|
Falam ah CNP C.E.C meeting nei
Chin World Media
December 5, 2011
 2010 election ah political party si ding in register no.21 a ngah ih MP 9 a tlingmi Chin National Party ih Central Executive Committee Meeting cu Falam khua ah December 3-4, 2011 ah nihnih sung an nei ti'n kan thei. Kanpalet, Mindat, Tedim, Hakha, Thantlang le Falam khua pawl ih CNP chairman le secretary zate, CNP in a tlingmi MP pawl, zate mipum 30 an kaai ih Party structure, Bills, Current Political issues le hmailam ttuan dingmi thu pawl an rel ti'n thuthang kan ngah.
NLD G.S Pi Aung San Su Kyi le USDP G.S U Htay Oo te in CNP le a unau party 5 (NBF- CNP, SNLD, RNDP, PSDP, AMDP) biak awk ding in an sawmmi thu khal nasazet in an rel ti ah kan thei.
Cuih meeting ah CNP headquarters lam in Chairman - Pu Zo Zam (Tedim), G.S - Salai Ceu Bik Thawng (Thantlang), Secretary 1 - Salai Nhgepi Thian Uk Thang (Falam), Youth organizer - Salai Myo Chit (Kanpalet) le Salai Tin Royal (Matupi) te khal Yangon in an thleng thei tiah Falam CNP Chairman Pu Cung Lian in Chin World a sim.
December 4 zing ah Falam sizungpi ih mi damlo pawl vehvainak an nei ih thapeknak, thlacam saknak le Christmas laksawng peknak pawl khal an nei ti ah CNP sungtuan Nhgepi in a sim bet.
"Falam ahcu sizung ah, Mindat ahcu thawng tlak pawl hnen thawng inn ah vehvai thapeknak kan nei ta," ti ah Nhge pi in a ti.
.....................................................................................................................................................................................................................................................................
|
