Democracy ngah ding ah kan rak zuam nak hi a hrek nih kum 20, a hrek nih kum 50, a hrek nih kum 60 a kim zo an ti ding. 1988 in kan siar le kum 20, 1962 hrawng in kan siar le cun kum 50 hrawng, 1948 in kan siar le kum 60 kan ti pei cu.
Hi tluk caan a rak rei zo nan ziang ah Democracy cu kan ngah lo?. A thu phunphun khal a um ding nan, kei mah nih cun Unity kan neih lo ruang ah asi ka ti ding.
NLD pawl khal unity an nei lo nak tete hmun tampi ka hmu hai. Hmun tam nawn ah ka rak sut hai tik ah pakhat le pakhat an rem awk lo mi tete a tampi ti ka hmu hai a si. Kanmah tlangpar party pawl khal kan bangrep ve ko.
Kan ram Democracy ngah nak ding ah hna a ttuan mi pawl hi unity taktak an nei maw?. Pakhat le pakhat, group pakhat le pakhat pehtlaih nak ttha kan nei maw?. Ram dang ih um kan upa hrek khat nih an rel dan ah cun Democracy hrang ah an ti ih project phunphun an suah pi ih an ngah mi paisa cu democracy hrang ah hmang lo in mah pumpak hrang ah an hman ttheh. Money democracy lawng asi ti ah an ti. Unity kan nei hrim hrim lo ti mi thu tampi ka thei.
Tu naite ah Norway um mi Chin community chairman pa interview an tuah nak ah a sim mi cu ''ENC pawl khal tui election hi tha pek vek, pek lo vek in karlak ah an um ih ka mang a bang. Hi mi hi paisa hawl nak pakhat ah an hmang men asi pei maw ti ka ruat'' ti ah a rak sim. Hi thu hi a dik taktak mi tla asi thei men. Adik lo mi a si tla le Unity an nei lo timi hi a lang zo a si. A dik a si le cu kan mah tlangpar mi pawl nih kan duh mi Democracy le National Equality timi cu tui hnu kum 20 kan ti sal khal le kan ngah thei lo ding.
Kan dung phungki pawl buai nak ah a tel ve tu 88 cithlah tlawngta pawl group leader pakkat cu hna a ttuan thei nak ding ah hand phone pakhat a sang ih cu mi kha uktu lam in an kai ngah. Cu hnu ah phone neitu thawn an buai ih paisa a ttul thlang. Cutik ah ramdang um a rualpi pawl project tu le tu suahpi ttheu tu pawl kha paisa bawm ding ah ttha ten a sim hai nan zianghman an bawm nawn lo tikah cumi pa tla a hnattuan ttuan thei nawn lo in thawng a tlak ti ah ka thei dah.
Cun, pakhat pa tla nih a sim mi cu kei tla kan ram hrangah kum rei nawn ka rak buaipi ve nan harsat nak kan tong taktak tikah bawmtu ding background kan nei lo. Curuang ah ka hna in ka cawl ta a si tiah a ti dah. Kanram sungah nainganzi (politic) ka ttuan ruangah harnak ka tong ih ramdang ah ka tlan a ti tu hmuah hmuah hi a ngaingai ah kanram ah cuti vek an rak ttuan ngaingai asile ramdang an tlan hnu khalah kan ram hrangah a ttuan theitu si vivo hai seh la kan ram cu democracy kan ngah nak a rei thlang ding.
Kan ramah Democracy hrang tiin a sungih hnattuantu pawl karlak khal ah Unity timi hi a mal tiah ka hmu. Pakhat le pakhat, group khat le group khat contact duh lo ti vek, contact khal ah respect aw duh lo mi tampi ka hmu hai a si. Hna kan ttuan nakah tangdornak an nei lo. Hivek in pakhat le pakhat respect duh lo ti vek , contact duh lo tivek hi natnak suan aw vek in zamrang in asuan aw a si. Mi pakhat a hnattuan nakah respect duhlo nak a tong tikah a mah khal in a ttuan pi pa kha respect thei nawn lo in a um ih, cui a respect lo mi pa khal in midang pakhat kha respect thei nawn lo in an um ve tikah hna ttuan a ol nawn lo, tuah duh mi tuah a theih nawn lo.
Democracy kan ngah thei nak ding kanmah le kanmah sungah kan tangdor thei lo ah cun, kan lungrual thei lo ah cun, uktu ralkap bawi pawl hmai ah duh lo zet cingin kan lu kan kun a ttul hrih ko ding.
Salai Cho Mana,
Malaysia
