ZNC le CPP Relkhawmnak Nei
Chin World Media
January 10, 2012
Tuisun January ni 10, 2012 zinglam nazi 10 ah Yangon hmunkhat ah ZNC le CPP pawl thurelkhawmnak an nei a si tiah thuthang kan thei.
Cui thurelnak ah ZNC ihsin hotu, Pu Chin Sian Thang, sungtuan Pu Gin Kam Lian le tuanrel committee sungtel Pu Suan Mang le mino pahnih an tel ih, CPP ihsin hotu, Pu No Than Kap, le sungtuan bawmtu Pu Shing Htun, Pu Dai Thung le Pu Saw Mya pawl an tel ti a si.
Relkhawmnak ahcun (1) Chinram le Chimmi pawl hrangah kutkai-aw ih hnatuan tlang thei ding dan (2) Chinmi rualremnak tuah theinak ding dan pawl hlunghlai zetin an rel tlang ti si.
CRPP sungtel ZNC hi kum 1990 hrilawknak ih a nehtu party pakhat a si ih, kum 2008 Danhrampi an lungkim lo ruangah kum 2010 hrilawknak ah tel loin duhlonak langtertu party pakhat a si. Kum 2012 kum thar ahkhan, lailak hrilawknak tuah hnu-ah Zomi National Congress (ZNC) cun register kan tuah ding a si tiah ZNC sungtuan in misenpi hnenah a simthan tin kan thei a si.
Chin Progressive Party (CPP) hin kum 2010 hrilawknak ah an rak zuam ve ih, Pyithu hlutdaw hmun 2, Amyotha hlutdaw hmun 4, Pi-ne hlutdaw hmun 5 le Sakiang ramthen ih Chin Amyotha hlutdaw ah hmun 1 tin nehnak cotu an si. Chinram ahcun USDP party hnu-ah a pahnihnak nehnak a co tambiktu an si.
........................................................................................................................................................................................................................................................................
