|
CNF Telin Tlangparmi Hriamhrei Kai Pawlkom Pali (4) Thawn
Lungkimnak Nei Ding Zum
January 03, 2011
 Kumkhua remdaihnak nei thei dingin then thum (step pa 3) ih tuansuahnak ah kahawknak colhsan lungkimnak relkhawmnak ding cu kum 2012, January thla sungah tlangparmi hriamhrei kai pawlkom pali thawn relkhawmnak kan nei ding a si tiah cozah lam ih remdaihnak palai pakhat in a sim.
“January ni 5, le ni 6 ah Chin Natioanal Front (CNF) thawn kahawknak colhsan ding thu thei dingin kan relkhawm ding. Zatek 95 cu a felfaizo. Cule ni 12 ah KNU, a zarh thumnak ah New Mon State Party le a zarh linak ah KNPP thawn kan relkhawm ding a si” tiah cu pa cun a sim.
 January thla sungih kahawknak colhsan ding sign thutnak thu ah a remcannak ding thuhla tampi a um ruangah kum 2012 hi Kawlram hrangah remdaihnak thuthang tha kan theih kum a si ding thu tla cu pa cun a sim tel. DKBA le SSA pawl thawn kan dung December thla ah lungkimnak sign an rak tuahsuak zo.
President Pu Thein Sein ih tlangparmi hriamhrei kai pawlkom pawl thawn kumkhua daih remdaihnak nei thei dingih tuansuahnak ah then thum ah then in tuansuak ding ti a si ih a hmaisabik then khatnak ah kahawknak colhsan ding, pehtlaihnak zung tuah ding, hriamhrei kai lo in hmunram ah khualtlawn theinak pawl an si. A then hnihnak ah relkhawmnak tuah ding, tikcu le a hmun rel ding, khatlam le khatlam zumnak nei thei ding le ramthu hawi in relkhawm ding, bangran covo co thei ding le hmunram thansohnak tuahsuah ding ti pawl an tel ih, a then thumnak ahcun Naypyidaw ih misenpi ai-awh palai pawl, tlangparmi palai pawl, ramthukhel party pawl, le misenpi ai-awhtu palai pawl zate hmai-ah kumkhua daih remdaihnak relkhawm in sign thut ding ti a si.
Dr. Sui Khar ih a kaihruaimi CNF Peace-Talk group pawl khal Chinram lam pan in an feh zo tiah thuthang theih a si.
| 
