|
Lailak Hrilawknak ah Zalen Zetin Cangvai Thei Ding
December 16, 2011
 Rampi Hrilawknak Commission hotu Pu Tin Aye cun a rei hlan ih an tuah dingmi lailak hrilawknak ah ramthukhel party pawlin dawnkhamnak zianghman um lo in, zalen zetih organize tuah thei dingin siannak kan pe ding a si tiah Naypyidaw ih an tuahmi thuthangca simfiangnak ah a sim.
Rampi Hrilawknak Commission cun ziangtik ah hrilawknak tuah a si ding ti an sim thei hrih lo, hrilawknak hrangah timtuah ding tampi an neih lai ih, thla thum khel in kan phuang leh ding a si ti’n le ramthukhel party pawlin zalen zetin misenpi pawl organize an tuah thei ih hlutdaw sung an thlen thei lawngah ram thatnak hrangah hna an tuan thei ding, ramthukhel party pawl khalin ram thatnak hrangah an tuan fingfing ding tiah zumnak ka nei a si tiah Pu Tin Aye cun a sim tel.
Tuisun ahcun Rampi Hrilawknak Commission cun Vote lawngnak hmun pawl an phuang felfai thluh zo ih, Pi Aung San Suu Kyi le NLD party in hrilawknak ih an tel ve ding khal Commossion hotu pakhat sinak in ka hmuak a si tiah Pu Tin Aye thotho cun a sim.
Pyithu hlutdaw vote thlaknak hmun (40), Amyotha hlutdaw hmun (6) le Daing/Pine Hlutdaw hmun (2) a zate kom hmun (48) le tlangparmi pawl thawn kahawknak ruangih hrilawknak tuah thei lonak ding hmun (17) pawl tla famkim zetin an than zo ih Chinram ah hmunlawng pakhat hman a um lo.
Tufang ah Register a tuah zotu ramthukhel party (37) an um ih kum 2010 hrilawknak hnu ah Register tuah dingih dilngennak a neitu party (10) an um ti a si.
Party din dingih dilngennak a neitu party (10) lak ihsin party (4) pawl cu register tuah dingin siannak an ngah zo. Lailak hrilawknak hrangah sumpai million (700) lenglo hmang dingin an remruat cia ih kan dung kum 2010 hrilawknak ah billion (11) lai an cem ti a si.
(Ref: Eleven Media) | 
