|
"An Ti"
01) Thih ta tul lo-in damlai ah thlarau khawmpi a hman theih zo an ti.
02) Duhhrilnak cu ngaihtuah ruahnak dik hnuai-ih kunter ding a si an ti.
03) Tulai Evan pawl cu Bible vekin an tiih anmai’ duhdan in Pathian thu an sim an ti.
04) Mai umnak Kawhhran ih ngam tha theilo le ar a riahnak kel ih riak duh lo cu a tawp ah an hlo ta duh an ti.
05) Nunau khawlak len heh tuk le vokpi suak hmang tukin thil tha an tlun dah lo an ti.
06) Kum khat sungah kan riahsiat can ai-in kan hnih can a tam sawn an ti.
07) Mifim pawl cun an thinhengnak an langter lem lo an ti.
08) Ti thei nei lo pawl in zuk le hmawm cu an ti thei thotho an ti.
09) Tangka nei tam pawl cu a nei mal pawl ai cun an rual dawtnak a sang sawn an ti.
10) Thansoh le len duh cun tikcu(caan) le tangka (sum) hmandan thiam ding a si an ti.
11) Lai mi in zalun khat (1000000000000000000) one quintrillion thleng numbat (numbers) siar dan kan nei ve a si an ti.
12) Nunau cei-awk paih tuk pawl hi an fel in an thianghlim thluh cuang lo an ti.
13) Sawn pai hmuahhmuah hi an hur ruangah a si thluh cuang lo an ti.
14) Kawhhran ih buai ve lo pawl ih PATHIAN thu an sim len Kawhhran a buai thluh an ti.
15) Nu pakhat cu fate pali a neih hnu hmanah pasal neih a nuamnak a thei hrih lo an ti.
16) P.C.M Chin Synod pawl cu pakhat le pakhat PATHIAN thangthatnak hla an duhmi a bangaw thei loih an lung a rual thei lo an ti.
17) Tulai Pastor pawl cu vanram kai ai-in refugee ih ram dang feh an duhsawn an ti.
18) Tulai ih eihawlnak ih hlawkbikcu PATHIAN thu simih vahsuah hi a si an ti.
19) Leilung tlun ih ram fiak(fate) bik le ram nuam lo bik cu casiar dah lotu ih thinlung ram le ngaihtuahnak ram hi a si an ti.
20) Che (tthi) le hnalung (tthi) ruangih tlaksiat cu a tha lo ih Che le Hnalung ih len cu a pawi lo an ti.
21) “An Ti” timi hi a lun dan tawk thiam thlang ding an ti.
Uar Ruangah
"Hi nunau nu hi ziangruangah a duh na lo cing na pawngsual..?" Thuthentu pa cun misual pa cu a sut.
"A hmel ka uar ruangah" tiah misualpa cun a mit pahnih vorhlam kutih hup phahin a sim.
"Hi tlangval pa teh hi ziangruangah na pawngsual kherkher..?
"Ka uar ruangah a si" tiah misual pa cun a mit pahnih hup phah cun a rak sawn lala.
"Ziangruangah na kut thawn na mit hup phahin in sawn rero..?"
"Ka pu, nangmah khal ka lo uar ruangah".
Thuthup
Ralkap rawlsuangtupa kha thu an sut.
"Ka rual, himi ralkap paziat hrang rawl na suan sak theu?"
"Eee..., cucu ziangtin ka lo sim thei ding, ralkap thuthup a si ve ual..!"
"Pakan pawl kholh sal thluh ding cu a bang thlak zet ke ti aw"
"Bangthlak zet e, nangteh vun ruat ve hnik awla, nitin pakan 700 veihnih kholh ringring ding timi cu..!!"
Mero sah
A rualpa cun...
"Leitlun ah London khawpi cu mero sah bik tlaknak hmun an ti ual"
"Ahh..., cu thamtham a nasa lo tuk lai. Kei ka thlen ve nak khawpi pakhat tla cu London hnakin mero a sah deuh"
"Ziang khawpi maw..?"
"Ziangtin ka hminsin ding, mero a sah tuk ih hmuh hman a hmuh theih lo pi..!!"
Thlanrawn Pawng Rang
Voikhat cu Thlanrawn pa le Tlaisun pa Mizoram lamah thing at hlawh aw dingin an feh. Mizoram thing at pawl cu hramlak ah buukte neiin, an buuk ahcun suncaw an zawh ttheu. Nikhat cu suncaw an ei lai fang an buuk kiangah Thlanrawn Pawng Rang vate pawl an ra fu ih Thlanrawn pa cun a rualpa hnenah,
“Karual hi vate pawl hi ziangtin si nan kawh,” tiah a sut. A rual Tlaisun pa khal cun, “Thlanrawn Pawng Rang” kan ti, tiah a rak sawn. Tlaisun pa cun, “nang teh ziangtin nan ko tiah a sut ve. Cutikah Thlanrawn pa cun,
“Kan nih khal Tlaisun Pawng Rang” tiah kan ko a rak ti cu teh!!.
(Tlaisun pa in hman te'n a sim ko nan, Thlanrawn pa in a capo ah neih in tha te'n a sim duh nawn ta rial lo an ti).
Cuvek rel hlah
A nu cu duat takih va pom phahin...
"Ka nu, ka pa thawn nan pahnih in ziangtik hmanah ka lo tlansan dah lo ding ho khaw maw..."
"Ai-ka-rei...! cuti vekin mai nu le pa an ttihthaih kel lo ho khaw nute!!"
Hni duh hlah
Hmuanthlang kawl nupa tei naute kha a hrawng ngah ve pam a si ding. Ei ding pakhat tal a neih lo hi cun thi-fa-hnuk-cat zik te in a tap ciamco theu.
Tumkhat teh a ei ding neilo mangbang cun a kuttum a rak dolh ngah pang a si hmang...! Cat lo bang loin a tap ciamco ih, a nui ti ngaihnak theilo cun a tawkua in a dirhsuak sak fukfi an ti.
Nunau Fimnak mipa in neh lo!!!
Lamzinpi pakhatah mawtaw pahnih cu a accidentih, an mawtaw veve cu a siat viar! A pakhat sawn cu nunau ta a siih, a pakhat sawn cu mipa ta a si. An mawtaw a siat nan, vanthat thlak zetin a minung cu pakhat hman an tuahmawh aw lo.
An mawtaw ihsin an hung suakih, nunau sawn cun, "Alah! zoh hnik aw, kan mawtaw hi, a siat viar ual, nan vanthat thlak zetih, kan pahnih cun kan na lo. Himi hi khuanu in kan tawnawknak dingih a remruat a si ding" ti aw tiah a mipa cu a hei sim, mipa sawn cun vanthat lamlam tiah a lungkim.
Nunau cu a vun hawi kual ih, "Aih, hi zuu palang khal a kek uallo, kan lawm cih nak ding hrang khuanu remruat thotho a si hi" ti phah in a vun lak ih, mipa cu a pek. Mipa cun a rak laksak ih, a vun ongih, duhsah zetin a vun dawk ta. A theh cun nunau nu sawn cu a hei peih, nunau cun a rak la ih, a in cih. Mipa cun, "Aih, na in ve lo ding maw?" a hei tiih, nunau cun, "In hlah, palik pawl ka hngak sawn ding" a rak ti hleuhhli!!!
Ti hrim ve nakah!
"Na pasal thinheng in a lo suahsan an tiih a si ngai maw?"
"Si e, in ti hrim duh ruangah nupi dang pakhat hman a nei bet lailai sap bai"
"E heu, cuti cu na pasal thawn nan thenaw fel zo tinak maw si?"
"Ziangtin a ngah ding, kei khal le a mah ti hrim ve nakah nitin thuthangca sung ihsin keimah hi dan thianghlim ih a thit mi a nupi sur rori ka si tiah ka suah ve fam teh"!!
In hawl hmuh sak aw
Thinphang zet tu damlo pakhat cun Sibawi pai hnenah hitin a sim.
"Sibawipa, mizan ka mang ah hramlak ih um minung sa ei milai pawl vekah ka cang ih ka nupi thawn a bangaw zet mi nunau pakhat kha ka sungkhat milai sa ei pawl thawn a sa kan rak ei ciamco ho khaw"
"Zanmang timi cu a phunphun a um thei ko, mak ah ngai duh aw hlah"
"Cuti asile ka nupi hi tu khui ah a si pei?"
Thatho zet nan...
Ralkap tuan thar pa ih thinlung that le that lo theih duh ruangah ralkap sibawipa cun hitin a sut....
"Ralkap Pa Hnin, ralkap na luh hlanah zianglam na rak thlun theu...?"
Ziang pipa ngai cu thlun dah lem hlah e"
"Nunau pawl dung tla na rak thlun dah lo maw?"
"Thlun dah lo"
"Na tha a tho dah leem lo ti nak si maw?"
"Cuti cu si hlah e..."
"Si le, ziangah na rak thlun dah lo?"
"Kan nu-in in awih hlah khaw cunah!!"
Na pa a si ngai maw..?
Kumkhua rethei fialfial ih rak umin vanduai thlak zetih a thi tu an vui nakah a si. Pastor pa cun cu pai thatnak lawnglawng a sermon ciamco.
Cutikah mithi pa ih nupi cun a fanu te kiangah va fehin dim ten a va sim.
"Nute, thlankuang sung khi va zoh tha sal hnik, na pa a si ngai maw....?"
Nu a bang tu fapa!
A Nu: Tong zuamawk nakih a pakhatnak na ngah thu na sim tikah na pa in ziangtin a lo sawn?
A fapa: Aw.. aw..aw nang hi nikhat hnu nikhat na nu thawn nan bangaw deuh deuh ual", in ti.
Zia um deuh pangah
Veikhat cu a rualpa in Pa Thang kha thu a sut;
"Pa Thang, hih ...ziang ah so na nupi kuak fawh na kham lo. Nupi nu ih kuakfawh cu a mawi lo tuk so khaw?"
"A kuak fawh cu ka duh a si hrimhrimlo, a tong tam tuk mi a zia um deuh pangah ka tiih sokhaw" tiah a rak sawn.
Kan cem riai
Yangon khawpi sungah nupi nu pahnih an tawngaw. Pakhat sawn cun,
"Ka rual, kei cu kan pa Malaysia a feh nak kumkhat lai a rei zo nan sumpai fangkhat hman tu tiang in kuat thei hrih lo, tuluk fala bawngbi kaih tha paih lo, tawtek lang pawl thawn an thlun aw rero in ti tak, ka bei a dong tuk"
"Ai ha, nupi dang a lo neih san lo cu tawk deuh lai. Kei khal kan pa US a thlen nak kumthum lai a rei ve thlangih a fa sawn neih thup mi hmuahhmuah khal ko dingin a rawn phuangsuak aw thluh lo maw ziang ti tha, kan cem riai a si hi".
A dik mi rel aw
Mithi vui nak pakhatah a thi tu pa ih rualpa cun hitin a sim.
"Ka rualpa hi nonal zet le kum 30 lawng a si mi a nupi tan in mual in liam san a si hi"
Cui tongkam a rak thei ngah tu mithi pa ih nupi cun thin har zet le a tahnak mitthli aw thawn.. "Kum 28 ti aw le..!" tiah a rak sawn lohli.
Mo thar
Tlangval zuri pakhat cun zan tim hnuah nupi a rawn hruai tlung. A nui hnen ahcun,
"Ka nu, nupi ka rawn ru ho khaw thaizing le a hmel nan zoh leh ding"
tiah a nupi cu a khaan sungah a luh pi cih.
A thaizing khawvang veten Mothar hmel zoh dingah a nu cu lakphak thlum haikhat thawn phur zetin a fapa ih khaan ah a va feh.
Nupa tuak thar tei pahnih cu ihkhun parah an rak it lai. Tlangval pai nu cun an puan lukhuh mi ong phahin mothar hmel fiang ten a hun hmu ciah cuh...!!
"A-ze,...ka duh lo, U Thluai nangmah ho maw...hi hi hi" ti phahin a hmai a hup ih zamrang zetin innsung lamah a tlansuak sal lohli.
|
Ka tirhfak ve lo
A zun cek sak ding a si ruangah tlangval pa cun a zun litre 3 khat palang thawn sizungah a rak keng. Sibawipa cun a rak sut.
"E heu, na zun cu a va tam ve"
"Kei cu mi tirhfak ka si ve lo pi"
Sibawipa cun zianghman sawn sal nawn loin lengah a suah san. Nazi pakhat rei hnu ih a ra kir sal tikah mitu ih tlangval pa cun sizung kawtka ihsin a rak hngak ringring mi kha a hmu.
"Eee.., na tlung hrih lo maw si, ziangha na hngah lai..?"
"Ka palang rak ken mi tlun sal ka duh ih cunah so khaw sibawipa!!"
Hmeltha hlir!
Bus parah fala mawi zet pahnih an ra kai. Tohkham lawng an hawl rero nan an hmu lo. Tohkham ih rak to khat tu tamsawn cu tlangval pawl lawnglawng an si. Fala pakhat tu cun a rualnu hnenih thuthup sim vekin an zate theih dingah hitin a ti...
"Khitawk ih to tlangval hmeltha zet pa khin to nak in kian sehla ziangtluk a tha ding ti..."
Cu veleh, tlangval pawl hmuahhmuah an zaten an to nak ihsin an ding thluh lohli.
Fim Cim!
Lente khua lamah Pastor pakhat a hung tlawng ih Lente khua mipi pawl cun, "Sayapa Fim Cim" tiah an rak hmuak celcel. Pastor pa cun an tiduh san umzia a rak theithiam lo ih, " ka fimlo, ka fim lamlam lo so khaw...kei cu ka aa tuk" tiah a rak sawn lohli. (Lente tong ih Fim Cim an timi cu ... na dam maw tinak a si.)
Thlairah hmin nei tam!
Falam khawsung um pawlin "Hangbo" tiih an kawh tam deuh bik mi. Mizo pawlin "Biskut", Zaniat pawlin "Pihawm", Hmuntha khaw lam pawlin "Umpawng" an timi le Lente pawlih "Van-til" an timi hi nangteh ziangtin na ko ve?
Khuahlan ah an nei lo Condom!!!
Pacangpa le a fapa cu an kawmawk rero ih, santiluang thu rel in an can an hmang tlang. Culai fangah Condom thu an thleng ih, a fapa cun, “Ka pa, tulai kan san ih condom an hmanmi vek hi hlanlai ah a um ding fawn lo ih, ziang an hmang pei?” A pa cun hni suamsi phahin, “Cu maimai na thei lo maw, Sia-ki an hmang fam teh” a rak ti cu teh.
Tualte vanglai thufim!
#Na kut zungpi in na hnapkhir kheuh hlah, a tlem lo pang ding.
#Mi tum pawl ih angki hruhmi cu mi fate pawl hrangah a tum tuk.
#Lamzinah mi pahnih an feh tlan len an baikawk theu, ziangmi an biakawk tile, thurel an nei tinak.
#Lamzin suk a um cun a so khal a um ding.
#Nun sau na duh len thih tum hlah.
A zate deuhthaw in
Sizung ihsi ra tlung tu a nupi hnenah an pa cun a rak sut.
"Sibawi pa in na taksa parah ziangmi a hmu?"
"A zate deuhthaw in si ko, ka taksa parah tangka 35 ka pai ih, ka lo zoh manah tiah 30 cu i dil ta!"
Kan ti tlang pei cu!
Sangka king awn a theih ruangah a va on sak. An inn kiangih nauhak pate a rak si.
" Pate, tui ttum teh ziangmi na duh, No maw Pakan sawn ha na san ding"
"Asilo, Papa in langkhat in va lak aw in ti"
"Aw aw... ka lo pek ding. Na pa kha rak sim aw, a rei hlanah kei khal ka ra cih ding tiah"
A duhtu hrangah
Thuthangca sungih nupi pasal hawlnak huang ah tlangval pakhat cun "Nupi ding pakhat ka tul" tiah a theh lar aw ve si hmang. A thaizing ah mipa tamzet hnen ihsin khirh nak ca pawl thuthangca suahnak hmun ihsin a ngah sal.
A ngah mi ca tinte ahcun...
"ka nupi hi ra la mai aw"
ti hlir ih ngan mi hi a rak si!!
Kum kim hrih lo ruangah
US ramih state pakhat ah zahmawh a bangaw mi (Same sex) pawl thit awk theinak dan an tuah thar. Hi tikcucan tha a hngak rero tu nunau le nunau, mipa le mipa a kawpkawp ten kutsihnak zungah ra in dan vek rori in an ra thi aw hai. Hiti lai ah, rangcang par to phahin Cowboy pakhat a ra thleng. Cupa cun kutsih ding a ra ngen ve.
"Mipa le mipa nan kutsih aw ter lai rori ka hmu. Pakhat le pakhat an duhdaw aw asile thit awk ter uh tiah dan in a sim. Kei hi ka rangcang ka duhdawt zet. Ka rangcang khalin in duhdawt zet, curuangah kan nih pahnih hi in thit awk ter uh!"
Kutsih nak zungih hnattuantu pawl cu an buai theh. Dan pakhat vekah a cang ding ti an phan ruangah a phunphun in an ruat. Netabik ahcun ti dan ding lamzin an hmusuak.
Cumi cu hitin a si....
"Nan nih pahnih hi kutsih thitumnak tuah ding kan lo siang lo a si hrimhrim lo, amah lawngte monu ding hi kum 13 hman a kim hrih lo ruangah kan lo thi aw ter thei hrih lo a si" ti ah.
Ziangtin ka thei ding
Tumkhat cu Pa Bik ih khawlak leeng kha Malay rittheih sii hmang ( Drug addict ) pakhatin a paisa laksak tumin a rak suam. Pakhat le pakhat an si ruangah Pa Bik, khal cun sung pe duh ve ce hlah, a rak sual ve ciamco. Asinan, Malay pa cu a ruangrai a tumin a cak deuh sawn ruangah ti ngaihnak a um ta lo, loh theih lo in a paisa bag cu a pe ta ngenge. Malay hmurhmul sah nawn pa cun paisa bag cu a hun zoh ih lungkim lo zet cun hitin a sim...
"E..khai, nga-mu te lawng nei mi rori ziangah khatin I rak sual ve ciamco, na ning teh a zak lo maw..??"
"Ziangtin ka thei ding, ka kedam hnuai ih ka thup mi Ringgit 50 na lak tumih ka neih ruangah si ual!!
Nazi neilo makpa ka duh lo
Tlangval pakhat cun lamzin ih a feh laiah, nazi a nei lo thawn , a tawnmi nu pakhat cu, "Ka pi nazi paziat ha ti in sim thei pei maw" tiah a sut. Nu cun, "Ka lo sim theilo, ka lo sim asile, in nel kei, kan inn ah na ra leng kei, ka fanu thawn nan tawngaw kei, nan biakaw kei, nan duh aw kei, nan nei aw kei... cuvek, nazi hman nei lo makpa ah ka duh lo" a rak ti.
Pum pop/tlang ih thi an um maw?
Tlangval pakhat kum cang zet cun fala a leng ve theu ih, a rualpi pawl hnen hitin a sim theu, "Ka bang naza, ka bawngbi a ciar theh..tvp" nan an zum lemlo. Nikhat cu an khawkiang ih nuthlawi a va lengih, nidang vek siloin cui a nuthlawi len mi nu cu a va ngah ta riai.! Zamrang zetin a tlan tlung vurvo cih. Rualpi hnen khalah tong ngam lo in, inn ah a tlungih, a thaizing nitlang aii ih a to laiah, mizan lam a lennak khawmi nauhak pakhat a rak ra, "Valte rak ding hnik" tiin a hei auh ih, "Mizan nan khuaah pumpop ih thi an um maw?" tiah a sut.
Nunsim nak ah
"Nu-pi, ka rualpa nupi neih ding lawnglawng a rel rero ih nun sim kaduh ruangah rawl ei ka ko so khaw..."
"Kan inn a hnok tuk lai sisi, hmun bal hman ka phiat man hrihlo, buhfai hnawm khal ka zoh hrih lo. Ziangah saw na kawh duh hrih.."
"Nunau fel lo dan pawl, kan innsangah ra hmu ta sehla, a nupi neih cak nak a reh deuh pang ah ti ah..."
Sibawi Thiam
"Na khuitawk ha na bik ih na theih...?" Lai khawte ih Sibawi pa cun damlo mina kha a sut.
"Sibawipa, ka thaw ka thawt tinte ka taksa a na ciamco, ka taksa in thaw-hip a ngaih lo!"
"Asile, nithum sung na thaw thaw loin um sin awla a tha mei ding" tiah Sibawi pa cun a cah ta.
Nithum hnu lamah Sibawi pa in cui mina cu va veh leh na khaw a thihnak nihnih a rei zo an rak ti cu teh!!
Thleng danglam awk nak
Phir Hnin cu a rualpa hnenah a vui hnukhno rero.
"Nupi ka neih pek lai kha cu a nuam zet. Zanlam inn ih ka ra tlun le ka nupi in ka kedam hruk ding in rawn lak, ka uite vulh mi asile a mei phir veuhvo te`n kan khaan sung hmuahhmuah helin in bo ciamco theu. Tu, kum 6 a rawng rei tikah a thleng danglam aw thluh zo. Tu cu ka Uite in ka kedam hruk ding in rawn lak, ka nupi in in bo ciamco sawn theu"
"Ziangah ha na phun nuahno rero, a tir ih na ngah vek service cu na ngah ringring lai ko si lo maw...!"
Nungin ka ret lo ding!
A cal ih hliamhma tuarnak dum (Hma-si dum) tum zet thawn mi pakhat cun thingkuang tum zet pakhat hi thei le thei loin a hnuk rero. A hmai ih hliamhma cu a rualpa hmuh phahin a sim.
"Ka nupi ih in thawi nak a si hi..."
"Si maw...? hivek tiangtiang na tuar thei cu ka mang na bang ko. Ka nupi cu si ve sehla nungdam in ka ret hrimhrim lo ding"
"Kan bangaw a si cu, a tu hi thingkuang sungah ziang mi a um dingah na zum..?"
|
Hmursen putar
"Sibawipa, ka pasal hi daan thalo cinken mi pakhat a nei, ka hmursen bawm la in a hnih aw theu so khaw.."
"Kum ziangzat a si zo?"
"A kum thawn ziangtin a pehtlai aw?"
"A pehtlaih awk thei ruangah ka lo sut pan teh"
"Kum 94 a si"
"Ai-ka-rei, kum cuti zat a kim zo ahcun cu tluk tal cu a si pei cu. Um hrih hnik, ziangti vekih um ter so na duh I...?"
"Ziangti um ter cu duh cuang hlah e, kan innsung phar pawl lawnglawng hi hnam nawn lo sehla ka duh nan...!!"
Nangmah ho maw..?
Khawpi sungih Palik zung pakhat ah a si. Zung sung ahcun Inspector pa a ra lut. Palik akzahnih rual cun mi pakhat an rak hrem rero ruangah a sut hai.
"Hey..., hi pa hi ziangruangah nan vuak rero?"
"A umnak kan sut ih, in sim mi address ah kan va feh nan a khaan kiangih umtupa nih hinah a um nawn lo a ti ruangah in bum ngam nawn lo dingin kan hremnak a si."
"Aw...aw, cuti asile hrem ko uh"
Cuti ih a ti thluh hnu ah Inspector pa cu a vak suak. A hnu reilote ah Inspector dang pakhat a ra thleng sal. A hmaisa pa vek thotho in a sut ih, Palik pawl khal cun a hmaisa vek thotho in an rak sawn.
"Aw .., cuti vekih mi hrawkhrawl cu napin hrem hrih uh" a tiih a fehsuak sal.
Tawkfang a rei hlan ah Officer pa a ra thleng. A hlan ta vek thotho in a sut ih, akzahnih rual pawl khal cun a kel ten an rak sawn lala.
"Hi tluk nan hrem zo ahcun a tawk ko. Thlah sal uh, cuti lole a thih tla a thi hngehnge pang ding"
Vuak tuar pa cu hliamhma tam zet thawn a hmai thling bialbial in inn ah a ra tlung. A khaan tawh on mi thawmvang rak thei tu a rualpa cun thatho zetin....
"Hey.. Pa Nawl, tuizan cu zu in do sal lala a tul ding"
"Ziangah maw...?"
"Eee.. le, tuisun ah Palik pawlin hitawk khaan ih na um le um lo in ra sut ih, a um nawn lo ka rak lo ti sak manah mawle..!!"
Mi hrokhrawl
Rualvah hnihte zanthim ah ke in an ra tlung. Zinkawi pakhat an thlen zawngah misual pakhat cu meithal thawn a ra suak. "Hey, nan ban pahnih phar uh" tiah order a rawn pe. An rualvah hnihte cun an ban an phar lohli. Cu thehah pakhat sawn tu cun misual pai` hnenah hitin a sim.
"Ka ban khatlam reilote ka thlak ta lawk ding a ngah pei maw..?"
Misual pa khal thinlung tha ra lutin a ban khatlam thlak cu a rak siang. Cu veten ban khatlam thlak tupa cun a bawngbi zal sungih paisa $100 cu phorh suakin kut pahnih thlir ringring tu a rualpa ih kawr zal sungah a hei than sak. A kaa khalin hitin a sim phah.
"Khah...khah...kha...la aw..., tu lawngah ka mangsuak, paisa $ 100 lo rulh ding ka nei nan si lo maw..."
Cerek nei tam
Pacangtha pakhat kha tumkhat cu khawpisung heltu tlangleng par a ra kai ve. Zin tluanih a rak pai mi Laiphir methal cu a kawngpi parah a ret. A meithal ong zawn cu a kiangih to ve nupi nu a tin ringring vekah a cang. Cui nupi nu cun ralrinnak aw thlam thawn a sim.
"Khah, ralring ten tuah awla, rinlo ih meithal mu tla na ti suah pang ahcun...."
"Poi hlah e, Cerek dang hun pai lai na famah"
Nauhak panghel
Zinglam zung kai tikcucan ah a si. Bus station ahcun Bus hngaktu pawl an tam zet. Bus pakhat a rung ding. A hmaisabik ih dingtupa cu mi zaangfah nei, mi lainat thiam zet ding a bang. A hmaisabikah ding hman sehla, mawtaw par kai lohli lovin nunau pawl a kai ter hmaisa. An kai theinak ding khalin a bawm hai.
Netabikah nunnau nu pakhat a hun sawm kai. Cui nunau nu cu mawtaw par a thlen veleh rinlo pin' dunglet ra hoi salin cu pa cu a biangah a rawn beng fukfi. Bus sangka khal a khar aw ih, a tlan liam cih. Cu pa cun a biang cul phahih nunau nu cu a cam sia rero.
"Nunau zei lo tak a si hi, duh sak nak khal thin nat nakah a cang men"
A dunglam ihsin tlangval pakhat cun Amen a rak ti nasa.
A si tho, nunau zeilo le hlauthlo zet hokhaw a si, kan tlawng sayama a hei si sabbai. Mawtaw parih ka kai zawngah a tawka ka sik a si kha.
"Cuai Sarih in ei aw"
Vawi khat cu lai khawte in pakhat pa sibawi a zir. A sibawi zirnak ah vawk sa that lo zia le vitamin a neih lo thu a zir. Sibawi tlawng a theh in Christmass ah an khua ahcun a hung tlung ih vawksa ei a that lo thu a sim ciam co ih ei lo dingin a fawrh hai. Cule an khuaih putar pa khat in "sibawipa kum khat vawi khat, tui' christmas can lawng ah si khawh vawk sa ka ei theu ih cu cu vawksaw ei loin maw ka ka um ding" ti'n a sut. Cule sibawipa cun cuti asi le cuai sarih in ei aw ati.
Zuk suai thiam
University pakhat ih an sayakyi pakhat cu an tlawng ra paltu pawl tlawng a fanpi rero. Hmun dangdang fan phah cun thuhla a hei sim vivo ih, Art gallery an thlen cun, tlangval pakhat hin fala, lawngte fang kheh zuk hi a rak suai! Sayakyi mithmai cu a siat theh hleiah, a ningzak ti ngaihnak thei lo cun, “Tlangval na va hngal so, ka tlawngah hivek lawmmam na suai ngam” tiah hro phah in a hei ti, tlangval pa cun, “Sayakyi pipi na si zo ih, na tlawngah zuk suai thiam ngaingai kan rak um hi na thei lo maw? Angki ka hruh ter rero lai a si hi, ka hruh ter hmaisakmi a millaw lo ih cunah fam the” tiah a rak sawn.
A umlo ti aw hlah
Mai ruah mi pawl vekih mizuk suai thiam Picaso kha a rualpa pakhat in hitin a sim...
"Sorry si, na kut hnu pawl hi ka theithiam lo lawlaw. Na zuk suai mi hi a taktak khalah a umlo mi pawl a si lo maw?"
"Nang hi tuluk tong na thiam maw?"
"Thiam hlah e"
"Asinan, Tuluk tong timi hi a um so khaw!".
Tlangval fel!
Pathianthu duhzet le piangthar tha zet mi tlangval pakhat kha zankhat cu a falanu tei innah zan rei hnu tiang to phahin titi thunuam an rel. A tlun tum zawngah rinlo pin' ruah tak zet a rawng sur fam teh. A fala nu cun-
"Ka u, ruahpi le a tak zet fawn, innah tlung duh nawn hlah. Tuizan cu hinah riak ta ko aw"
"Awle, ka lung awi" a ti ih tawkfang ah cui tlangval pa cu a hlo daih. Zanlai patum ah ruahti ciar thlepthlep thawn a ra thleng sal. A fala ih nu ( a pi hual ) cun a rak sut.
"Ka-rei..!,.. Ukte, khui ah so na va hloh lawk"
"Aw..., tui zan cu innah ka ra tlung nawn lo ding tiah ka nu ka va sim ta duak"
Raltha
Hlanlai ram pakhat ah an ram Siangpahrang pa cun ka ram sungih mipa pawl hmuahhmuah lakah zo si a raltha bik ka hril dingih cupa cu Suitum cuai 12, ka uknak ram hrekkhat le ka fanu ka pek ding tiah thu a than.
Cuticun a ram sungih pasaltha ka si a ti aw tu hmuahhmuah cun ralthat zuamaw dingah Siangpahrang pai tualrawn an ra suak khawm hai. Siangpahrang pa cun,
"Khai le..... ka raltha a si a titu nan um asile hi tiva hi raltha zetin nan kan suak ding..."
...tiah Tisartam (Crocodile) rilrawng pawl retkhawmnak tiva cu kaan a fial hai.
Pakhat hnu pakhat an zoh aw ih, thih hnak cun ka ralthat lo tak khal le a poi nak um hlah, tiah zohman in kaan an tum lo.
Asinan, tawkfang a rei hnu ah mi pakhat cu "pa phummm...." ti leh cui tiva ah a dawp ta mai. Zamrang zet cun khatlam ral a hei tan ih a kaan suak lohli thei.
A zohtu mipi pawl hmuahhmuah cun cupa cu,
"E heu... a va raltha lawmmam ve"
tiah an fak an lawm zawk rero. Siangpahrang pa khalin a thutiam vek cekci in laksawng cu a pek.
"Ka ram sungah nangvek paraltha ka lo nei hi cu ka hna a ngam tuk. Ka ram mipi pawl hnenah thucah duhmi le rel duhmi tla na nei asile hun sim ta aw" tiah a ti.
Cutikah a nih cun,
"Ralthabik laksawng in pek ruangah ka lungawi zet. Asinan, mitu tiva kapih ka din laiah ka dunglam ihsin zo nih rinloparal ah in nam thla timi te cu theihfiang ta ka duh hrim hrim.."
|
