|
A THOK NAKAH CHIN UNITED F.C AN DUAI
Chin World Media
January 09, 2011
Burma ramih a sangbik bawhlung zuamawknak puai asi mi Myanmar National League, 2012 zuam awk nakah Club thar pakhat dinhmun ih a tel vetu Chin rampi aiawh Chin United F.C Football Club cu January ni 8, 2012 Sanchaung, Padonma bualrawn, Yangon khawpi ah Shan rampi aiawh Kanbawza Football Club thawn an zuam awk nakah 2-0 in an sung tin thuthang ka ngah a si.
 Ramsung lehpannak lam ahleice ih tarlang theutu Soccer Myanmar Website in hi lek zuamawknak an theh hnu ih an thlir sal nakah – Chin United Football Club cu puai thok pek lamah hmainortu MarLa in hmun hlapi ihsi sit mi veikhat ti lo cu Kanbawza Club pawl hei Goal ve thei ding khawp ih nor/tihthaih theinak an nei lo, tiah an tarlang.
Chin United Club ih media tuanvo neitu pawl inChin tong thawn an thusuah nakah “Chance tha zet veikhat kan ngah ko nan goal ngah loin kan um ih, khat lam tei pawlih thun luh mi goal pawl cu an vanthat nak liolio ruangih an ngah mi a si tiah simin, hi bawhlung puai tha ra petu Chin mipi 1000 tluk an um tiah” an sim.
Hi bawhlung lek zuam awknak ah tha va pe ve tu Chin cangantu Mai Sokhlei Par cun, “hiti vek bualrawn sungah mah rori va feh in thazaang ka va pek dah lemlo nan, tuini cu kan mai Chin Club pawl an sit ding ti asi ih ka va feh ve. Chin mipi thazaang petu pawl tla an tam zet. Chin ram thleng rori vek khi kan bang. Myanmar Selected a si dah tu Lal Ceu Luai kha bawhlung sit nak ih a tel ve ka hmu lo” tiah Chin World Media hnenah a sim.
Chin United Club hin an mah zirhtu (Coach) ding hotu lu bik ah Mandalay ih acozah lekpan fimthiamnak lam ih zirhtu rak tuan dahtu Pu Thang Sian Khup cu hotu lu bik (Trainer) ah hmangin, hotu sang ah U Aung Khaing (Myanmar U-19 Assit. Coach), trainer member ah U Zaw Win le U Kyaing Than pawl tla tuanvo pek an si. Bawhlung lektu mi 28 pawl thawn dinkhawmmi Club a si ih, Local player 10 an tel tiah theih a si.
Chin United F.C hi January 14, 2011 ah Zeyar Shwemay Club thawn Monywa ah bawhlung lek zuam awk nak an nei ding.
...............................................................................................................................................................................................................................................................................
| 
