2011 Atlanta, USA ih Lai Kum Thar Puai ( Chin New Year Festival) tuahnak dingih zuamawknak a phunphun le puai hman daan ding thuhla pawl cu a tanglam vekin a si ding.
1. Mikhual thlen daan:
(i) Riahnak khual zem ding a si ih, local state aiawhih zuamawknak phunkim a teltu ding pawl cu inn khatah a cang thei tawkin riah ter dingin inntek pawlin an tawlrel rero. ( Minung tam le malih zirin innhnih innthum khalah riah ter ding a si)
(ii) Rualpi inn, Unau sungkhat innih a riak duhtu pawl khal riak thei a si. Asinan tuan deuh ihsin nan riah tumnak inn neitu pawl hnenah thu nan than ding. Cu lole inntek pawlin nan riahnak innah mikhual an rak zem pang ding.
(iii) Hotel/Motel ih riak duhtu pawl khal inntek Atlanta, GA ih tuanvo nei pawl contact tuahin puai hlan zarhnih duhah order thei an si.
2. Rawl Ei Daan Ding :
(i) Inntek (Atlanta,GA) pawlin zaanhnih (Niruk zaan le Nipi zaan) lawng rawl do a si ding. Cumi lo pawl cu mai duhnak hmun ciarah ei theih a si.
3. Lehpannak (Sport)
(i)Saphawhlum (Soccer)
(ii) Volleyball (Mipa, Numi)
(iii) Hridirh ( Numi )
(iv) Tlan (Numi upa/nauta le mipa tualleng/nauhak)
Hminsin 1* : Saphawhlum: Michigan ( Battle Creek ), Indiana , Atlanta , Maryland , NC (Charlotte) le All States tiah team (6) suak dingin tutiang cu thuthang kan ngah. Cumi lo pawl state dangih a tel duhtu cun Central Chin Pawlpi lole Inntek Chin Pawlpi pawl hnenah a rang thei tawkin thuthan ding a si.
Hminsin 2**: Saphawhlum : Referee hrang inntek lamin tuanvo laak ding a si ih a cang thei ding asile cu (professional le miphun dang pawl tal) laak thei sehla ti ruah a si.
Hminsin 3***: Lehnak kipah a tlaibik minute (30) tiang a lektu ding minung an kim lo asile minung kim lo in an lek thei. An lek duh lo le “disqualify” tinak a si dingih sung cazin ah ret an si ding.
4. Nunphung
(i) Lai Laam
State pakhatin Laam khat cio zuamawk ding a si.
(ii) Chin Thuam Mawi Zuam Awknak
State pakhatin kophnih ( Numi le mipa pahnih veve) in zuam ding a si). Chin thuam pawl sung ihsin mahih duhmi thuam hrukin zuam ding a si. Thuam famkim zetmi le tong naalzetih tong thiam. Chin thuamih a duhsanmi sim theitubiktu kop kha pakhatnakah hril ding a si.
(iii) Ttongkhun zuamaw nak:
*Kum 18 tang le kum 18 tlun (junior & senior) tin State pakhatah mi pahnih ciar suahin zuam aw ding. Tawlreltu dingah Pu Thomas Tha Nei Thuam (KS), Pu Lal Nei Mang (MD) le Rev. No Bual Hrang (FL) in a tul daanin tuanvo an lak ding.
5. Calai
(i) Biazai
Mah duhmi hmin hrilin ngan zuam ding a si. Puai hmunah tuanvo neitu pawl hnenah ap ding a si.
(ii) Cahram
Cahram ngan duhtu pawl khal ngan theih a si ih tuanvo neitu pawl hnenah puai hlanah pek ding a si.
6. Awnmawi
(i) Pakzai (Solo )
State kipin hlasak (solo) zuamawk nakah minung pakhat cio suah thei a si.
* Tukum (2011) cu phuah thar hla tengteng ti a um lo. Mah duhmi hla cio sak theih a si. Zuamawknak ih a tel lo hlasaktu ding pawl cu Central le Local Chin Pawlpi pawlih lungkim daan in sak a si leh ding.
(ii) Hlarem (Choir)
State kipin zuam theih a siih mah duhmi hla cio zuam theih a si. (Nipi ni (sunday) khawmah zuamawk ding a si)
7. Baibal Zohlo Siar :
*Saam 33 Baibal Thianghlim (Rev. Dr. Hre Kio) ih lehmi 2nd edition (Revised Edition) ta a si ding. State pakhat in mi pakhat cio suah a si ding.
8. 2011 Miss Chin Community
Kum 18 tlun Chin mimawi numi pawl cu state pakhat in minung pathum tiang 2011 Miss Chin Community zuamnakah tel theih a si. Thusuhnak 20 a um dingih inntek khua (Atlanta,GA) Chin Pawlpi le Chin Pawlpi, USA in thusuhnak 10 veve an tuah ding.
2011 Miss Chin Community hrilnakih tuanvo latu dingah Pi Tha Hlei Vang (Hlasak thiam le Zuknung Actress), Pi Biak Mawi (Tlawngca zirhtu hlun) le Mai Cerkuk (2008 Miss Chin Community) pawl an si ding.
** Chinworld media in 2011 Miss Chin Community zuamtu ding pawlih zuk, hmat pek daan, hruk ding tuam le umtu daan ding pawl famkim zetin a run taar lang leh ding.
9. Khawm Caan Hman Daan
Ninga zaan (Khual thlen zaan) le Nipi sun ah khawmnak a um ding. Caan pawl cu Inntek Chin Pawlpi le Central pawlin an than leh ding.
10. Registration fee
Kum 18 tlunlam puai zawhtu hmuahhmuah minung pakhatah $20 ciar pek ding a si.
11. 2011 Chin Person Of The Year
Chin Pawlpi (USA) le Lailun Foundation kom khawmih pekmi, Chin Media pawl zuamnak thawn hrilmi 2011 Zohtthimtlakbik hrang nominate tuahmi sung ihsin hril dingah hinah na vote rak pe ve aw. http://zohthimtlak.info Aug. 15 tiang lawng hril thei a si. Lai Kum Thar netabik zaan (Sep. 4) ah laksawng pek an si ding.
12. Degree Ngah Pawl Sunloihnak
2011 Lai Kum Thar Puai ah associate degree ihsin tlunlam degree a ngahtu pawl, sunloihnak cazual pek ding a si. Chin Community,USA ih sungtuan Pu Van Tuah Piang hnenah degree ngahtu pawl ih Hmin, Degree le Tlawnghmin pawl kuat ding a si.
13. Sin le Feen
Lai Kum Thar Puai ah kan nunphung sunloih le cawisan ding a si vekin mah le neihmi Lai thuamthil thawn thuam aw ding kan lo forh duh. A hlei ce in Niruk zaan le Nipi zana nunnuam puai ah mah le Lai thuam te thawn ra suak tengteng uh. Kan nunphung ih kan neihmi vekin siseh tulai santhar Lai hnipuan in siseh zoh mawi ding te'n ra suak hram uh.
Tawlreltu : Justin Sanghrin Thang
Thuthantu : Pu Fung Dun
(Hotu, Chin Pawlpi,USA)
Pu Van Tuah Piang
(Sungtuan, Chin Pawlpi, USA)
Hminsin : 2011 Miss Chin Community, USA cu rei lo te ah CW ah rak cuan saal aw.
...............................................................................................................................................................................................................................................
