|
2011 Indy Chin Community Pawlkom Khawmnak
Chin World Media
November 21, 2011
 November 12, 2011 (Nipi zaan) cu Indy Chin Community ih pawlkom khawmnak (combine service) cu tluang le rem in Falam Baptist Church Of Indiana ah an theh suak a si. Mino tamzet le nu pa tam nawn in khawmpinak an nei ih hivek khawmnak hi kumkhat veikhat neih theumi a si thu le tutum an khawmnak hi A Vei (10) Nak Lai Kum Thar Puai , Atlanta, USA ih Indiana state aiawh in laksawng tamzet a va ngahtu Indy Chin Mino pawl sunloihnak thawn ceem ih an tuahmi combine khawmnak a si thu Chin World palai hnenah tuanvo neitu pakhat in a sim.
 Tutum khawmnak ah Kawlram lam ihsin khual lian Rev. Kenneth Ngun Herh Ling siseh Chin Pawlpi USA ih sungtuan Pu Van Tuah Piang le Rev. Van Nei Kam pawl in thucah simnak caan an nei. Thusim a that tuk ruangah le pakzai (Solo) saktu pawl an thiamtuk lawng si lo in FCCI (Falam Christian Church of Indianapolis) le FBCI (Falam Baptist Church of Indiana) mino pawl laam an thiamtuk mi khal hi mangbangza a si an ti. Hitivek ih hmunkhat te ih mai tong te thawn ziang kawhhran e ti um lo ih Pathian thangthat tlang vualvo tluk ih nuam hi khoi tawkah a um nawn pei tiah Indy Chin Pawlpi pawlkom khawmnak ih ra khawmtu pakhat in Chin World hnenah a sim.
Mino tamzet hmunkhat te ah lungawi aipuang tak ih an komawk mi le Pathian an biak tlang hmuh tikah thinlung mitthli lamlam a haal theh tiah Indy Chin Pawlpi Hotu Salai Tial San Bik in lungawithu a sim ih hlei ah hmaikum lam ih hruaitu thar pawl le mipi pawl khal cak sinsin in kan miphun le ram hrangah feh vivo thei ding in duhthu a saammi pawl khal mipi hmai ah a sim tel.
 Indy awnmawi tum thiam pawl lak ih pakhat a si mi le Indy Chin Pawlpi sungtuan bawmtu a tuan rero laitu Salai Lai Lung Lian in Lai Kum Thar ih Indiana state aiawh ih laksawng ngahtu pawl sunloinak ah guitar maksak a tum sak hai tiah thuthang kan thei. Salai Kawl Lian tla cun hitluk lawmlam ih turu cu ka mangbang. Laimi kan duai lo ti cu a dik rori tiah a sim.
Indiana pawl hi USA pumpi Lai Kum Thar an tuahnak ah saphawhum sit (football/soccer) kum hnih sung chiampion la zotu an si ih pakzai (solo), Lai laam, Saphawhlum beng (volleyball), Hridirh, Tong upa zuam, Biazai Chiampion le Bible zoh lo siar pawlah state dang hnak in nehnak co tambiktu state an si ringring. Laimi USA ih um tambiknak khua a si hlei ah Laimi sung ih mi hminthang le hlasak thiam pawl um tambiknak khuapi khal a si.
.......................................................................................................................................................................................
| 
