November ni 7 ah election tuah ding
14th August 2010
by - Sen Hngilh Piang
Burma ralkap cozah cun kum 20 sungih a veikhat nak election cu tuikum November ni 7 (Sunday) ih tuah a si ding thu Election Commission cun mani 13.8.2010 ah acozah media pawl ihsin a phuang. Hi hril awk nak nitiam an phuan mi hi Aung San Suu Kyi innthawng ihsi a suah ni kim hlan zarhkhat duh ah a si.
Political party pawl hrangah August ni 16 ihsin tui thla cem tiang MP candidate pawlih hmin nan theh lut ding tiah Election Commision in thu a suah. EC hin Burma rampum state 7 le division 7 ah Meezung (constituencies) 330 a um ding thu an suah ih, Shan state ah 55 um in, meezung tambik umnak a si dingih Karenni le Karen state pawlah 7 veve um in meezung mal bik nak a si ding.
Chin state ah meezung 9 a um ding. Khuapi pakhat ih mipum tambik umnak Yangon ah meezung 45 a um dingih ralkap khawpi thar Naypyidaw ah meezung 8 a um ding.
US State Department thuphuangtu Philip Crowley cun, party pawl cangvaihnak dinhmun kau deuh ih on sak lo ih tu vek dinhmun a si sung ahcun tel kim thluh le zumtlak hril awk nak a si thei hrimhrim lo ding, tiah a sim. British foreign office minister Jeremy Browne khalin, hi hril awk nak hi ralkap pawl lal vivo thei nak dingah khuahkhirhnak nasa zet dinhmun hnuai ih tuah ding mi a si, tiah a ti.
Hril awk nak ding ni phuan a si veten UN Sec Gen Ban Ki-moon khalin hril awk nak nitiam kim hlanah politic ruangih thawng tla pawl an zaten suah dingah Burma ralkap cozah cu ngen nawn sal in, cuti asile hril awk nakah zalen zetin an tel thei ding tiih a sim thu, a thuphuang tu Martin Nesirky in a sim.
Tui kum election ah party 40 pawl cu hril awk nakih cuh thei ve dingah siansak an si ih, asinan 1990 ih nehnak cotu NLD party cun an tel lo ding thu an sim. Hril awk nak ih teltu ding party pawl hin tuikum hril awk nak ih cuh ve ding siansak an si veten ni 90 sungah an party member neih zat hmin cazin Election Commission ah an theh luh ding a si.
2008 danhrampi an tuah mi ah ralkap pawl cu parliament ah lalnak 25% an co ding hlei ah kandung April thla ah khan prime minister General Thein Sein telin ralkap minister rual pawlin an ralkap sinak ihsi bang tahrat in tuikum hril awk nak ih tel ve dingah USDP party an din. Acozah lamtang hi party hin member 27 million an nei zo, tu baite ah an thang nasa tiah AFP thuthang pakhat cun a tarlang.
Member 440 um ding mi House of Representatives ah 330 pawl cu mipi ih hril mi an si dingih a dang 110 cu ralkap pawlin an duh mi an ret ding. Member 224 um ding mi House of Nationalities ah 168 mipi hril mi le ralkap 56 an um ding.
Human Rights Watch pawl cun hi hril awk nak hi pompi a si lo ding thu le 2003 Depayin ih Suu Kyi khual tlawng nak rak ti buai ih rak that ciamco tu pawl khal USDA an si thu simin, tu khalah acozah dodal tu political party pawl cu tihthaih an tuar rero thu si seh, tuikum hril awk nak ding hi a hmin ih civil uknak men a si ih, ralkap pawl an lal peh vivo thotho ding tiah an sim.
