Thutlangpi pawl

          Tingtang Arsi STEVE VAI

 

Tu lai awnmawi khawvel ih tingtang tum thiambikpawl lakah a tluntabiklam ih um ding arsi pakhat cu Guitar Hero/Star STEVE VAI hi a si. Anih hi 06 June 1960 kum ah a suak ih, US, New York, Carle Place ih thanglian a si. A nauhaktet lai ihsin awnmawi duhzettu a si ih, ben [band] din in mahte hla phuah le sak in a rak um theu. Ben dangdang din in le ben dangdang ah lut in a um vivo ih, zirhtu le simtu tha tla tawng in tingtang tum tla fumfezet in a hun zir peh thei vivo. Cutin mi group ih va tel rero tul nawn loin amah ten a hung ding thei ve thlang.

 

• Awnmawi Cahram ah kirsal 

• Ram duhdawtnak
• Calai
• Nun Thuleng

• Theih tha

A zuamnak le a taimaknak zarah leilungtlun ih tingtang tum thiambikpawl lakah tel ban in leitlun mipi ih zohbik mi tingtang arsi pakhatah a hung cang thei. The Best Rock Guitarist tiin Readers’ Choice Awards kum tam nawn a rak ngah dah ih, The Best Rock Instrumental Performance tiin Grammy Awards khal a rak ngah rero dah. 1991 ah "Whispering a Prayer [Song for Ireland]" ti mi hla thawn Grammy award a rak ngah dah. Rock thuanthu ih upattlak pakhat a si ve mi Frank Zappa [thi zo] tla cun Steve Vai cu “My little Italian virtuoso” a si tin a rak lawm ve dah. Frank Zappa a dam laiah a ben ah Steve Vai a rak lut dah ih, Zappa hi Steve ih zirnak saya pakhat a rak si ve.

 

Tu ahcun leilungtlun ih tingtang tum thiambikpawl khalih upat mi le zohso mi a thiambik lam a si thlang. Hi tivek dinhmun ah awlai tei hung thleng thei mei cu a si hrimhrim lo. A nauhak lai ihsin thungaithlak in a zir in a cin [practice] theu.

Kum 14 hrawng a si ihsin ni khatah nahzi 12 sung, ni tinten a cin ringring theu. Exercise-pawl a tuah [cin] tik khalah a theh lai hlan lo, cawl lo le bang lo in a tuah theu. A cin hnuhnu cu a cawl nawn lo, zin/ek thiarawk khal a feh nawn lo, a theh lai hlan loh ti le rawl khal a in/ei nawn lo. Tum khat tla cu zan, zinglam nahzi 2 hrawng ihsin a cin thawk ih, a thai zan tiang cawl lo riaiin a cin peh vivo. A lehhnu ih Interview an tuahnak ah, “Ih khal ka it lo, rawlei can khalah ka kehlam kut in ka cin rero phah thotho, ka vawrhlam kut lawngin ka ei ih, tingtang ka thlah lo lawlaw, sunvui tingtang awn ka theih le ka um a nuam, tingtang awn a reh cun ka um khal a nuam thei nawn lo,” tin a sim. Cutin a hung hminthan hnu khalah ni khat nahzi 6 hrawng cu a cin ringring lai thotho.

 

Steve kum 10 hrawng a si kum 1970 ah a unu Lillian Vai thawn “Hot Chocolate” ti mi ben an rak din thawk. A unu in tingtang a tum ih Steve in hlasak, Bongos tum le record player a tuan. A unu khalin a sah a bawm ih, an hla phuah le khum hmaisatbik mi cu “Hot Chocolate” ti mi a si. A lehhnu ah, “OK Lil, tui zan nang tingtang rak cin aw la, kei thaisun ih kan tum ding hla fing 20 ka rak ngan ding, tiih ka unu thawi kan biakawk ka mang lai,” tin Steve in a sim. 1972 hrawngah cun “The Ohio Express” ben ah a tel thei ih, a thawkah cun Keyboards a tum nan a lehhnu cun Tingtang a tum thawk ve thlang.

 

“Tum khat cu kan tlawng ah show an ra nei ih, an cawlh sungah tingtang hunnak ih an hun mi tingtang cu zoh tha ka ti tuk ih, ti kuahko in ka rak zoh rero. Supaw thei lawn tingtang cu ka naih vivo, zohman in in hmu hlah hai seh tin thla ka cam nan mi pakhat in, “Hey Vai, khai tingtang naihah ziangha na ti?, ziangtin na ruat? hi group ah tla na tel thei ve men thei hokhaw”, tin i run ti ih, an zaten an hni vualvo, ka ningzahdan cu umngaihnak khal ka thei nawn lo.

Cun a thaisun ah ka rual pa Richard Jankowski hnenah ka leng ih, a tingtang cu $5 in ka lo zawrh ding, na lei duh le, i ti ih ka lei lohli mei. Khuilam ih paisa ka nei ti tla ka thei nawn lo, asinan tingtang ka tum thlang ding ti zohman ka sim ngam lo. Cui sin ka rualpa Frank Stroshol thawn tingtang tum thiam hminthang Joe Satriani hnenah tingtang tum kan va zir. Cun ni khat cu kan tlawng ah ziang puai si maw ka cing nawn lo, tingtang le awnmawi thliripawl ka remsak ih, khukbilh le kun phah in ka kutzung le hmai khal phen in zohmanin in thei lo pam ding tin tingtang cu ka vun tawkthai hnik ih, minit 20 hrawng hnuah khua ka vun tang cu nauhak 50 rual laiin kaa ang phahin mangbang in in rak zoh ka hmu hai, cu ve ten ngaithiam ka dil hai ih, khawl [amp] ka phitsal lohli,” tin hi tikcu ih a umtudanpawl lehhnu ah a simsal.

 

Cu theh cun Circus, Rayge le Jimi Hendrix cover band “Bold As Love” [1977] tvk. benpawl ah tingtang tum in a um vivo. Anmai phuah mi hlapawl tlunah Led Zeppelin, Kiss, Alice Cooper, David Bowie, tvk. ih hlapawl tla an tum theu. Cun Berklee College of Music a kai laiah Axis [1978-1979] le Morning Thunder [1979] ti mi ben ah a rak tel. Cui sin a hmaisabik professional dinhmun in Frank Zappa [1980-1982] ah, The Out Band ah, cun The Classified [1984], 777 [1984], Alcatrazz [1985], David Lee Roth [1985-1989], White Snake [1990] ti pawl ah a lut vivo. Alcatrazz ben ahhin leitlun tingtang tum thiam hminthang pakhat a si mi Yngwie Malmsteen an dawisuah ruangah a aiawh in rung lut a si. “An ben ka luh pekah an show puai 3 hrangah cinnak can ni khat lawng ka nei ih, a hmaisabik puai tla cu ziangtik hmanah ka hngilh dah zik lo. Puai ra zohtu mipi hmuahhmuah cun Malmsteen a suah le suah lo thei lawn Malmsteen zohin in zoh thluh hai ih, a hmin lamlam tla a ausuak ciamco sapbai. Ka hmai in hmuh cun an umtudan a dang thluh rori,” a ti.

 

Cun David Lee Roth ih a um laiah an Bass tumtu cu leitlun ih Bass tingtang tum thiam hminthang pakhat a si ve mi Mr. Big ih Bass tumtu Billy Sheehan a si. Hi ben ihsi hin mipi in an thei vivo thlang. White Snake ih hla mawi le tha; The Deeper The Love, Judgement Day, Fool For Your Loving, tvk. hi Steve ih tumsak mipawl an si. Cu theh cun amai hmin VAI [1992-1994]hmang in a ding ih, 1995 ihsi cun “Steve Vai” tin tui sunni tiang a ding lanta. Billy Sheehan hin 2001 ihsin a telpi lala.

 

1988 ah Richard Pike thawn “Make a Noise Foundation” pawlkawm an din ih, awnmawi lamih paih minopawl le mino harsa pawl awnmawi an rak zirh. Berklee College of Music tlawng a kainak dingah a pa in a ‘life insurance’ zuar in a kaitir. “Awnmawi fimthiamnak thabik ka ngannak cu tlawng library ih awnmawi cabupawl ihsin a si”, a ti. 1979 ah Berklee College ihsin degree a ngah ih, kum 2000 ahcun “Esteemed College” ihsin “Honorary Doctor of Music” degree a ngah lala. “Hi tivekih tha mi pe thiam pa ka neih hi cu ka vantha tuk, ka tingtang zirnak hrangih tul mi in tumsak lawng si loin a suk, a so ah in thlah in in hmuak fawn, ka insungsangpawl parah ka lungawi tuk”, a ti. Cun khuai tla zuat in sumpai a hawl so vivo ih, lehhnu ahcun Grammy organization “National Academy of Recording Arts and Sciences [NARAS] ih upa pakhat ah a hung cang.

 

Steve hin Rock awnmawi lawng si loin West Side Story, Bernstein, Soldheim, Tim Rice, Lloyd Webber, tvk. mi burpi ih tum le sah Orchestra-pawl tla a rak duh ve zet. Hi tivek awnmawi phun hi “FireGarden” albam sung khalah a telh phahphah. FireGarden albam hi a albampawl lakah a tha lam a si vekin amah khalin, “Ka albampawl lakah ka duhbik lam pakhat a si” a ti ve. Hi albam a suah hnu, Fire Garden Tour an feh tumah, an tour hmin bangin eksiden an tawng ngelcel. 1996 November 27 ni ah, Highway par an feh rero laiah an mawtaw a kang ih, an zaten an thi thluh man leuleu. Sun lai, an zatei an ihthah laiah an mawtaw generator ihsin mei a alh thawk ih, Steve in a theih ve ten, mawtaw a cawlhtir. Cutin a rualpipawl a thang ih, an thilripawl lak cu rel loh, kedam hman hruh man loin an tlan ciamco hai. Steve ih Ibanez Jem tingtang 2, a nganmi hla note-pawl, Bass tumtupa ih Bass tingtang 1, DAT khawl 2, Video Camera 2, Computer 2 le an passport cabupawl hmuahhmuah a kangfai thluh.

 

Cun Steve hin amai inn thuai Basement ah Studio a nei ih, remcangzet in a duhduh tikah hna a tuan mei theu. Studio khawl thilri dangdang kha a phunphun in remkhawm in a pehzawm hai ih, thlipi hran awn, meisa kang awn, tah aihram awn, tvk. a phunphun awn danglam zetzet a hmusuak theu. Scales lakah Lydian mode hi a uar ve zet. Interview pakhat ah, “Speed playing hi hmuitin ih cin a tha. Scale lawnglawng pawngpa tum ih tum ciamco khal a tha lo. A thupizet pakhat cu a thawkah nuamnai ten note fangkhat hnu fangkhat sual lo riai ih tum zuam hi a si. Pakhat te tisual hnuhnu cun a taw ihsi thawhsal cingcing ding. Cuti ih dan [discipline] neih a tul, cu lo cun zianghman a sawtpawt thei ngaingai lo”, tin a sim. 2007 kum cem lamah khan Brazil, Chile, Argentina lamah Tour a feh ih, Zappa plays Zappa Tour ah tla mikhual dinhmun in Australia lamah a va telpi ve. Cun Guitar World magazine ih 2007 October issue ah Steve Vai le Joe Satriani cu a phaw zuk ah an tarlang ih, interview khal an tuah veve. Steve, mekazin phaw ih a cuannak hi 15 leng a si thlang.

 

Steve Vai hi 1985 ih suak Hollywood zuknung “Crossroads” ti mi ah tihnungza tingtang pa dinhmun ah dingin lem a rak cang ve dah. Hi zuknung hin mipi a hip thei zet ko nan lemcan hna cu a tuan duh nawn cuang lo. “Crossroads hi ka duh zet ko, ka telnak zawn khal tha ka ti zet, asinan lemcangtu si ding cu awnmawi hna thaw cun ka thleng thei lo. Lemcan tikah cun Director in cut! cut! tin ngaihum lo zetin a au theu. Ziangkhal sisehla, stage parah thinlung lutzet ih tingtang tum cu ziang thaw hmanin a bangaw thei lo, ziang thaw hmanin ka thleng thei lo, a si ko. Hi hi ka hrangih a dikbik hmun khal a si”, a ti.

 

Steve Vai ih albam suah zo mipawl;

 

SOLO DISCOGRAPHY

01. FLEX-ABLE [1984, self-released]
02. PASSION & WARFARE [1990, Relativity Records]
03. SEX & RELIGION [1993, Relativity Records]

04. ALIEN LOVE SECRETS [1995, Relativity Records]
05. FIRE GARDEN [1996, Epic]
06. ULTRA ZONE [1999, Epic]

07. SEVENTH SONG [2000, Epic]
08. ALIVE IN AN ULTRA WORLD [2001, Epic]

 

VARIOUS

01. Joe Satriani, Steve Vai & Eric Johnson
      “G3 Live In Concert”  [June 3, 1997]

02. Joe Satriani, Steve Vai & Yngwie Malmsteen
      “G3 Live: Rockin’ In The Free World”  [February 24, 2004]

03. Joe Satriani, Steve Vai & John Petrucci
      “G3 Live In Tokyo”  [October 25, 2005]

04. “The Infinite Steve Vai - An Anthology” [November 18, 2003]

05. “The Elusive Light And Sound” [December 11, 2001]

       & “Various Artists - Archives Vol. 1-4”, etc.

        Salai Peter Din