Than Shwe le General pawl rakap in an cawl
28th August 2010 Published 04:00 am (CET)
by - Sen Hngilh Piang
Burma ralkap hotu lubik pawl cu mani 27.8.2010 friday ah khan an ralkap sinak an cawlhsan thu AP thuthang cun a tarlang. Snr Gen Than Shwe, deputy General Maung Aye, Gen Thura Shwe Mann le Thiha Tura Tin Aung Myint Oo pawl telin ralkap hotu dang pawl cu an ralkap sinak an cawlhsan tiah thuthang a um ko nan, acozah media pawlah hi thuhla hi phuansuahnak a um hrih lo.
Tuikum thok lam khalah prime minister Gen Thein Sein telin burma ralkap general 27 rual pawl cun an ralkap sinak cawlhsan in civil thuam thawn minister dinhmun an tuan peh sal hai a si.
November ni 7 election tuah hlan ah tu vekih ralkap hotu sinak ihsi an cawlh dan zoh asile hril awk nak ih an tel ve ding zum a si ih, hril awk thluh hnu ih ra suak ding mi civilian acozah sungah ralkap hotu general pawl hi civil mi vekin President le vice president tuanvo la dingah an timtuah thok mi a si thei thu zingzoitu pawl cun an sim.
An hnatuan nak lawng mi ah zo pawl ret lawk an si ding timi tu tiang theih fiang a si hrih lo nan, Than Shwe hin Burma ralkap lu bik sinak cu Lt.Gen Thura Myint Aung hnenah a ap lawk tiah an sim. Cuvek thotho in Gen Maung Aye khalin deputy commander in chief a sinak cu Lt.Gen Ko Ko hnenah a ap ve timi thuthang a um ko nan, nemhnget thei dingih phuan nak a um hrih lo. Amah khal ralkap cozah ih deputy head of state a si ringring thotho ding tiah an sim.
Burma ralkap hotu lu bik 3 nak Gen Shwe Mann khal a ralkap sinak cawlh san ve in ralkap cozah ih lalbik 4 nak, Lt- Gen Tin Aung Myint Oo thawn ralkap cozah party USDP ihsin Naypyidaw ah MP an cuh ve tum tiah an sim.
AP thuthang hin Friday ah khan Shwe Mann le Tin Aung Myint Oo telin burma ralkap officials dazen khat lai november election ih tel tum in an ralkap sinak an cawlhsan thu a sim ih, Lt.Gen Min Aung Hlaing cu Shwe Mann aiawh tu ding a si tiah a ngan.
Tui zarh ihsi thok in ralkap cozah minister pawl hmuahhmuah cu acozah ih pek mi an umnak inn pawl suahsan dingah fial an si, Yangon ih umkhawm dingah an fial hai. Ralkap cozah hin a rei hlanah interim government an tuah lohli zum a si.
