NDF hotu election ah tel lo ding
26th August 2010 Published:20:00pm (CET)
by - Sen Hngilh Piang
National Democratic Force (NDF) Party cun tuikum Burma election ah an party hotu U Khin Maung Swe a tel lo ding thu phuang in, asinan an party hotu dinhmun ih a um ringring lai ding thu an sim.
Khin Maung Swe hi Pi Aung San Suu Kyi tei party NLD suahsan in, tui kum election tel duh ruangih NDF party timi dintu hotu hlun 4 lakih 1 a si, NLD party ih senior member a rak si vekin 1990 election ah MP ih hril tlin mi khal a si ko nan, ralkap cozah in rampi phatsan ah puh in kum 16 sung thawng an thlak ih, cumi cun tui kum hril awk nak ih tel dingah a thlin lo ter phah a si.
Kandung May thla ah NLD suahsan in National Democratic Force (NDF) timi din tu NLD hotu hlun 4 pawl hi thawng rak tla dah zo tu pawl an si ruangah election law vek asile tuikum hril awk nakih tel thei an si lo. Hmansehla election commission in kandung thla ah zangfah dilnak ca an thehluh thei thu an sim, asinan zangfah dilnak ca EC ih an va theh luh ngaingai tikah nan document theh luh mi hi a famkim lo tiah an rak tiih, zangfah dilnak ca theh luh leh sal dingah an rak fial hai.
Tui tum zangfah dilnak hmin sign an ngan ter sal mi cu dan hrampi kilkhawi humhim ding, rampi thenthek ter lo ding, ralkap thenthek ter lo ding timi party registration an tuah lai ih lungkim nak hmin sign ngan mi vek khan pakhat ciar in hmin sign an ngan ter.
Election ih MP cuh ve dingah hiti vekin hmin sign ngan ih zangfah dilnak ca theh luh sal a tul tu NDF hotu 4 lakah U Khin Maung Swe cun, dil nak a tuah sal nawn lo ding thu a sim. A hmaisa ah hmin sign ngan ih a rak dil nak kha cu EC thawn tuan tlang a duh ruangah a si ih, a tu ah Party register an rak tuah lai ih an tiamkam awk nak vek tuah sal in, MP cuh thei dingih zangfah dil sal ding an fial tikah cun a nih cun a dil sal nawn lo ding thu a sim.
Hotu dang 3 pawl a si mi U Sein Hla Oo, U Tin Aung le U Thar Sai pawl cun EC ah zangfah dilnak an theh luh leh sal zo. Hiti vekin dil nak an theh luh sal ko nan, tui kum hril awk nakih an tel thei ding le ding lo a fiang hrih cuang lo.
“Ka lu kun in in tel siang hram uh tiah ka dil asile kan party hmin a sia ding, an zaten kutzung in khih thlang ding. Zoh hnik uh kan hotupa U Khin Maung Swe in hril awk nak ih tel thei ve dingah ngaithiam dil in, tangdor zetin lut ngah tengteng dingah a dil rero. Tlun lam thuneitu pawlin tel an awi lo asi ahcun a cem si ko. Politic hminthan nak le party dinhmun tiang a siatsuah ter theh ding tiah, Khin Maung Swe cun a sim.
Khin Maung Swe hin amah cu hril awk nak ih a cuh ve lo khal le party hotu tuanvo a lak vivo thotho ding thu a sim. Thawng an rak tlak zo ruangah tu vekin ngaithiam dilnak ca EC ih theh luh ter khuahkhirhnak an pek hlei ah hril awk nak ni thlen taktak hlanah harsatnak a phunphun tawng vivo khal hai sehla, cumi pawl pahtlang in a netabik hril awk nak luh ngah tiang in kan tel suak tengteng ding tiah a sim bet.
Hhril awk nak ih kan tel hnu lawngah democracy le human rights pawl ngah dingah, sumdawn bangrannak um dingah, rahbet mi sumdawn nak um nawn lo dingah parliament sung ih uk awk nak danhram pawl thawn kan tuah tha ding tiah U Khin Maung Swe cun a ti.
Dan hrampi le election law pawl an suah mi hi bangrannak a um lo ti ka thei. Media pawl khalin an sim rero ko, asinan Chili ram le S.Korea ram pawl khalah tuvek thotho in democracy system ah an rak feh suak thei ko sisi, tiah a sim bet.
NDF party ihsi election ih tel lo ding cu U Khin Maung Swe amah pakhat lawng a si ih, a mal bik an party aiawh MP cuh tu ding 130 hrawng an um thu khal U Khin Maung Swe hin a sim.
Hiti lai ah election commission hnenih an party member neih zat report pe zo tu UDP party cun tuikum hril awk nakah MP candidate 3 lawng an cuh ding thu an sim. UDP hin election thawn pehpar in an dan le dun suah mi pawl parah rinhlelhnak an nei. Election commission ih thusuah mi pawl zoh tik khal ah bangrannak um thei mi a si lo lawlaw tiah kan hmu. Party kan rak din thok lai khalah bangrannak a um thei mi dinhmun a cang suak lo ding ti kan thei ko, mipi lamtang democracy thazaang pawlin election ah an cak thei ding beisei in party din ih election ih kan tel nak a si ko nan, tui dinhmun ah candidate 3 lawng ih an cuh ding mi hi kan ti thei sun le kan ti ding umsun kan tuah mi a si.
Ralkap pawlin bangrannak umlo zetih an tuah mi dan le dun pawl kan tuar cuahco rero men tinak khal a si lo vekin a sung kan pe tinak khal a silo tiah UDP party president U Thein Htay in a sim.
