|
CNF ih Thu Poimawh Relkhawmnak Tuahsuak
Chin World Media
December 19, 2011
 Chin National Front (CNF) ih a voikhatnak Thu Poimawh Relkhawmnak(Emergency Conference) cu India-Myanmar ramri ah kan dung December ni 12 ihsin 16 tiang an tuahsuak zo a si tiah thuthang kan thei.
Cui tonawkkhawmnak ahcun ram sung, ram leng ihsin palai pawl tel in CNA ih palai pawl, thuron upa pawl, ruahnak petu upa pawl, zirthiamsang pawl, ahleice ih sawmmi pawl le phunsang tlawngta pawl thawn an zaten mipum 153 an kai thei a si tiah an thupuansuahnak sungah an than.
Hnam phunkim le peng zate ai-awhtu pawlkom phunkim telkhawm thluh in mipum (55) thawn Central Committee an dinsuak thei ih, cumi sung ihsin mipum (14) cu Tuanrel Central Committee le an hnatuannak pawl hohatu ding a thupibik Council cu mipum (21) thawn an dinsuak thei.
A thupibik Council ih hotu (Chairman) tuantu dingah a hmaisabik kum hrangah Dr. Za Hlei Thang (MP), a kum hnihnak hrangah Pu Lian Uk (MP), a kum thumnak hrangah Salai Kipp Kho Lian le a kum linak hrangah Pu Thang Nang Lian Thang pawl an hril.
Culawng si loin sungtuanpi dingah Pu Zing Cung, sungtuanpi bawmtu ah Paul Sitha, Dr. Sui Khar, Pu Khua Uk Lian pawl tla an hril tiah kan thei.
Chin Natioanal Front (CNF) cun Chinram acozah thawn ramkulh huap remdaihnak relkhawmnak cu kum 2012, January 5-6 ah Hakha ah an nei ding ti a si.
...............................................................................................................................................................................................................................................................
| 
