Web portal hmaisabik Burma ah tuah
27th August 2010 Published: 12:00 noon (CET)
by - Sen Hngilh Piang
Burma ralkap cozah ih tuah mi a hmaisabik rampi huap Web Portal cu election tuah hlan thla 2 duh, kan hmai September thla sung ihsi mipi hman theih dingah an on thok ding thu Yadanapon teleport (YIT) thawn naivai aw tu pawlin an sim.
“Yatanapon News” tiah hmin an pek mi hi web portal hi kawl tong thawn ngan mi a si ih, a address cu www.yatanapon.com.mm a si. Tu dinhmun ah an sak theh pek te lawng a si in, test tuah rero laifang a si ruangah mipi pawl hrang zoh theih a si hrih lo tiah theih a si.
Hi web portal ah thuthang pawl hawl theinak Search Engine a tel ih, a hmangtu pawl hrangah thuthang tete pawl Yatanapon Data Base in siseh, a dang internet Search Engine pawl khalah Myanmar, English tong cihnih in hawl theih a si ding.
Ralkap cozah hin Yatanapon web portal hi bul-hrampi ah hmangin ramsung ramleng ih internet hmangtu Burma ram mi pawl cu san a man ih a famkim mi Online service pe thei dingah, sumdawn hnatuannak neitu pawl hrangah khal Online ihsin an thil tuah suak mi mipi hnen zamrang zetih thlen ter thei nak ding hrang thuthang lam ihsi bawmtu, hlimhlop nak lam, theihkauhnak lam, pehtlaih awk nak lam tivek a phunphun ihsi theihkauhnak lam pawl, thuthang theih duh mi tete pawl funkhawm awk nak rampi huap web portal tuah suak dingah timi hmuitin 3 neiin an tuah mi a si thu Yatanapon teleport ih hnatuantu pakhat cun a sim.
“Tu dinhmun ah data pawl petu ding leitlun hmun dangdang ihsi Search Engine 14 tluk in Yatanapon tele port thawn tuan tlang dingah an rak sawm hai zo. Asinan, hi milai pawl hi zo an si timi sim thei nak kan nih in kan nei lo” tiah Yatanapon web portal project ih tel tu pakhat cun a sim.
Yatanapon News website advertise nak ih a lang dan vek asile, a thupi bik ih tel mi pawl cu news, lehpannak lam, hlimhlawp nak lam, technology, sumdawnnak lam, umtu khawsak nak lam le politics pawl an tel.
Cui hlei ah Yatanapon news website parah Yahoo vekin a lak ih e-mail account on thei nak le messenger a tel ih, blogs, forum tivek ih social network hman thei mi pawl khal an telh cih. Online ihsi bazaar kai nak le bank hnatuan nak lam hrang service pe vivo dingah timtuahnak an neih thu Yatanapon teleport hnatuantu pakhat in a sim. Asinan, e-mail security thawn pehpar in Yatanapon web portal hin tuanvo laknak a neih hrih lo thu khal a sim bet.
“E-mail humhimnak lam thawn pehpar in tuanvo la dingah tu tiang hnatuantu ret mi kan nei hrih lo. A um cia mi hnatuantu pawl khal training peknak tivek tla kan nei hrih cuang lo. Free email kan pek mi pawl khal hi Gb ziangzat kan pe ding timi kan ruat rero lai, tiah a sim.
Ralkap cozah ih bawmnak pek mi web portal dinhmun in Google, Yahoo, MSN tivek pawl ih pek mi free email, blogs le forum pawl vekih ramleng internet service pawl mipi ih an rinsan zet nak reh ter in, ralkap cozah ih intranet web sung lawngih hmang dingah an leem/thlem nak a si thei tiah ramleng um web master pakhat cun a sim.
A sim bet nakah ”ralkap cozah ih bawmnak an ngah ruangah hi web portal hi Burma ram sungih tum bik a rung si thei, asinan mipi ih theih lar cia zet mi www.planet.com.mm tivek site pawl a luahlan thei pei maw timi cu zoh a tul hrih ding, tiah a ti.
Ralkap cozah hin leitlun thuthang website dang pawl mipi zoh thei lo dingih a kham bet lai ah Yatanapon news website pi cu a tarlang thlang ding a si. Zingzoitu pawl cun Yatanapon news web portal hi an on hnu ah an kham bet mi website dang pawl on sal ding dinhmun a mal tuk thlang tiah an sim.
YTP hnatuan pakhat cun “YTP parih zumnak tlaniam lo dingah tlun lam upa pawl hnenah kan thehlut ko. Hi web portal ih a tumtahbik mi cu - thuthim nakah internet cak thei lo mi thuhla khal a tel ko” tiah a sim.
Leitlun news agency tumzet pawl a si mi AP, AFP le ABC thulaknak tivek ihsin international news pawl Yatanapon thuthang cahmai tlang ih ret ding hrang leitlun news agency pawl thawn lungkim tlangnak tuah nan tum maw tum lo timi thusuhnak cu, “ international news pawl tarlang ding a um ko, asinan cuti vekih lungkim tlang nak tuah mi cu a thok pek lai ahcun a um hrih lo ding” tiah YTP hnatuan pa cun a sim.
Yatanapon news web portal thuhla hi Yangon khawpi sung Tatmadaw [Military] Hall ah tui zarh sung August ni 20 – 23 karlak ih an tuah mi “Lifestyle & Car Expo 2010” timi exhibition an tuah nakah mipi pawl theih ter nak an tuah thok.
Hi rampi huap web portal hi tu dinhmun ah Ministry of Communications, Posts and Telegraphs (MPT) in an controll lai ih, neta lamah Yatanapon teleport kutah an ap ding tiah theih a si.
Ministry of Communications, Posts and Telegraphs hin Pyin Oo Lwin Township ih a um mi Yatanapon Cyber City project zate lakih 40% a nei ih, a dang 60% cu private company pawlin an nei.
Himi ih sumlu tohnak tuahtu bik private company lak ah Snr Gen Than Swe ih milai, sumdawng milian hminthang U Tay Za ih E-lite Tech khal a tel. Hi company hin kandung ni te ah internet broad band service Yangon ah an pe thok.
Yatanapon teleport hi ramsung ih computer le technology phunsang tlawng pawl ihsi tlawng theh suak tu pawl hnatuantu ah an khawl khawm ih, hi pawl hi teleport ih building 7 um mi sungah hna an tuan rero hai. Yatanapon teleport hi Burma ralkap cozah in Malaysia ram ihsi technology company pakhat ih bawmnak thawn an tuah mi a si tiah theih a si.
Source: Irrawaddy
