|
|
|
Mipi 3,000 Lenglo In Thawngtla Suakthar Pu Anthony An Hmuak
Chin World Media
January 23, 2012
Kum 2012, January 13 ah Zomi National Congress (ZNC) hotu, Pu Chin Sian Thang le Pu Anthony ih naupa le Pu Anthony cu Yangon ihsin zinglam nazi 10: 30 ah vanzam thawn an zam tlung ih, Kalay khawpi ah nazi 12:45 ah an thleng.
Kalay ihsin ZNC party sungtel pawl, NLD, CPP, Zomi Tlawngta Pawlkom sungtel pawl le khawmi, khawpa misenpi pawlin Bogoke lamzinpi tluan ah Kalay Vanzam Colhnak ihsin Pu Chin Sian Thang ih inn thlen tiang Lai nunphung lam, thlung le dar, pangpar, au-aw le tahaw awkhawk phunphun thawn hlunghlai zetin an rak hmuak a si tiah Kalay ih Chin World Media palai in a sim.
Thai-Myanmar ramri ah hmun a khuarmi, Zomi Student and Youth Organization (ZSYO) ih tuanvo neitu pakhat cun “Ramthukhel ruangih thawngtla pawlin luatnak an ngah hi lungawiza ngaingai a si, misenpi pawlin hivek ih an rak hmuakdan kan zoh asile misenpi pawlih duhnak felten kan hmu thei a si. Tuihnu khalah Pu Anthony in kan ram Federal uknak le Democracy uknak hrangah tuihlan hnakin hlawhtling zetin tuansuak vivo thei hram seh tin thlaza ka cam a si” tiah Chin World Media hnenah a sim.
Pu Anthony cu Jeep (10), Ben (1) le Bus (1) telin a zaten mawtaw (13) le Bike (100) lenglo thawn an rak hmuak ih, lamzin le mawtaw kiltu palik pawl khalin lamzin sialsak in an rak bawm ve ti a si.
Pu Anthony Kap Khan Khual hi ZNC ih mino hotu pakhat a siih, kum 2007 phungki dothlengnak ah, Ethic Youth Network Group (EYNG) ah a rak cangvai ve ruangah Pu Chin Sian Thang ih fapa, Pu Kam Lam Khup thawn kaih an rak tuar ih, kum (8) dan tatnak thawn thawng thlak a si, Pathein thawnginn ah kum (4) lenglo kharhkhum a tuartu a si.
(Photo: ZNC Info/ Zo Net)
................................................................................
| |
