|
|
AWNMAWI LE SEMKEH
Awnmawi hi Ram le Miphun, Khua le Tlang, Sakhua le Biaknak ti loin zo pohpoh hrang a si ruangah vandumkulh [universe] tawng a si an ti. A ngaingai ahcun awn [sound] tawng a rak si sawn. Naute suakpek in tawng a theihthiam hlanah a nui’ aw a niam le a san dan ih zirin i kawk maw, i lawm ha ti a theihthiam bangin khuahlan kan pipu san, calai tiih a rak um hlanpi ihsin awn thawn pehparaw mi nunphung an rak hmang thiam zo khi a rak si. |
|
|
Asile awn pohpoh hi awnmawi an si thei ke’m? A thluk um lo milai tawng awnpawl, tiva luan awnpawl, ramsa tlan awnpawl, tvk. anmahte ih cang semkeh [nature] awnpawl teh hi awnmawi kan ti thei ke’m? Hipawl cu awnmawi hrangih kawmkhawm [compose] hrih lo mi le a tekdarh mi semkeh awnpawl an si sawn. Milai cun cui semkeh awnpawl cawngin an hun pawl vivo ih nuamte te’n awnmawi tiah a hung cangsuak thei. Awnmawi hi semkeh awnpawl ihsi ra suak a si, an ti mi teh hi ziangtlukdik na kei maw? |
Rang ke awn, tiva luan awn, lungtur awn, tvk. punghman ih a awn ringring mipawl ihsin vuak [Beat/Timing] an pawl suak. Cuisin vuak mi thilripawl [instruments] an ra suak. Vate, Arawn, Sai, tvk. aiawn ihsin aw khat ih suak, awn dan dangdang, a sang, a niam thlengaw mi hri bun thilripawl [tt. Tingtang, tvk.] le a phawt ih phawt thilripawl [tt. Phirivau, tvk.] an ra suak lala. Cun Butlakpawl a rual ih an ai dan ihsin a rual ih hlasah [burzai] dan an hun hmang thiam. Cinghniapawl pakhat hnu pakhat hmun dangdang ihsin aw phun dangdang ih an aiawn theih mi ihsin Harmony/Backing Vocals sah dan an hun ruat thiam lala. Cui sin Zawngpawl ih tisupso ih an phun dan zohin a sam ih sam, a sal ih sal dan an hun hmang thiam vivo. |
|
Asinan semkeh thilthu ah Vate lawnglawng, Rang lawnglawng asilole Butlak lawnglawng tiin an um lo ih, an zate’n rawiaw in an um thluh. Rangpawl in hrampi tlunih an tlan thlurhthlo laiah thingkung par ihsin Vatepawl in hla an rak sak hliarhlo ih, hmun dang ihsin Saipawl in tihumho in an rak Bass can kha an hun thei ngah vivo. |
Cuti’n a tirih thilri kan ti mipawl cu pakhatte te’n si loin a rual ih an hun tum tlan tikah a mawi cuang in ngai a nuam cuang ti an hun theithiam vivo. Cuti cun a thluk [Melody], a vuak [Beating], Timing, Tone, Scale, Key, Chord, Note, Technique, tvk. in an ra suak vivo ih, awnpawl khal ngai nuam dingin an remkhawm thiam vivo. A tirlam ih awnmawi cu lungpuk vek a sile lehhnu lam ih ra suak cu inn vek a si kan ti thei ding.
Awn tawng lole awnmawi phun 2 in a um. 1nk. Awn lawnglawng le 2nk. Hlafang [a thu] le awn kawmkhawm mi tiin. A tlangpithu in a hmaisa sawn phun cu “Awnmawi” ti a si ih, a neta sawn phun cu “Hla” ti a si. Awnmawi cu “Adam” a si, kan ti a sile hla khal cu “Eve” a si, kan ti thei ding. Cu ti a si ahcun, hla [Eve] fing khat phuah mi cu awnmawi [Adam] ih hnakruh pakhat thawn a bangaw ti can a si ding …
Salai Peter Din
[Hsn: Hi thu hi Yan Naung Oo ih “Music & Nature” ti mi cahram sirhsan mi le 2006 April ah Falam Pawlpi Mino, Yangon (FPMY) ih Fellowship, Sing Song Service neih tum ih sim mi a si.] | |
