Chin Ram Bing Man Tum Ruangah Bingdum In Man Pek
Chin World Media
December 14, 2011
Tukum Laitlang ih “Bing” cingtu pawl “Bing” man a tlak ruangah thuneitu pawl hnen sumpai an pe thei lo ih “Bing dum” cu paisa ai ah an pek tiah Chin World in thuthang a dong a si.
A hlan ahcu “Bing dum” cuai khat ah ting 12 – 18 karlak a si theu nan , tukum ahcu Tonzang khua ah cuai khat ah ting 6 hrawng lawng in an zuar thei ti a si. “Bing” ciinnak khua kiangkap ah tla cu cuai khat ah ting 4 hrawng lawng a si an ti.
“Tukum cu “bing” man zatek 50 rori a tlak ih , kum dang hnak in a harsa hlei ah hmaikum ih ciin ding hman kan harsa phah ding. Culak ah thuneitu pawl hnenah sumpai in kan pek thei lo ruangah “bing dum” cuai khat minung pathum tawm aw in kan pek. Kumkhat ah a tlangpithu in bing cingtu minung pakhat nih cuai 3-5 kiangkap a ngah theu. Cun, pathat a cotu deuh pawl in cu kumkhat ah cuai 30-35 tiang hrawng kan ngah. Bing lak caan July, August, September, October hnu in cu a tu vek hi “bing dum” laak caan a si. Shan state lam ih bing an pathat ruangah le dollar thleng man tum ruangah bing man a tlak a si ding”, tiah Zomi Student and Youth Organization (ZSYO) ih hotu pakhat in Chin World hnenah a sim.
Bing a cingtu khua pawl ih nikhua cu a tha lo ih a daizet. Curuangah pum cawm awknak an harsatuk ruangah Bing cingin an cawm aw ti a si. Harsa zet in kumkhat sung an tuan ih an duhvek in an pathat lo tikah cu harnak an tong sinsin tiah Tonzang khawsungmi pakhat in Chin World hnenah a sim.
Bing cingmi khua pawl tla cu- Mualpi, Nakzang, Khianglam, An lun, Gel mual , Lungtak ,Phaitu, Khua mun, Khamzang, Thuambual, Lenhankot, Senam, Khuankhan, Suanghoih, Khangkai Area pawl an si.
Chin state vuangyi-chuck Pu Hung Ngai hnenah October 28 le 29 ah Tonzang, le Cikha khua ah bing apnak an rak nei dah ih bing cuai 170 lai an kai. Cun, Pu Hung Ngai in bing cing nawn lo ding in le bing ai ah thlaici dang pawl cinter ding tiah thukamnak a rak tuah dah zo. Asian December 5 ih Chin State thansonak Vuangyi U Win Htun Tonzang khua a feh lai ah Pu Hung Ngai in mipi pawl ih diltummi pawl a kham ti kan thei. Cuhlei ah an dilmi a tamtuk tiah a ti hai ta bet ti a si. Thlakhat sung te ah Pu Hung Ngai ih thinlung hi tluk in a thleng awk timi cu Tonzang khua pawl an mangbangzia pawl an rel celcel tiah thuthang kan ngah.
