|
|
DEF LEPPARD + WHITESNAKE=...!
Awnmawi khawvel khalah hin awnmawi phunkhat le phunkhat asilole Khaw Khat le Khaw khat, Ram khat le Ram khat tivekih doawk le kahawk deuh hi a rak um phahphah ve. Doaw, kapaw ti tikah raldoaw vekih meithal thawn tiaw ciamco cu an si lo. |
|
|
Rock-pawlin Hip Hop-pawl sawiselin an hlafang vekah sakin an kap, an phirsit. Cuvekin Hip Hop-pawl khalin Rock-pawl an kap kir ve lala, tivekin an um phahphah ve. A ram zawng cun a hleice in America le Europe asilole US le UK hi kahawk an hmang phahphah deuh. Cu hmanah Rock/Metal-pawl hin an hmang duh cuang a bang. An elbam pawl tivekah an Ram thantar[Flag] an tarlang, an hlafang vekah an ngan, tawngkam vekin an tawng suahaw theu. UK ih Rock hruaitu, Heavy Metal ben pakhat a si mi Iron Maiden tla cun Concert tum khat an tuah tumah, an hla "Blood Brothers" ti mi thawn pehparawin "Hi hla hi leitlun hmunzakip ihsin tha in rak petupawl "America tello`[except America] hrangih kan phuah mi a si..." tin hi hla an sah zikah an Vocalist in a sim ta. Cuvekin Germany ih Heavy Metal ben suanvawr pakhat a si mi "Manowar" khalin langpang nawnih ti a hmang ve theu.
|
Culam cu si loin tui tumih kan ruahawk duh mi sawn cu UK ihsin leilungtlunih theih, lar le hmingthang Classic Rock ben pahnih, Def Leppard le Whitesnake cun tubaite ahkhan kawmawin ropi le rura tak Concert Tour an feh tlang ti thu lam sawn khi a si.
Def Leppard hi 1970 hrawng ihsi rak ding thawk an si ih, elbam khal tam nawn an suah zo. Alternative a hung lar ciamco ihsi khan Classic Rock Style ihsin Alternative Rock Style deuhin an feh ve. An Vocalist Joe Elliott hin "Rock hlasah thiambik" le an hla Acoustic version mawite "Two Steps Behind" ti mi in "Rock hla mawibik" ti in "Readers` Choice Awards" an rak ngah dah. An elbam thabik cu 1995 kum ih suak, "Greatest Hits, Vault, 1980-1995" timi hrilkhawm [Compilation] elbam a si. An hla tha, mawi le hit hrekkhat tla cu; Let` Get Rocked, Pour Some Sugar On Me, Love Bites, Animal, When Love & Hate Collide, Action, Rock Of Ages, Bringin`On The Heardbreak, tvk. a si.
|
|
Whitesnake cu 1978 hrawngih ding an si ih, elbam mallai an suah hnu kum rei nawn an thawmvang a reh reprep. 1987 kumih suak "Whitesnake 1987" elbam cu an elbam lakih thabik lam a si. A lehhnu ah "Greatest Hits" tin hrilkhawm elbam tla an suah ve. An vocalist David Coverdale hi awpawr pi tha nawn a si ih, an hla pawl khal "force" an nei thei zet. An hla mawi, tha le hit hrekkhat tla cu; Still Of The Night, Here I Go Again, Is The Love, The Deeper The Love, Judgement Day, Crying In The Rain, tvk. a si.
Leitlun Rock ben hminthang pahnih, Dep Leppard le Whitesnake cun an veikhatnak kawmawin 2008 June thla sungah UK Ramkulh pi cu rura rapthlak takin an nuai ciamco ta!
Let`s Get Rocked...In The Still Of The Night!
Salai Peter Din | |
