|
Hakha ih Chin Vuanzi Umnak Inn Mei A Kang
Chin World Media
December 16, 2011
Kum 2011, December 15 ni, Kawlram nazi zaan 8:30 ihsin thok in Chin ram khuapi Hakha dawr thar veng ih um Chin vuanzi umnak inn meisa a kang thu Chin World Media palai ih thuthang pekmi cu simthan a si zo.
Hakha khuasung ih um Chin World Media palai ih simnak vek a si ahcun hi meisa kangnak hi Chin ramhuap thuthentu lubik (ta-ya-tu-kyi chuk) a simi U Win Myint Kyaw inn ih elektrik-hri (wire) that lonak ruangih kang thokmi a si. Hi thuhla hi palik pawl in daan vekin zingzoinak an nei rero lai tin thu kan dong.
U Win Myint Kyaw ih inn cu vuanzi umnak inn kimvel (compound) ih ummi a si ih Chin ram Border Area and Security Minister ralkap bawi Zaw Min Oo le Chin ram Chief Auditor U Kyaw Zan ih inn karlak ih ummi a si. U Win Myint Kyaw cu a innsang pawl Chin ram ah an thlenghrihlo ruangah a kuttang a hnatuanpi pakhat thawn cui inn ah cun an um. Mei a kang lai ah amah khal hmun dang ah a rak leng.
Hi a kangmi inn hi thing thawn sakmi a si ih minute 30 lai a kang hnu ah meisa ziam ko in thah thei sal a si. Hi meikangnak ruangah thilri kyat ting 80 man lai sunral a si ding tin zumnak a um.
.......................................................................................................................................................................................................................................................................
| 
