|
Falam ah CNP an ding ve ta
26th July 2010 Published: 17:00pm (CET)
by - Sen Hngilh Piang
 Tuikum Burma rampum hril awk nakah Chin mipi aiawh ih tel a tum tu Chin National Party (CNP) ih Falam hrang Township Committee hrilnak cu July 24, 2010 (Zarhte ni) ah CNP Joint Gen Secretary Salai Thian Uk Thang (Nhge pi) tei` inn ah an nei ti'n kan thei. Signboard, thantaar le zung on puai cu CNP CEC pawl Falam an thlen tik ih neih leh ding in an rel. Tufang CNP CEC sung ihsin hotu Pu Zo Zam le mipum 5 pawl cu Jeep thawn thlang lam, Lai tlaang hmun dangdang ih khual an tlawn laifang a si ih July zarh netabik sung ah Hakha, Thantlaang, Falam le Tedim lam ah zung on puai tuah vivo ding an si ti ah Falam ih um CNP member pakhat hnen ihsin thuthang kan ngah.
Cun, "Vote CNP, CNP...we love you, We love CNP" ti ih catlaang telmi sticker pawl khal campaign materials ah hmang in Falam ih Motor Cycles, Motors le dawr pawl ah hmuh ding a tamzet tiah Falam mino pakhat in a sim. (A sir zuk: Falam Bazar)
CNP Falam township committee cu a tanglam vek in an hril.
Chairman - Pu Cung Lian, Vice Chairman 1 - Pu Tluang Mang, Vice Chairman 2 - Salai Ral Cung Lian, G.S - Pu Don Hre Dun, Secretary 1 - Pi Len Vel, Secretary 2 - Pi Bawi Nei Thluai, Secretarty 3 - Pu Nek Mang, Financial Sec 1 - Pu Lian Bur, Sec 2 - Mai Far Sung, Sec 3 - Salai Van Khaw Thang.
E.C member:
1. Pu Biak Thang, 2. Pu Tlang Lian Thang, 3. Pu Ttial Sum, 4. Pu Zung Peng, 5. Pu Ye Naing @ Bawla, 6. Pu Ral Mang
Patron:
1. Pu Kap Dun, 2. Pu Van Kyi, 3. Pu Za Tluai, 4. Pu Ttial Luai pawl hril an si.
.....................................................................................................................................................................................
Zohthimtlak Peter Zung Uk
26.07.2010
 Damlo mangbang thisen thun tul pawl hrangah, mai miphun duhdawtnak le zawnruahnak thawn a thisen siang zetih rak hlu theu tu Peter Zung Uk hi kan Chin mi lakih mi zohthimtlak zet thisen hlu tu pakhat a si. Falam khua Kannan Clinic hmai ih dingtu hi a mah Peter Zung Uk cu a si.
Siang zetin a thisen vei tam damlo pawl hrangih a rak hlu theu ruangah Kawlram kumpi cozah, Union of Myanmar khalin ni 4/1/2009 ah khan tlawmngaihnak lamih a pakhatnak an pek mi Peter Zung Uk a si.
A nih hi vawi 79 thisen hlu zo tu siin, kawl ram cozah in sunlawi nak capi a pek hnu khal ah, tui ni tiang tlawmngaihnak thawn a thisen midang hrangih hlu bet rero tu a si.
Kum upa lam thlang a si mi Peter Zung Uk hi, Pa Kawl Bil leh Nu Nei Ci tei fapa a si ih, ni 13/10/1956 ah khan Falam Peng, Webulah khua ah a suak. Tu ah kum 53 nak hmang rero lai tu a si. Ni 27.11.1982 ah khan Peter Zung Uk hin Falam Sizung pi ah thisen a rak hlu (pek) hmaisabik ih, ni 3.02.2009 ah Falam Sizung pi ih a thisen hlu mi vawi 81 nak a kim a si.
A nih hi miphun thleidan awk nak thinlung, Peng tlang thleidan awknak, Zumnak ruangih thleidan awk nak leh mifahrah le milian thleidan nak tivek nei lo ih thisen hlu tu a si ruangah Chin miphun aiawh in siseh Falam khawpi huap in siseh sunlaiwh tlak le zohthim tlak a si ih, Falam Canaan Clinic khalin sunlawih upatnak pek in an nemhnget mi a si.
Amah Peter Zung Uk thawn pehthlaih le a thuhla theih fiang deuh duh nan um asile Falam khuasung ih um Canaan Clinic ah na rak zingzawi thei a si. | 
