bachelor of Engineering BEng (Hons) hi The University of Nottingham ihsin ka lak suak ih, cule hna direct in ka hmu ih September thla in hnatuan ka thok. A tu cu Graduate Engineer position in Highways lamah hna ka tuan. Halcrow Group Limited timi ah a si. Civil Engineering ah hin specialise ding mi a tamtuk ih ziang ka paih bik khal khi ka thei aw lo tu tiang ah. A tu cu kum hnih sung ah Highways, Geotechnics, Structures ah hin rotate ka tuah ding ih cutheh le ka specialise ding mi ka hril leh ding.
CW: :England ramih na hnatuannak lam a tlangpithu in in sim thei pei maw..? ziangti vek hna na tuan, hlawh man teh ziangvek a si?
AN: :A tu cu a thock a si lai ih hnatuan ti khi si in ka hmu aw lo. Ka zir rero lai thotho. Ka hnatuan pi pawl a tuan dan ding ka sut rero hai ih cu tin ka re, cang ko, ka theih lo nak ah tampi in sim/bawm ih a remcang zet. Kandung thlali sung ka tuan mi ah cun Highway Design a tam. Senior Engineer pawl ih sketch tuah mi tivek ka suai, cule British Standard thawn a kaih maw tivek check ka tuah, Roundabout Design le Cost Estimation hi ka tuah tam. Cun, North Yorkshire ih Flood Defense project ah tla ka tel. England ih congested bik mi lamzin A1 Gateshead Newcastle Western Bypass online improvement ah si can tambik ka hmang.
CW: :England ramah kan Chin mino dang pawl nangmah vekin work student/permit thawn tlawngkai/hnatuan an um maw..?AN: :Tlawng kai lai cu Thantlang mi pakhat cule Kalay Myo in pa khat (Rev.Khua Hnin Thang) a um. Mi dang tla an um ko.
CW: :Hmai lam canah ziangmi tuah na tum? Tlawngkai peh vivo na tum maw..?
AN: :Hmai lam pi hrang cu ka ruat hrih lo, short time hrang lawng ah tum tah mi ka nei lai, kumhnih hna ka tuan thluh in Master peh ka tum ih cule England ahhin Charted Engineer dinhmun thlen ka tum. Pathin in lam in hruai vivo ding ih a remcang thluh ko ding tiah ka zum.
CW: :Ramleng na um sungah na lung a leng dah maw..? Na umhar/lunglen canah ziangmi na tuah theu..?
AN: :Leng lo lamlam ah vun ti seh la, lungleng ti hnak in ka um har sawn. Thil tuah ding ka nei le a leng lo. Hna ka tuan lai ah cu hnatuan lawnglawng ka ruat, a sinan weekend tivek keimahte ka um can ah cu ka lung a leng nasa. Movie (zuknung zoh) lo le Hla ka ngai tam bik si ko.
CW: :Kan Chin mino nangmah vekin ramleng ih phunsang tlawng kai peh vivo duh pawl hrangah ziangtin idea pek na duh? England ramih tlawng kai nak ding dang tha khihhmuh ding na nei maw..?
AN: :Idea pek ding hran cu ka thei ve lo a. Cu hnak in an mah ih an tul mi a um le a cang thei tawk in bawm ka tum. Tlawng cu a tam pi, a lit in an li.
CW: :Aih aih aih, ka lo sut theih hngilh zikte, “hello darling” ti ding na nei zo maw..?
AN: :Cukel, ka lo sim le na thei ding ual.
CW: :Na nu le pa u le nau maw na ngai bik (or) rualpi asilole ….zo maw sawn.?
AN: :Ka sung pawl ka ngai ringring, a dang cu a-chi-ni-a-yah si ko…hehe
CW: :Leitlun Chin mino pawl hnenah ziang mi zirnak lam zuam dingah cah na duh..?
AN: :Na question cu tuksum in, mi thucah lamlam keimah hi thucah ka tul sawn. Mi thucah ding dinhmun ka si hrih lo.
 CW: :Norway le Sweden ramih um kan Chin mi pawl ih dinhmun hi ziangtin na hmu?
AN: :Mi nan duhdawt tuk dan hi a mak nasa, cule hi ramsung ih um ka hmuh mi tete nan mah le nanmah tla nan duhdawt aw dan hi ka hmu ih ka mangbang lamlam. Hi lam um pawl mi nan duhdawt aw cuang a bang. Laimi lawng siloin midang ka ton mi khal an tha dan cu. Thei awk cia tla kan si lo nan ka lo tong hai tikah in welcome zet, cule kei mah tla ka thlen nak hi ka inn si tin ka ruat rori thei cu tluk in nan tha. Ka ra hlan cu mi inn ah ka va thleng ding ih hmai song ten ka um tum mi si nan, inntek vek in ka um lam ih a tha lo sawn lam maw tiah ka ruat rero. Ram le a mawi ih a nuam lawlaw, hi lam hman hi thawn ka paih zik te men.
CW: :Chinworld hi na rak siar/zoh dah maw, ziangtin na hmu..?
AN: :Ka zoh ring ring ko. Ca cu ka siar tam lem lo nan Music ngai ah ka feh tam bik. Chinwold ruangah lai hla tla tampi ka thei ngah. Culo cu UK ah cun lai hla thleng dah lo cu, Youtube ih um mi lawng khi ka rak ngai theu nan tu cu Chinworld ta tla ka ngai thei thlang. Well done.
CW: :Kan Chin awnmawi hlasak tu pawl lakah zo ih hla na ngai tam bik.., ziangruangah ?
AN: :Youtube le chinworld ih hla pawl ka ngai tam bik. Hla cu ka ngai tam tuk, ngai tam bik hril ding hman ka thei lo, Hniang Hniang hla ka ngai tam bik men thei. Youtube ah a tam em a hla pawl.
CW: :Mirang ramih nuntu khawsak dan le kan lairam/kawlram ih nuntu khawsak dan ziangtin na hmu?
AN: :An ram cozah uk awk dan le an system hmang mi pawl cu ka uar zet cawng tlak rori si ka ti. Minung lam in cun, UK pawl hi an hnatuan dan a dingfel, an tongkam a polite, cule an selfish zet. Innsungsang le innhnen duhdawtnak hi an nei lem lo a bang. Mah te cio in an nung. Kan nih Chin mi pawl cu duhdawt awk nak kan nei cuang zet in ka hmu. Innsungsang khal ah kan zoh aw zet. A dang khal a tam pi, hi thu ngan ding cu a tam tuk.
CW: :Ramleng na um sungah zingmi harsa na ti bik, khawsik maw ei le inn ah?
AN: :Farah inn sungsang in ra mi ka si ih khawsik le eiin lam ah cu thil harsa ka tong lo, weather (nikhua umtudan) khal a sia zet nan lairam hnak in cu a tha sawn, facilities tampi an nei ih khua a dai in ka thei lem lo. Eiin lam khal ah siseh buai nak ka nei lo. Ei thei lo mi khal ka nei lo Pathian thlawsuah a si.
CW: :Hmailan canah kan ram le miphun hrang ziangtivek ih hnatuan ding tumtahnak na nei?
AN: :Ni khatkhat ah keimah thiamnak hmang in Chin ram hrang ah contribute tuah thei mi neih hi a si. I will try to do my best for the betterment of our Mother Chinland.
CW: :A lo contact duh tu pawl hrangah na address in sim thei pei maw..?
AN: :Address hi ka thleng cingcing ih cu nah e-mail add ka lo pek sawn ding...
Oldtraffordmayor@googlemail.com hi nah ka um.
CW: :Hi zat tikcucan in pek ruangah kan lungawi zet.
AN: :Kei tla ka lungawi.
| 